धान खरीदी-01
प्रदेसभर म समर्थन मूल्य म धान खरीदी आज ले सुरू होगे हे। राज्य सासन डहार ले ए बछर समर्थन मूल्य म धान अउ मक्का खरीदी बर दिसा-निरदेस जारी कर दे गेहे। केन्द्र सरकार डहार ले निर्धारित समर्थन मूल्य म काॅमन धान अट्ठारह सौ अड़सठ रूपिया हरेक कुंटल अउ ग्रेड-ए धान अट्ठारह सौ अट्ठायसी रूपिया हरेक कुुंटल अउ मक्का साढ़े अट्ठारह सौ रूपिया हरेक कुंटल के दर ले खरीदे जाही। धान खरीदी एक दिसंबर से इकतीस जनवरी तक चलही। उहें, मक्का के खरीदी एक दिसंबर ले इकतीस मई तक के करे जाही। बीज उत्पादक किसान मन ले समर्थन मूल्य म धान खरीदी एक मार्च ले इकतीस मई तक चुने गे खरीदी केन्द्र मन म करे जाही। समिति डहार ले सोमवार ले सुक्रवार तक धान के खरीदी करे जाही। उहें, हरेक सनिचर के खरीदे गे धान के मात्रा, बारदाना के उपयोग अउ समिति ल धान उपार्जन बर मिले रासि के व्यय के पुष्टि धान खरीदी बर बनाय गे साॅफ्टवेयर म जरूरी रूप ले करे जाही।
ए बछर प्रदेस के किसान ले हरेक एकड़ पाछु पन्द्रह कुंटल धान लिकिंग समेत खरीदी करे जाही। उहें, दस कुंटल हरेक एकड़ पाछु लिकिंग समेत मक्का खरीदी करे जाही। समर्थन मूल्य म धान अउ मक्का खरीदी प्राथमिक कृषि साख समिति अउ लैम्पस के माध्यम ले होही। अधिया, रेगहा के माध्यम ले उत्पादित धान, उपार्जन केन्द्र मन म बेचे बर लवइया किसान मन ल भूईंया के ऋण पुस्तिका घलो संग म लाना होही। धान खरीदी के आखिरी दिन पर्ची जारी नइ करे जाही।
छत्तीसगढ़ राज्य सहकारी विपणन संघ डहार ले समिति मन ल धान खरीदी बर पहिली ले पइसा दे जाही। समिति ल दे गे पइसा सीधा सहकारी बैंक म उंखर खाता म जमा करे जाही।
धान खरीदी-02
एखर पहिली, खाद्य मंत्री अमरजीत भगत ह रईपुर जिला के धरसीवां विकासखंड के कुम्हारी म धान खरीदी के सुरूवात करीन। ए मउका म श्री भगत ह किहीन कि राज्य के दू हजार तीन सौ पांच खरीदी केन्द्र मन म धान खरीदी सुरू होगे हे। खरीदी केन्द्र मन म कोरोना संक्रमण ले बचाव बर सेनेटाईजर, मास्क अउ हाथ धोय के बेवस्था करे गेहे। ए बछर प्रदेस म इक्कीस लाख उनतीस हजार ले जादा किसान मन ह धान बेचे बर पंजीयन कराय हे। पाछु बछर करीबन उन्नीस लाख पचपन हजार किसान मन ह पंजीयन कराय रिहीन। धान खरीदी के काम इकतीस जनवरी तक चलही।
रईपुर जिला के कुम्हारी उपार्जन केन्द्र के अध्यक्ष ह बतईन कि ए खरीदी केन्द्र म चार गांव के पांच सौ ग्यारह किसान धान बेचे बर पंजीयन कराय हे। इहां हरेक दिन पांच कुंटल धान खरीदे जाही।
