मुख्यमंत्री पत्र
मुख्यमंत्री भूपेश बघेल ह प्रधानमंत्री नरेंद्र मोदी ल पत्र लिखके छत्तीसगढ़ ल प्राथमिकता के आधार म निशुल्क कोविड-नाइंटिन के टीका उपलब्ध कराय के अनुरोध करीन। उंहें प्रधानमंत्री ल लिखे एक आने पत्र म मुख्यमंत्री ह प्रदेश के सरप्लस धान के एथेनाल उत्पादन करे बर केंद्र सरकार ले अनुमति मांगे हे।
निजी मेडिकल काॅलेज प्रवेश
प्रदेश के दूरिहा जगा के नीट पास करइया विद्यार्थी जेमन कोनो कारण ले काउंसिलिंग बर तय करे गे बेरा म अपन पंजीयन नइ करा सके हे। ओमन ल निजी काॅलेज मन म पेमेंट सीट म प्रवेश दे जाही। ये दाखिला एमबीबीएस बर निजी काॅलेज मनके पेमेंट सीट म राज्य सरकार के खर्च म करे जाही।
मुख्यमंत्री भूपेश बघेल ह प्रदेश के दूरिहा के आदिवासी अंचल के अइसन सबो लइका मनके एमबीबीएस म दाखिला बर जिला प्रशासन ल जरूरी कार्रवाई करे के निर्देश दीन। मुख्यमंत्री के निर्देश के बाद कलेक्टर दंतेवाड़ा डहार ले ये लईका मन ल निजी काॅलेज मन म दाखिला देवाय के कार्रवाई करे जात हे।
यदि एमा ले कोनो लईका कटआॅफ के बाद प्रवेश बर पात्र पाये जावत हे त ओमन ल घलो निजी काॅलेज मनके पेमेंट सीट बर दाखिला दिलवाय जाही अउ एखर खर्चा राज्य सरकार करही।
जानबा के मुताबिक दंतेवाड़ा जिला के सत्ताईस विद्यार्थी जेमन नीट पास कर लेहे, फेर नेटवर्क प्राब्लम के चलत पहिली काउंसिलिंग म ओखर मनके रजिस्ट्रेशन नइ हो पाय रीहिस। जिला प्रशासन ह ए विद्यार्थी मनके पंजीयन कराय के प्रयास करीन। फेर ये विद्यार्थी मन प्रवेश नइ पा सकीस। राज्य म पंजीयन बर दूसरा अवसर नइ होय के सेती उंखर पंजीयन नइ कराय जा सकीस।
गृहमंत्री बैठक
प्रदेश के गृहमंत्री ताम्रध्वज साहू ह माओवादी प्रभावित इलाका मन म तैनात जवान मन ल तनाव मुक्त होके काम करे के सलाह दीन हे। राजधानी रायपुर म गृह विभाग ले जुड़े अधिकारी मनके बइठका के दउरान गृहमंत्री ह पाछू तीन दिन म प्रदेश के जवान मन डहार ले करे जात आत्महत्या के प्रकरण के जानकारी लीन। ओमन ह वरिष्ठ अधिकारी मनले कीहिन कि शिविर म खेलकूद के आयोजन, मेडिकल चेकअप अउ जवान मनके लगातार काउंसिलिंग करत रहय। ओमन ह स्पंदन कार्यक्रम के तहत सबो जवान मनके समस्या के निराकरण करे के निर्देश पुलिस के वरिष्ठ अधिकारी मन ल दीन।
ए बइठका म अपर मुख्य सचिव गृह सुब्रत साहू, डीजीपी डी.एम. अवस्थी समेत आने पुलिस अधिकारी मन घलो उपस्थित रीहिन।
माओवादी वारदात
सुकमा जिला म सुरक्षा बल मन ह टिफिन बम, नक्सली वर्दी अउ पिट्ठू समेत कतकोन माओवादी सामान बरामद करीन।
