केंद्र सरकार ह कीहिन हे कि वैज्ञानिक मनके मंजूरी मिले के बाद देश म कोविड महामारी के टीका के बड़ पैमाना म उत्पादन शुरू कर दे जाही। केंद्रीय स्वास्थ्य मंत्रालय के सचिव राजेश भूषण ह बताइन कि टीका के उत्पादन के जम्मों तियारी पूरा कर ले गेहे।
स्वास्थ्य सचिव ह कीहिन कि कुछएक टीका ल अवइया दिन म लाइसेंस मिले के संभावना हवय। केंद्र सरकार, राज्य अउ केंद्रशासित प्रदेश के मदद ले टीका के उत्पादन बर तियारी करत हे।
एति प्रदेश म काली रतिहा तक कोरोना संक्रमण के चैदा सौ अड़सठ नवा मरीज मिले हे। राज्य म अभी उन्नीस हजार पांच सौ ले जादा सक्रिय मामला हवय।
इही बीच प्रदेश के स्वास्थ्य मंत्री टी.एस. सिंहदेव ह लोगन ले कोरोना ले बांचे बर जरूरी सावधानी राखे के अपील करीन हे।
धान खरीदी समाचार
प्रदेश के उपार्जन केंद्र मन म समर्थन मूल्य म धान बिसाय के काम चलत हे। काली तक दस लाख पच्यासी हजार मीट्रिक टन ले जादा धान बिसाय गीस। अब तक राज्य के तीन लाख पांच हजार ले जादा किसान समर्थन मूल्य म धान बेचे हे।
इही बीच बेमेतरा के जिला कलेक्टर शिव अनंत तायल ह तहसील क्षेत्र के सैगोना, कुरूद अउ थानखमरिया समेत आने धान खरीदी केंद्र के दौरा करीन। ये बेरा म ओमन धान के रख रखाव, बारदाना अउ किसान मन बर जरूरी सुविधा ल देखीन।
उंहें महासमुंद जिला के ग्रामीण सेवा सहकारी समिति सम्हर के किसान मन ह बारदाना नइ होय के सेती धान खरीदी बंद होय ले नाराजगी जताइन हे। ए किसान मन उपार्जन केंद्र म ताला लगाके अपन विरोध दरज करीन।
राजनंादगंाव जिला के घुमका धान खरीदी केंद्र म धान के तौलाई के बेरा मउका म एक किसान के मउत होय के समाचार मिले हे। परिवार के लोगन मन धान खरीदी केंद्र के कर्मचारी मन उपर आरोप लगाइन हे कि फसल बिसाय ले मना करे अउ पइसा देके मांग करे म किसान के तबियत बिगड़ गे अउ ओखर मउत होगे।
इही बीच किसान के मउत ल लेके भाजपा के राष्ट्रीय उपाध्यक्ष अउ पूर्व मुख्यमंत्री डॅाक्टर रमनसिंह ह राज्य सरकार उपर किसान मन संग छल करे के आरोप लगाइन हे । ओमन कीहिन कि राज्य सरकार किसान मनके उपज के सिरिफ दस फीसदी धान बिसावत हे। ओमन राज्य सरकार उपर किसान मनके खेती के रकबा ल कमती करे के आरोप लगाइन हे।
भारतीय जनता पार्टी के राष्ट्रीय महामंत्री अउ प्रदेश प्रभारी डी. पुरंदेश्वरी ह आरोप लगाइन हे कि राज्य सरकार हर मोर्चा म विफल हावय। अउ ओखर कमी ल मुद्दा बनाके जनता तक पहुंचाय जाही। ओमन अपन छत्तीसगढ़ दउरा के बेरा आज बिलासपुर पहुंचीन जिहंा छत्तीसगढ़ भवन म पार्टी पदाधिकारी अउ कार्यकर्ता मन ह ओखर सुआगत करीन।
मीडिया ले गोठबात करत ओमन कीहिन कि भाजपा ह राज्य म अवइया तीन बछर तक के कार्य योजना तियार कर लेहे, जेमा राज्य सरकार के वादाखिलाफी के खिलाफ प्रभावी रूप ले लड़ाई लड़े जाही। एक सवाल के जुआब म ओमन बताइन कि नवा कृषि कानून किसान मनके फायदा बर हे अउ सरकार चाहत हे कि किसान मन ल उपज के बने कीमत मिले ।
अंतर्राष्ट्रीय भ्रष्टाचार रोधी दिवस आज मनाये जात हे। भ्रष्टाचार के विरोध म जागरूकता लाय खातिर संयुक्त राष्ट्र महासभा ह इकतीस अक्टूबर दू हजार तीन के संधी मंजूर करे रीहिस। एखर उद्देश्य भ्रष्टाचार के विरोध म जागरूकता पैदा करना हे। एसो अंतर्राष्ट्रीय भ्रष्टाचार रोधी दिवस के विसय हरय सत्यनिष्ठा के साथ महामारी से निपटना – ए बेरा म छत्तीसगढ़ समेत देशभर म जनजागरूकता म आधारित कतकोन कार्यक्रम करे जात हे।