ऐति, बालोद जिला के एक सौ छब्बीस खरीदी केन्द्र मन म घलो आज ले धान खरीदी सुरू होगे हे। जिला कलेक्टर जनमेजय मोहबे ह आज औराभाटा स्थित धान खरीदी केन्द्र के निरीक्षण करीन। कलेक्टर ह कोरोना महामारी ल देखत कोरोना गाइडलाइन के जरूरी रूप ले पालन करे बर किहीन। जिला म किसान मनके सुविधा ल देखत पाछु बछर के तुलना म ए बछर सोलह उपरहा धान खरीदी केन्द्र बनाय गेहे। उहें, बारदाना के कमी ल देखत पुराना बारदाना के इस्तेमाल करे जावत हे।
धान खरीदी-03
ओति, जांजगीर-चांपा जिला म घलो ए बछर धान खरीदी बर इक्कीस नवा केन्द्र बनाय गेहे, एला मिलाके कुल दू सौ तीन केन्द्र मन म धान के खरीदी करे जाही। ए बछर जिला म एक लाख सत्यासी हजार ले जादा किसान मन ह धान बेचे बर पंजीयन कराय हे। जिला म ए घांव अस्सी लाख कुंटल धान खरीदे के लक्ष्य राखे गेहे।
इही बीच, धान खरीदी के पहिली दिन महासमुंद जिला के टेमरी गांव म दू सौ पचहत्तर कट्टा अवैध धान जब्त करे गेहे। ए धान ओड़िसा ले लाय जावत रिहीस। जिला कलेक्टर कार्तिकेय गोयल ह अवैध धान खरीदी उपर सख्त कार्रवाई करे के निरदेस दीन हे। जिला म धान के अवैध परिवहन ल रोके बर बिसेस जांच दल गठित करे गेहे।
प्रधानमंत्री-कृषि सुधार
प्रधानमंत्री नरेन्द्र मोदी ह देस के किसान मन ल आश्वासन दीन हे कि नवा कृषि संबंधी सुधार उंखर विकास बर लाय गेहे। उत्तरप्रदेश म अपन संसदीय क्षेत्र वाराणसी म काली एक ठिन सभा म ओमन किहीन कि सरकार ह न सिरिफ किसान मन ल नवा बाजार के मउका देना चाहत हे, बल्कि मंडी बेवस्था ल घलो मजबूत करना चाहत हे। प्रधानमंत्री ह किहीन कि नवा कृषि सुधार ह किसान मन ल नवा मउका अउ नवा कानूनी सुरक्षा देहे। फेर कहूं जुन्ना प्रणाली ल चलाना चाहीे त वहू मौजूद हे।
बीएसएफ-स्थापना दिवस
सीमा सुरक्षा बल-बीएसएफ आज अपन छप्पनवां स्थापना दिवस मनावत हे। बछर उन्नीस सौ पैंसठ म भारत-पाकिस्तान युद्ध के तुरते बाद संसद म कानून बनाके आज के दिन एखर स्थापना करे गे रिहीस।
प्रधानमंत्री नरेन्द्र मोदी ह बीएसएफ के स्थापना दिवस म उंखर जम्मों कार्मिक अउ उंखर परिवार वाले मन ल सुभकामना दीन।
ऐति, छत्तीसगढ़ म घलो बीएसएफ के स्थापना दिवस म कतकोन कारीकरम आयोजित करे जात हे। दुरूग जिला म रिसाली स्थित महानिरीक्षक कार्यालय म राखे गे कारीकरम म बीएसएफ के सीमांत अउ क्षेत्रीय मुख्यालय के अधिकारी सामिल होईन।
विश्व एड्स दिवस
आज विश्व एड्स दिवय हरय। ए दिन एड्स के बारे म लोगन मन ल जागरूक करे बर मनाय जाथे। ए दिन लोगन मन ल एच.आई.वी. के खिलाफ एकजुट होय अउ ए वायरस ले पीड़ित लोगन मनके मदद करे बर प्रेरित करथे। भारत ह बछर उन्नीस सौ बयानवे म राष्ट्रीय एड्स नियंत्रण कारीकरम के सुरूवात करे रिहीन।
