लघु वनोपज-खरीदी
राज्य सरकार ह प्रदेस म समर्थन मूल्य म अब बावन लघु वनोपज मनके खरीदी करे के निर्णय लेहे। पहिली अड़तीस लघु वनोपज मनके खरीदी समर्थन मूल्य म करे जात रिहीस। चैदह नवा लघु वनोपज मन म पलास, सफेद मूसली, इंद्रजौ, पताल कुम्हड़ा, कुटज, अश्वगंधा, आंवला, सवई घास, कांटा झाडू, तिखूर, बीहन लाख-कुसमी, बीहन लाख-रंगीनी, बेल अउ जामुन के खरीदी करे जाही।
धान खरीदी/अवैध धान-परिवहन
प्रदेस म खरीफ विपणन बछर दू हजार बीस-इक्कीस म काली चार दिसंबर तक छह लाख उन्नीस हजार मीटरिक टन ले जादा धान के खरीदी करे गेहे। ए दउरान एक लाख ससत्तर हजार ले जादा किसान मन समर्थन मूल्य म अपन धान बेचीन।
इही बीच, महासमुंद जिला के कृषि उपज मंडी पिथौरा म अवैध धान भंडारण करइया दू करमचारी मनके खिलाफ कार्रवाई करे गेहे। ए मन करा ले लगभग बैसठ क्विंटल अवैध धान जब्ती करे गेहे। जानबा के मुताबिक मुढ़ीपार चैक पिथौरा अउ ग्राम लारीपुर म दू लोगन मनके इहां छापा मारे गीस, जिहां ले अवैध रूप ले भंडारित करे गे धान ल जब्ती करे गीस।
उहें, जिला के सरकडा सोसायटी म नयापारा के बजाय पटपरपाली म धान खरीदी केन्द्र बनाय ले नाराज किसान मन राष्ट्रीय राजमार्ग क्रमांक-तिरपन म मुढ़ीपार चैक तीर चक्काजाम करीन। एखर पहिली, एक दिसंबर के किसान मन ह सोसायटी म घलो तालाबंदी कर चुके हे। फेर, ओमन मनके मांग म अब तक कोनो सुनवाई नइ होय हे।
ओति, सरगुजा जिला म लखनपुर विकासखंड के धान खरीदी केन्द्र म एक झिन बिचैलिया डहार ले अवैध रूप ले धान बेचे के प्रयास करे जात रिहीस। ए दउरान निरीक्षण करइया टीम ह ओखर तीर ले दू सौ सत्तर बोरी धान जब्ती करके समिति प्रबंधक ल सौंपीन।
किसान-आत्महत्या
कोंडागांव जिला के तहसील बड़ेराजपुर के ग्राम मारंगपुरी म एक किसान के आत्महत्या करे के मामला म जिला प्रसासन ह पटवारी ल निलंबित कर देहे। उहें, तहसीलदार ल कारण बताओ नोटिस जारी करे गेहे।
ए संबंध म जिला प्रसासन ह अनुविभागीय अधिकारी करा जांच रिपोर्ट मांगे रिहीस, जेमा बताय गेहे कि मृतक किसान के लइका के दू बछर पहिली मउत होगे रिहीस, जेखर कारण ओ ह अवसाद म रिहीस। उहें, तहसीलदार डहार ले जांच प्रतिवेदन म पाय गीस कि मृतक किसान ह ढाई हेक्टेयर ले जादा कृषि भूमि म धान के फसल लगाय रिहीस, लेकिन गलती ले सरकारी रिकार्ड म कम भूमि म धान के फसल के प्रविष्टि होय गे रिहीस, जेखर कारण ओ ह मानसिक रूप ले परेसान रिहीस। यहू बात हे कि मृतक किसान ह प्रसासन ल एखर कोनो सूचना नइ दे रिहीस। प्रसासन ह ए मामला म पटवारी ल लापरवाही बरते के कारण निलंबित कर देहे।
विस सत्र-मुख्य सचिव
छत्तीसगढ़ विधानसभा के सीतकालीन सत्र अवइया इक्कीस दिसंबर ले सुरू होही। ए सत्र तीस दिसंबर तक चलही।
