प्रधानमंत्री सर्वदलीय-बैठक
प्रधानमंत्री नरेन्द्र मोदी ह केहे हे कि अवइया कुछ सप्ताह म भारत म कोरोना महामारी ले बचाव बर टीका उपलब्ध हो जही। महामारी के बारे म वर्चुअल सर्वदलीय बैठक म आज श्री मोदी ह किहीन हे कि भारतीय वैज्ञानिक मन ल पूरा भरोसा हे कि अवइया दू हफ्ता म ओमन कोरोना महामारी बर टीका के विकास कर लीही। ओमन बतईन कि देस म अभी महामारी के आठ ठिन संभावित टीका ह विकास परीक्षण के कतकोन चरण म हे। अनुसंधान वैज्ञानिक मन ले टीका ल मंजूरी मिले के बाद ही टीकाकरण कारीकरम सुरू करे जाही।
श्री मोदी ह बतईन कि देस म सबले पहिली स्वास्थ्य कर्मी अउ महामारी ले निपटे म लगे अगवइया पंक्ति के योद्धा मन ल टीका लगाय जाही। ओमन बतईन कि टीकाकरण कारीकरम के विस्तृत प्राथमिकता सूची राज्य अउ केन्द्रसासित प्रदेस के सहयोग ले तैयार करे जाही। प्रधानमंत्री ह किहीन हे कि टीका के मूल्य राज्य सरकार के परामर्स ले तय करे जाही अउ आम लोगन के स्वास्थ्य ल सर्वोच्च प्राथमिकता दे जाही। तब तक ओमन जम्मों झन ले कोरोना वायरस ले बचाव के जम्मों ऐहतियात बरते के सुझाव देहे।
मुख्यमंत्री-लोकार्पण
मुख्यमंत्री भूपेश बघेल ह आज जशपुर जिला के प्रवास के बेरा रणजीता स्टेडियम म आयोजित कारीकरम म सात सौ बयानवे करोड़ रूपिया ले जादा के लागत के एक सौ छियानवे विकास कार्य के भूमिपूजन अउ लोकार्पण करीन। एमा चैसठ सड़क निर्माण काम घलो सामिल हे।
उहें, मुख्यमंत्री ह नल-जल योजना, सोलर सिंचाई पंप, सोलर होम लाइट अउ सोलर प्लांट स्थापना कार्य के घलो लोकार्पण करीन। श्री बघेल ह आज जशपुर म स्वामी आत्मानंद उत्कृष्ट अंग्रेजी माध्यम स्कूल के निरीक्षण करीन अउ लइका मन ले रूबरू होके ओमन ल आगू बाढ़े बर प्रोत्साहित करीन।
मुख्यमंत्री काली पांच दिसंबर के जशपुर अउ बिलासपुर जिला म राखे गे कतकोन कारीकरम सामिल होही। इही बेरा ओमन जशपुर के गमरिया धान खरीदी केन्द्र अउ गौठान के निरीक्षण करही। उहें, श्री बघेल ह बिलासपुर म राखे गे तिरालीसवां नाचा महोत्सव म घलो सामिल होही।
हाफ बिजली बिल योजना
राज्य सरकार के हाफ बिजली बिल योजना ले प्रदेस के घरेलू बिजली उपभोक्ता मन ल कतकोन राहत मिलही। ए योजना म अब तक अड़तीस लाख बयालीस हजार ले जादा उपभोक्ता मन ल एक हजार तीन सौ छत्तीस करोड़ रूपिया के सब्सिडी दे गेहे। योजना म बिजली उपभोक्ता मन ल हर महीना चार सौ यूनिट तक बिजली खपत म पचास प्रतिसत तक के छूट के पात्रता दे जावत हे।
खबर हे कि प्रदेस म हाफ बिजली बिल योजना एक मार्च दू हजार उन्नीस ले प्रारंभ करे गे रिहीस। एखर लाभ बीपीएल अउ दूसर घरेलू श्रेणी के बिजली उपभोक्ता मन ल मिलत हे।
माओवादी-मुठभेड़
बीजापुर जिला म आज सुरक्षा बल के संग होय मुठभेड़ म एक झिन माओवादी कमांडर मारे गीस। जिला पुलिस अधीक्षक ह घटना के पुष्टि करत बताय हे कि डिस्ट्रिक्ट रिजर्व गार्ड-डीआरजी के टीम ह तलाशी अभियान म निकले रिहीस। ए बेरा मिरतुर थाना क्षेत्र के हकवा के जंगल म माओवादी मन ह सुरक्षा बल उपर फायरिंग सुरू कर दीस। जवान मन डहार ले करे गे जवाबी कार्रवाई म एक झिन मिलिशिया प्लाटून कमांडर मारे गीस। जे ह दू दिन पहिली गोंगला म होय ग्रामीण के हत्या के संघरा गंगालूर, मिरतुर अउ भैरमगढ़ थाना क्षेत्र म होय माओवादी घटना म सामिल रिहीस। मुठभेड़ के बाद घटनास्थल के तलासी के बेरा सुरक्षा बल ह माओवादी के लास के अलावा हथियार, पिट्ठू अउ दैनिक उपयोग के सामग्री बरामद करे हे।
धान खरीदी
मुख्यमंत्री भूपेश बघेल ह केहे हे कि कोरोना संक्रमण के सेती प्रदेस म धान खरीदी प्रभावित नइ होही। रायगढ़ म आज पत्रकार मन ले चरचा करत किहीन कि प्रदेस म दू हजार अड़तालीस सोसायटी के माध्यम ले धान खरीदी करे जावत हे। बारदाना के कमी झन होय, तेखर बर केन्द्र सरकार ले चार लाख गठान के मांग करे गे रिहीस। फेर, एक लाख तैंतालीस हजार गठान देके सहमति बन पाईस, ओखर सेती लास्टिक के बोरी के घलो प्रयोग करे जावत हे।