स्वास्थ्य मंत्रालय-दिशा/निर्देश
केन्द्रीय स्वास्थ्य मंत्रालय ह बाजार मन बर कोरोना के नवा दिसा-निरदेस जारी करे हे। एमा मास्क नइ पहिरे म जुर्माना अउ कमती बेरा म खरीदीदारी करे म छूट देके के प्रावधान सामिल हे। मंत्रालय के मानक संचालक प्रक्रिया म केहे गेहे कि कोविड कंटेनमेंट क्षेत्र म बाजार बंद रइही।
दिसा-निरदेस म सुझाव दे गेहे कि कहूं क्षेत्र म कोरोना वायरस के मामला के संख्या बाढ़त हे, त उहां बाजार बंद करा दे जाही। खाय-पीये के जिनीस के संगेसंग घरेलू सामान ल आॅनलाइन मंगाय के बात म जोर दे गेहे। बाजार संघ मन ल बाजार म कोरोना रोके के उपाय करे बर बने कदम उठाय के बात घलो केहे गेहे।
माओवादी समाचार
दंतेवाड़ा जिला म आज माओवादी मन ह सरपंच के पति के हत्या कर दीन। पुलिस अधीक्षक अभिषेक पल्लव ह बतईन कि ए घटना जिला के बारसूर थाना क्षेत्र के हरय, जिहां माओवादी मन ह हांदावाड़ा के सरपंच के पति के हथियार ले हत्या कर दीन।
ऐति, बीजापुर जिला के बासागुड़ा थाना क्षेत्र म माओवादी मन ह आईईडी विस्फोट करके चारपहिया गाड़ी ल उड़ा दीन। ए घटना म दू ग्रामीण घायल होगे। घायल मन ल अस्पताल म भर्ती कराय गेहे। जिला के पुलिस अधीक्षक कमलोचन कश्यप ह घटना के पुष्टि करत बतईन कि ए घटना बासागुड़ा-तर्रेम के बीच राजपेटा के तीर के हरय।
उहें, इही जिला म आज सुरक्षा बल मन ह जांगला थाना क्षेत्र ले एक झिन माओवादी ल गिरफ्तार करे हे। ए माओवादी मन उपर हत्या, आगजनी, विस्फोट जइसन बड़े घटना म सामिल रेहे के आरोप हे।
किरणमयी नायक-पत्रकारवार्ता
छत्तीसगढ़ राज्य महिला आयोग के अध्यक्ष डाॅक्टर किरणमयी नायक ह राजनांदगांव म आगू आय मानव तस्करी मामला म संगठित गिरोह होय के आसंका जताईन हे। ए मामला म डाॅक्टर नायक ह पुलिस महानिदेशक डी.एम. अवस्थी ले जांच के मांग करीन हे। आज रईपुर म पत्रकार मन ले गोठबात करत ओमन किहीन कि हरेक थाना म तीस बछर तक के गंवाय नोनी अउ माईलोगिन मनके मामला म जांच करे जाय। ओमन किहीन कि हरेक थाना म माईलोगिन मन बर जागरूकता अभियान चलाय जाय।
दुर्ग-नशा मुक्ति अभियान
दुरूग जिला म पुलिस डहार ले नसा मुक्ति बर अभियान चलाय जावत हे। इही कड़ी म आज जिला के सिकोलाभाटा म ‘‘जियो खुलकर‘‘ नसा मुक्ति अभियान के तहत बइठका राखे गे रिहीस। बइठका म जिला म चलत नसा के अवैध कारोबार ल रोके के संगेसंग नसा के गिरफ्त म फंसे लोगन मन ल नसा मुक्त करे के दिसा म गोठबात करे गीस। ए अभियान दुरूग रेंज के पुलिस महानिरीक्षक विवेकानंद सिन्हा अउ पुलिस अधीक्षक प्रशांत ठाकुर के मार्गदर्शन म चलाय जावत हे।