ये कड़ी म मुख्यमंत्री भूपेश बघेल ह आज रायपुर म अपन निवास कार्यालय ले एंटी करप्शन ब्यूरो अउ राज्य आर्थिक अपराध अन्वेशन ब्यूरो के वेबसाइट के लोकार्पण करीन। ये वेबसाइट छत्तीसगढ़ी भाषा म बनाय गेहे। मुख्यमंत्री ह भ्रष्टाचार म जागरूकता के खातिर एक पोस्टल के विमोचन घलो करीन। कार्यक्रम ईओडब्लू अउ एसीबी के अधिकारी अउ कर्मचारी मन ह मुख्यमंत्री राहत कोष म सवा लाख रूपिया के सहयोग राशि के चेक श्री बघेल ल भेंट करीन।
मुख्यमंत्री भूपेश बघेल ह कीहिन हे कि गांव म गौठान गांव के लोगन बर रोजगार के साधन बन गेहे। ये बात मुख्यमंत्री ह छत्तीसगढ़ गोधन न्याय योजना म हितग्राही मनले गोबर बिसाय म करीबन साढ़े पांच करोड़ रूपिया के रकम आॅनलाईन भुगतान करत कीहिन।
मुख्यमंत्री ह योजना के नउवां किस्त म इकतालिस हजार ले जादा पशुपालक मन ल रकम बांटीन। मुख्यमंत्री ह कीहिन कि गौठान के समिति समेत स्व सहायता समूह ल कृषि महाविद्यालय अउ कृषि विज्ञान केंद्र ले जोड़के एला अउ जादा बने बनाय जाही।
प्रधानमंत्री आदर्श ग्राम योजना म राजनंादगंाव जिला म अनुसूचित जाति बाहुल्य उन्नीस ठिन गांव के चयन करे गेहे। ये गांव म करीबन सात करोड़ सात लाख रूपिया के लागत ले विकास के काम करे जाही। आदिवासी विकास विभाग के सहायक आयुक्त एम.एल. देशलहरे ह बताइन कि ये गांव मन म विकास काम बर पहिली किस्त के रूप म तीन करोड़ चार लाख रूपिया के रकम के आबंटन करे गेहे।
मुख्यमंत्री भूपेश बघेल के मासिक रेडियो वार्ता लोकवाणी के तेरहवंा कड़ी के प्रसारण इतवार तेरा दिसंबर के होही। मुख्यमंत्री लोकवाणी म ये बखत छत्तीसगढ़ सरकार दो वर्ष का कार्यकाल – विसय म प्रदेशवासी मनले गोठबात करही। ए कार्यक्रम के प्रसारण आकाशवाणी के जम्मों केंद्र अउ एफ.एम. रेडियो के संगेसंग क्षेत्रीय समाचार चैनल ले बीहनिया साढ़े दस बजे ले ग्यारा बजे तक करे जाही। ़
राष्ट्रीय लोक अदालत के आयोजन बारा दिसंबर के करे जाही। ये बखत पक्षकार वर्चुअल या भौतिक रूप म मौजूद होके राजीनामा ले मामला के निराकरण करा सकही। उच्च न्यायालय के मुख्य न्यायाधीश न्यायमूर्ति पी.आर. रामचंद्र मेनन अउ न्यायमूर्ति प्रशांत कुमार मिश्रा के अगवई म ये लोक अदालत के आयोजन करे जाही।
कोंडागंाव जिला के मर्दापाल क्षेत्र के माओवाद प्रभावित नवागांव म चलित थाना के आयोजन करे गीस। ये चलित थाना ले पुलिस ह गांव के लोगन ल सायबर ठगी ले बांचे अउ यातायात नियम के पालन के संबंध म जानकारी दीन। संगेसंग उंहा के लोगन के समस्या ल सुनीन। पुलिस के मदद ले मर्दापाल- बयानार रद्दा बनाय के काम पूरा होय म गांव के लोगन मन खुशी जताइन हे। कार्यक्रम म नवागांव अउ खोडासानार गांव के लोगन मन शांति बनाय राखे बर माओवादी मनके खिलाफ अभियान म मदद देके भरोसा देवइन ।
पढ़ना लिखना अभियान म राजधानी रायपुर म तीन दिवसीय राज्य स्तरीय कार्यशाला के आयोजन करे जात हे। काली राज्य साक्षरता मिशन प्राधिकरण के संचालक डी.राहुल वेंकट ह ए कार्यशाला के शुभारंभ करीन। ओमन कीहिन कि साक्षरता कक्षा म पढ़ईया स्वयंसेवी शिक्षक मनके स्तर ल धियान म राखत प्रशिक्षण सामग्री बनाय जाना चाही।
उंहें महासमुंद जिला म पढ़ना लिखना अभियान म चैदा ले उन्नीस दिसंबर तक निरक्षर मनके पहिचान करे बर एक सर्वे करे जाही।