पुलिस अधीक्षक कन्हैया लाल ध्रुव ह बताइन कि पाछू दिन मुलेर के जंगल म सीआरपीएफ, एसटीएफ अउ डीआरजी के जवान सर्चिंग म निकले रीहिस। ए दउरान जवान मनल देखके माओवादी जंगल के फायदा उठाके भाग गीन। उंहें घटना के जगा ले सुरक्षा बल मन ह माओवादी सामान बरामद करे हे।
केंद्रीय कृषि मंत्री
केंद्रीय कृषि मंत्री नरेंद्र सिंह तोमर ह कीहिन हे कि सरकार किसान मनके हित के सुरक्षा बर हमेशा वचनबद्ध हे अउ उंखर कल्याण के मुद्दा म बातचीत के रास्ता घलो खोले हे। कृषि मंत्री नरेंद्र सिंह तोमर, वाणिज्य मंत्री पीयूष गोयल अउ वाणिज्य राज्य मंत्री सोम प्रकाश ह नई दिल्ली के विज्ञान भवन म काली किसान संगठन मनके प्रतिनिधि मन संग मुलाकात करीन। श्री तोमर ह चर्चा के दउरान एक विशेषज्ञ समिति बनाय केप्रस्ताव राखीन जेखर ले किसान मनके मुद्दा ल आपसी सहमति ले सुलझाय जा सके।
उंहें, केंद्रीय मंत्री प्रकाश जावड़ेकर ह कीहिन हे कि किसान मनके कल्याण सरकार के पहिली प्राथमिकता हे। एक ट्वीट म ओमन कीहिन कि प्रधानमंत्री नरेंद्र मोदी के अगवाई म एनडीए सरकार ह ये सुनिश्चित करे हे कि किसान मन ल उंखर उपज के उचित कीमत मिले। श्री जावड़ेकर ह कीहिन कि हर बछर कृषि उपज के न्यूनतम समर्थन मूल्य बढ़ाये जावत हे।
धान खरीदी-
प्रदेस म समर्थन मूल्य म काली पहिली दिन तीस हजार ले जादा किसान मनले अंठानवे हजार नौ सौ अड़सठ मीट्रिक टन के धान खरीदे गीस। ए दउरान महासमुंद जिला म सबले जादा बारा हजार मीट्रिक टन धान अउ सबले कम दंतेवाड़ा जिला म इक्कीस मीट्रिक टन धान के खरीदी करे गीस। धान खरीदी के दउरान कोरोना संक्रमण ले सुरक्षा बर जारी दिशा-निर्देश के पालन करे जावत हे। राज्य सरकार ह ए बछर पहिली लघु किसान मनके धान खरीदी करे के निर्णय लेहे।
उंहें दुर्ग के संभागायुक्त टी.सी. महावर अउ आई.जी. विवेकानंद सिन्हा ह छुईखदान विकासखंड के साल्हेवारा चेक पोस्ट के निरीक्षण करीन। ओमन ह पड़ोसी राज्य मनले अवैध रूप ले धान परिवहन करइया वाहन मनके खिलाफ कार्रवाई करे के निर्देश अधिकारी मन ल दीन। श्री महावर ह खाद्य अधिकारी मनले समिति मन म बारदाना के उपलब्धता अउ टोकन संबंधी जानकारी घलो लीन ।
एति कबीरधाम जिला कलेक्टर रमेश कुमार शर्मा अउ पुलिस अधीक्षक शलभ सिन्हा ह पाछू रतिहा चिल्फी के अंतर्राज्यीय बैरियर के निरीक्षण करीन। ओमन ह बैरियर म तैनात कर्मचारी मन ल धान के अवैध परिवहन करइया वाहन मन उपर निगरानी राखे के निर्देश दीन। चिल्फी म बाईस चेक पोस्ट बनाय गेहे।