ए संबंध म मुख्य सचिव अमिताभ जैन ह आज वीडियो कान्फ्रेंसिंग के माध्यम ले सबो विभाग के अपर मुख्य सचिव, प्रमुख सचिव अउ विशेष सचिव ले चर्चा करीन। श्री जैन ह सत्र के दउरान विभाग मन म विधानसभा प्रकोष्ठ के गठन करे अउ नोडल अधिकारी नियुक्त करे के निरदेस दीन।
राम वनगमन परिपथ
राज्य के कांग्रेस सरकार के दू बछर पूरा होय के मउका म ऐतिहासिक अउ सांस्कृतिक धरोहर ‘राम वनगमन परिपथ‘ म अवइया चैदह ले सत्रह दिसंबर तक पर्यटन रथ अउ बाईक रैली के आयोजन करे जाही। ए रथ अउ रैली राज्य के उत्तर म स्थित सीतामढ़ी हरचैका जिला कोरिया अउ दक्षिण म स्थित रामराम जिला सुकमा दूनों छोर ले चैदह दिसंबर ले चालू होही, जउन कतकोन रद्दा मन ले होवत सत्रह दिसंबर के चंदखुरी म खतम होही। ए रैली चिन्हारीत पर्यटन स्थल मन ले इकट्ठा करे गे माटी अउ प्रतीक चिन्ह ल लेके चंदखुरी पहुंचही, जिहां ए माटी ले वृक्षारोपण करे जाही।
कोरोना समाचार/जागरूकता
प्रदेस म कोरोना संक्रमित मरीज मनके संख्या दू लाख चवालीस हजार तक पहुंच गेहे। राज्य म काली एक हजार पांच सौ उनयासी नवा मरीज मनके पहिचान करे गीस। उहें, काली तेरह मरीज मनके मउत घलो होईस। प्रदेस म हाल-फिलहाल उन्नीस हजार तीन सौ इंक्यावन मरीज मनके इलाज कतकोन अस्पताल मन म चलत हे।
ओति, राजनांदगांव जिला म स्वास्थ्य विभाग ह सर्दी, खांसी, बुखार या कोरोना ले जुड़े दूसर लक्षण वाला मरीज मन ले बिना कोनो डर के कोरोना जांच जरूरी रूप ले कराय के अपील करीन हे। विभाग ह केहे हे कि कोरोना के जांच कराय म डरे के कोनों बात नइ हे। ए केवल अफवाह हे कि कोरोना जांच करइया हरेक मनखे के रिपोर्ट पाॅजिटिव आही। विभाग ह किहीन कि जिला म अब तक करीबन डेढ़ लाख लोगन मनके कोरोना जांच करे जा चुके हे, जेमा दस प्रतिसत यानि पन्द्रह हजार मनखे मन ही कोरोना पाॅजीटिव पाय गेहे। उहें, ठीक होवइया मरीज मनके दर लगभग नब्बे प्रतिसत हे।
इही बीच, पूर्व अंतर्राष्ट्रीय मुक्केबाज खिलाड़ी अउ अर्जुन पुरस्कार ले सम्मानित राजेन्द्र प्रसाद ह लोगन मन ले कोरोना ले बांचे के जरूरी सावधानी बरते के अपील करे हे।
मुख्यमंत्री-जशपुर दौरा
मुख्यमंत्री भूपेश बघेल ह आज जशपुर जिला के ग्राम गम्हरिया के धान खरीदी केन्द्र पहुंचीन अउ किसान मन ले गोठबात करके खरीदी केन्द्र के बेवस्था के जानकारी लीन। ओमन धान के खरीदी अउ भुगतान के बारे म घलो किसान मन ले पूछीन।
एखर पहिली, मुख्यमंत्री ह जिला के ग्राम पंचायत बालाछापर म सरना एथेनिक रिसाॅर्ट तीर समेकित चाय रोपण के भूमिपूजन करीन अउ चाय के पौधा लगाईन। ए मउका म मुख्यमंत्री ह वन विभाग के अधिकारी मन ल चाय के खेती बर किसान मनके समूह बनाय अउ ओमन ल प्रोत्साहित करे के निरदेस दीन।
बीएसएफ-स्थापना दिवस
सीमा सुरक्षा बल-बीएसएफ अपन छप्पनवां स्थापना दिवस मनावत हे। इही कड़ी म आज गृह मंत्री ताम्रध्वज साहू ह राजधानी रईपुर तीर माना म राखे गे कारीकरम म सामिल होईन। ए मउका म गृह मंत्री ह बीएसएफ के जवान मन ल उंखर राष्ट्र सेवा अउ समर्पण खातिर नमन करत किहीन कि बीएसएफ ल भारतीय क्षेत्र मनके रक्षा के पहिली दीवार कहे जाथे। ओमन किहीन कि बीएसएफ उपर देस ल गर्व हे। छत्तीसगढ़ म घलो माओवादी विरोधी अभियान म बीएसएफ के अहम भूमिका हवय।