इही बीच, प्रदेस म समर्थन मूल्य म चलत धान खरीदी के तीसरइया दिन काली तक चार लाख दस हजार मीटरिक टन ले जादा धान के खरीदी करे जा चुके हे। एखर एवज म राज्य के तकरीबन चालीस हजार किसान मन ल दू सौ उनचालीस करोड़ रूपिया के भुगतान सोझे ओखर खाता म करे गेहे। महासमुंद जिला म काली सबले जादा इकचालीस हजार मीटरिक टन ले जादा अउ दंतेवाड़ा जिला म सबसे कम छियानवे मीटरिक टन धान खरीदी करे गीस।
उहें, प्रदेस म न्यूनतम समर्थन मूल्य म धान बेचइया किसान मनके संख्या चैरानवे प्रतिसत ले जादा हो चुके हे। पाछु दू साल म प्रदेस म खेती के रकबा म घलो बढ़ोतरी होय हे। प्रदेस म बछर दू हजार सत्रह तक छिहत्तर प्रतिसत किसान न्यूनतम समर्थन मूल्य म धान बेचत रिहीस। अब ए आंकड़ा चैरानवे दशमलव दू प्रतिसत पहुंच गेहे। ए बछर धान बेचे बर दू लाख अड़तालीस हजार नवा किसान मन पंजीयन कराय हे।
इही बीच, राज्य के सीमावर्ती जिला म धान के अवैध परिवहन ल रोके बर लगातार निगरानी करे जावत हे। खाद्य मंत्री अमरजीत भगत ह आज सरगुजा जिला के ग्राम दरिमा, करजी अउ कर्रा म उपार्जन केन्द्र के निरीक्षण करीन। ए बेरा ओमन बने बेवस्था अउ सोसल डिस्टेसिंग के पालन करे के बार किहीन।
प्लेस आॅफ शेफ्टी
राजधानी रईपुर के माना कैम्प म बाल अपराधी मन ल रखे बर प्लेस आॅफ सेफ्टी यानि सासकीय सुरक्षित स्थान बनाय जाही। एखर भूमिपूजन काली महिला अउ बाल विकास मंत्री अनिला भेंडिया ह करीन। चैदह हजार चार सौ तिरासी वर्गफीट क्षेत्र म एक करोड़ तेरह लाख रूपिया के लागत ले बनइया प्लेस आॅफ सेफ्टी म पच्चीस लइका मन ल राखे जा सकही।
खबर हे कि केन्द्र प्रवर्तित एकीकृत बाल संरक्षण योजना म एखर निर्माण करे जावत हे। इहां लइका मनके काउंसलिग करके उंखर सुधार अउ पुनर्वास के उपाय करे जाही।
वर्चुअल-मैराथन
राज्य सरकार के दू बछर पूरा होय के मउका म अवइया तेरह दिसंबर के प्रदेस म वर्चुअल मैराथन के आयोजन करे जाही। मैराथन के बेरा कोरोना संक्रमण के दिसा-निरदेस के पालन करत प्रतिभागी ल कोनों भी जगह म समूह म सकलाना नइ हे। प्रतिभागी मन घर म, गार्डन म, मैदान म, सड़क या दूसर सुरक्षित जगह म सोसल डिस्टेंसिंग के पालन करत दउड़त अपन बीस ले तीस सेकेंड के वीडियो या फोटो हैशटैग करके फेसबुक, ट्वीटर अउ इंस्टाग्राम जइसे सोशल मीडिया म तेरह दिसंबर तक बिहनिया छह ले ग्यारह बजे तक डाउनलोड कर सकत हे। एखर बर आॅनलाईन पंजीयन चार ले दस दिसंबर तक खेल अउ युवा कल्याण विभाग अउ जनसंपर्क विभाग के वेबसाइट म करे जा सकत हे।
नौसेना-दिवस
आज नौसेना दिवस हे। ए दिन ल भारतीय नौसेना के उपलब्धि अउ महत्वपूर्ण भूमिका डहार धियान देवाय बर हर बछर चार दिसंबर के मनाय जाथे। बछर उन्नीस सौ इकहत्तर म आजे के दिन भारतीय नौसेना ह आॅपरेशन ट्राईडेंट के बेरा पीएनएस खैबर के संघरा पाकिस्तानी नौसेना के चार ठिन पोत ल डुबा दे रिहीन। जेखर ले सैकड़ों पाकिस्तानी नौसैनिक मारे गे रिहीस।
प्रधानमंत्री नरेन्द्र मोदी अउ सूचना प्रसारण मंत्री प्रकाश जावड़ेकर ह नौसेना दिवस के बेरा म जम्मों नौसैनिक अउ उंखर परिवार ल सुभकामना देहे।
संस्कृत विद्यामड्लम सम्मान
छत्तीसगढ़ संस्कृत विद्यामड्लम डहार ले ए बछर संस्कृत भासा के क्षेत्र म उल्लेखनीय काम करइया संस्कृत विद्वान मन ल सम्मानित करे जाही। एमा महर्षि वाल्मिकी सम्मान, श्रृंगीऋषि सम्मान, लोमस ऋषि सम्मान, कौशिल्या सम्मान अउ महर्षि वेदव्यास सम्मान प्रदान करे जाही। एखर बर संस्कृत विद्यामड्लम डहार ले बीस दिसंबर तक प्रविष्ठि मंगाय गेहे। इच्छुक विद्वान अउ संस्था अपन आवेदन रईपुर के छत्तीसगढ़ संस्कृत विद्यामड्लम कार्यालय म भेज सकत हे।