ओति राजनांदगंाव जिला म तहसीलदार ह धौराभाटा के कोचिया के घर म दबिश देके एक सौ छियासी बोरा धान जब्त करे हे। ए धान ल किसान के पर्चा म बेचे के तियारी करे जात रीहिस।
ए बीच भारतीय जनता पार्टी के प्रदेश प्रवक्ता अउ पूर्व मंत्री राजेश मूणत ह राज्य सरकार ल सवाल करीन हे कि पाछू बछर खरीदे गे धान के चैथा किश्त अउ दू बछर के बकाया चैदा हजार करोड़ रूपिया के भुगतान किसान मन ल कब तक करे जाही। श्री मूणत ह राज्य सरकार उपर किसान मनके संग भेदभाव बरते के आरोप लगाइन।
दुर्घटना
कोंडागंाव जिला म पाछू रतिहा एक चारपहिया गाड़ी अउ ट्रक के बीच होय टक्कर म एके परिवार के चार लोगन के मउत होगे, उंहें एक झिन आने मनखे गंभीर रूप ले घायल होगे, जेला अस्पताल म भर्ती कराय गेहे। ये सबो झन मन कोंडागंाव जिला के ग्राम लंजोड़ा म एक शाादी समारोह म शामिल होके घर लहुटत रीहिन।
पुलिस ले मिले जानबा के मुताबिक ये हादसा राष्ट्रीय राजमार्ग तीस के तीर जोबा गंाव म होइस। ये जम्मों झन बीजापुर के रहइया रीहिन।
इही जिला के केशकाल घाट म एक ठिन ट्रेलर के पलटे ले छै घंटा तक अवई जवई बाधित रीहिस। एखर ले दूनों डहार ले गाड़ी के लाईन लग गीस। पुलिस अउ जिला प्रशासन के पहल म आवागमन सुरू हो सकीस।
संक्षिप्त समाचार
अउ अब थोरकुन समाचार सार म-
– दुर्ग जिला म भिलाई स्थित आईआईटी के शैक्षणिक क्षेत्र इंदौर के भूमि पूजन मुख्यमंत्री भूपेश बघेल ह करीन।
– छत्तीसगढ़ उच्च न्यायालय बिलासपुर के निर्देश म कोविड-नाइंटिन के संदर्भ म कैदी मनके पैरोल अवधि दू हप्ता बर बढ़ा दे गेहे। प्रदेश म अभी एक हजार तीन सौ अड़तालिस बंदी मन पैरोल म हे।
– बस्तर जिला पुलिस हशहर के आने आने एटीएम मशीन मन म पाछू तीन महीना के दउरान करोड़ रूपिया गायब करने वाला दू झिन आरोपी मन ल गिरप्तार करे हे। इंखर तीर ले दू लाख रूपिया घलो बरामद करे गेहे।
– जांजगीर चंापा जिला के देवगांव म मनरेगा काम म अड़तालिस लाख के गड़बड़ी करे के मामला म छै साल ले फरार एक डाटा एंट्री आॅपरेटर ल पुलिस ह गिरप्तार करे हे। ए मामला म तत्कालीन मुख्य कार्यपालन अधिकारी संग आठ लोगन मनके ख्लिाफ एफआईआर दर्ज करे गे रीहिस।
– जांजगीर-चंापा जिला के कल्याणपुर गांव म एक युवक के नहर म गिरके मउत हो गीस । वो ह लटिया गांव के रइहया रीहिस।
– राजनंादगंाव जिला म मनरेगा के तहत संविदा म काम करइया रोजगार सहायक मन ह नियमितिकरण के मांग ल लेके धरना-प्रदर्शन करीन अउ मुख्यमंत्री के नाम ज्ञापन एसडीएम ल सौंपीन।
अउ
– जांजगीर-चंापा जिला के अकलतरा क्षेत्र के पोड़ीदल्हा गांव म घूमत मगरमच्छ ल वन विभाग के टीम ह क्रोक्रोडायल पार्क पहुुंचाइन।