ट्रेन-रवानगी
कोरोना संक्रमण के सेती पाछु आठ महीना ले जादा समय ले बंद अंबिकापुर-जबलपुर एक्सप्रेस ट्रेन आज ले चालू होगे हे। ए ट्रेन आज मंझनिया बारह बजके पचास मिनट म मदनमहल के बजाय जबलपुर स्टेसन ले रवाना होईस, जउन रतिहा ग्यारह बजे अंबिकापुर पहुंचही। उहें, अंबिकापुर ले ए ट्रेन अवइया दिन बिहनिया सवा छह बजे जबलपुर बर रवाना होही।
हाथी उत्पात
धमतरी जिला के ग्राम पंचायत अरौद डुबान के आश्रित गांव उरपुटी म पाछु रतिहा हाथी मनके दल ह दू ठन मकान ल क्षतिग्रस्त कर दीस। ए दउरान घर म रहइया लोगन मन भाग के अपन जान बचाईन। आज बिहनिया गांव के सरपंच ह एखर सूचना स्थानीय विधायक रंजना साहू अउ वन विभाग ल दीन।
डीएफओ अमिताभ बाजपेयी ह बतईन ग्राम उरपुटी म हाथी मन डहार ले उत्पात मचाय के खबर मिले हे। ओमन किहीन कि प्रभावित ग्रामीण मन ल होय नुकसान के आंकलन करके नियमानुसार मुआवजा दे जाही। वन विभाग के टीम हाथी मन उपर नजर राखे हे। गांव म मुनादी कराके ग्रामीण मन ल जंगल कोति नइ जाय के अपील करे गेहे।
विश्व मृदा दिवस
आज बिश्व मृदा दिवस हे। ए मउका म केन्द्रीय मंत्री प्रकाश जावड़ेकर ह किहीन कि भारत ह मृदा स्वास्थ्य के क्षेत्र म महत्वपूर्ण काम करे हे अउ कतकोन देस मन बर मिसाल कायम करे हे। आज एक ट्वीट म ओमन किहीन कि विश्वभर म मृदा स्वास्थ्य खातिर जागरूकता जरूरी हे।
सशस्त्र झण्डा दिवस
सशस्त्र सेना झण्डा दिवस ए बछर एक दिसंबर ले इकतीस दिसंबर तक ‘गौरव माह‘ के रूप मनाय जात हे। ए मउका म रईपुर संभाग आयुक्त जी.आर. चुरेन्द्र, कलेक्टर डाॅक्टर एस. भारतीदासन अउ जिला सैनिक कल्याण अधिकारी रईपुर कैप्टन सेवानिवृत्त अनिल चंद्र पोखरियाल ह जम्मों नागरिक मन ले दान देके आग्रह करे हे।
जानबा के मुताबिक युद्ध म सहीद सैनिक, दिव्यांग सैनिक, उंखर लइका, विधवा के संगेसंग पूर्व सैनिक अउ उंखर आश्रित मन बर सशस्त्र सेना झण्डा दिवस हर बछर सात दिसंबर के मनाय जाथे।
खाद्य आयोग-समीक्षा बैठक
छत्तीसगढ़ राज्य खाद्य आयोग के अध्यक्ष गुरूप्रीत सिंह बाबरा केन्द्र सरकार के खाद्य अउ सार्वजनिक वितरण विभाग डहार ले खाद्य विभाग के कामकाज के समीक्षा म राखे गे वर्चुअल बैठक म सामिल होईन। ए मउका म श्री बाबरा ह बतईन कि छत्तीसगढ़ के सबो रासन दुकान मन म उपभोक्ता मनके सिकायत बर खाद्य आयोग डहार ले संपर्क नंबर चस्पा कराय जात हे। ओमन बतईन कि आयोग के नवा वेबसाइट बनाय गेहे। एखर माध्यम ले आॅनलाईन सिकायत अउ अपील दर्ज कराय के सुविधा दे जाथे। ओमन यहू बतईन कि राज्य के सबले जादा कुपोषणग्रस्त कोंडागांव जिला म पाछु महीना ले फोर्टीफाइड चावल वितरण योजना चालू करे गेहे।