आज दिनभर के खबर ल अपन गुरतुर छत्तीसगढ़ी भाखा म पढ़व

धान खरीदी
प्रदेस म समर्थन मूल्य म धान खरीदी अभियान काली ले सुरू होही। राज्य सरकार ह धान बिसाय बर जम्मों तियारी पूरा कर लेहे। मुख्यमंत्री ह सीमावर्ती राज्य ले धान लाय म कड़ाई ले रोक लगाय के निरदेस दीन हे। एखर बर खरीदी केन्द्र म निगरानी अउ चेक पोस्ट लगाके जांच करे बर किहीन हे। मुख्यमंत्री ह निरदेस दीन कि राज्य के भीतरी एक जिला ले दिगर जिला म धान लाय म किसान मन ल परसान झन करे जाय।
प्रदेस म धान उपार्जन बर चार लाख पचहत्तर हजार गठान बारदाना के जरूरत होही। केन्द्र सरकार कोति ले छत्तीसगढ़ ल एक लाख तैंतालीस हजार बारदाना के आपूर्ति कराय जाय के मंजूरी दे गेहे। राज्य के दू हजार तीन सौ पांच खरीदी केन्द्र म काली ले समर्थन मूल्य म धान बिसाय जाही। एसो दू सौ संतावन नवा धान खरीदी केन्द्र बनाय गेहे।
धान खरीदी बर किसान मन ल टोकन बांटे के काम चलत हे। रईपुर, बिलासपुर समेत जम्मों जिला म टोकन ले खातिर किसान मनके भीड़ हवय।
इही बीच, कोंडागांव जिला के विश्रामपुरी क्षेत्र म पुलिस अउ राजस्व विभाग के संयुक्त टीम ह अवैध रूप ले धान परिवहन के मामला म धान अउ मक्का ले लदे एक ठिन ट्रेक्टर ल पकड़ीन हे। बड़े राजपुर ब्लाॅक के गमहरी गांव तीर ए कार्रवाई करे गीस। ए धान ओड़िसा ले लाय जात रिहीस हे। समर्थन मूल्य म धान खरीदी सुरू होय के पहिली राज्य सरकार के निरदेस म जम्मों जिला म अवैध रूप ले धान खरीदी के खिलाफ कार्रवाई चलत हे।
भाजपा-आरोप
दूसर कोति, भारतीय जनता पार्टी किसान मोर्चा के प्रदेस अध्यक्ष श्यामबिहारी जायसवाल ह राज्य सरकार उपर किसान विरोधी होय के आरोप लगाईन हे। ओमन किहीन कि प्रदेस सरकार ह गिरदावरी म किसान मनके भूईंया के रकबा कमती कर देहे, जेखर सेती किसान मन ल अपन पूरा उपज समर्थन कीमत म बेचे म परेसानी होही। श्री जायसवाल आज किसान मोर्चा के पदाधिकारी अउ कार्यकर्ता मनके बइठका ले बर राजनांदगांव पहुंचे रिहीन। ए बइठका म किसान मोर्चा के प्रदेस अध्यक्ष गौरीशंकर श्रीवास समेत आने पदाधिकारी मौजूद रिहीन।
अमिताभ जैन-मुख्य सचिव
भारतीय प्रशासनिक सेवा के अधिकारी अमिताभ जैन छत्तीसगढ़ के नवा मुख्य सचिव होही। मुख्य सचिव आर.पी. मंडल के रिटायर होय के बाद राज्य सरकार ह श्री जैन ल ए जिम्मेवारी सौंपे हे। श्री जैन उन्नीस सौ नवासी बैच के अधिकारी हे। श्री जैन छत्तीसगढ़ के बालोद जिला के रहवइया हरय अउ उंखर पढ़ई घलो इहे ले होय हे। अभी श्री जैन तीर वित्त विभाग के जिम्मेवारी हवय।
ई श्रेणी पंजीयन
राज्य सरकार ह छत्तीसगढ़ के बेरोजगार युवक मन ल स्व-रोजगार ले जोड़े बर एक फइसला लेहे। एखर मुताबिक पहिली लोक निर्माण विभाग म लागू करे गे ई-श्रेणी पंजीयन प्रणाली ल अब राज्य सरकार के जम्मों निर्माण विभाग, निकाय, मंडल अउ बोर्ड म लागू करे के निरदेस दे गेहे। ए संबंध म मुख्यमंत्री ह प्रदेश के मुख्य सचिव ल निरदेस जारी करे हे। ए फइसला के लागू होय ले इहां के रहवइया बेरोजगार युवक मन ल ब्लाॅक स्तर म बीस लाख रूपिया तक के काम के ठेका मिल सकही। निर्माण काम के अनुबंध म बीस लाख रूपिया के काम म डिप्लोमा इंजीनियर अउ एक करोड़ रूपिया ले जादा के काम म स्नातक इंजीनियर मनके नियुक्ति जरूरी हे।
मुख्यमंत्री-बोधघाट परियोजना
मुख्यमंत्री भूपेश बघेल ह किहीन हे कि बोधघाट परियोजना के पुनर्वास नीति बस्तर के जनप्रतिनिधि किसान अउ डुबान प्रभावित लोगन संग गोठबात ले ही तैयार करे जाही। ए बात मुख्यमंत्री ह पाछु रतिहा रईपुर स्थित अपन निवास म बोधघाट बहुउद्देशीय सिंचई परियोजना के डुबान क्षेत्र ले प्रभावित लोगन के प्रतिनिधिमंडल ले गोठबात करत किहीन। ओमन भरोसा देवाईन कि इंद्रावती नंदियां के पानी के जादा ले जादा उपयोग बस्तर अंचल बर अउ किसान मनके बेहतरी खातिर करे बर ए परियोजना ल तियार करे गेहे। प्रतिनिधि मंडल सांसद दीपक बैच के अगुवई म मुख्यमंत्री ले भेंट करे बर पहुंचे रिहीन।
कोरोना समाचार/जागरूकता
प्रदेस म काली रतिहा तक कोरोना संक्रमित बारह सौ तिहत्तर नवा मरीज के पहिचान होय हे। एमा सबले जादा एक सौ तिरपन पाॅजिटिव मामला रईपुर जिला के हे। उहें, नारायणपुर अउ बीजापुर जिला म एक-एक मरीज मिले हे। अभी राज्यभर म बीस हजार ले जादा सक्रिय मामला हवय, जिखर इलाज आने-आने अस्पताल म होवत हे।
इही बीच, जाने-माने भजन गायक प्रभंजय चतुर्वेदी ह लोगन ले कोरोना ले बचाव बर जरूरी सावधानी राखे के अपील करीन हे।
भाजपा-अनुसूचित जाति आरोप
भाजपा अनुसूचित जाति मोर्चा के प्रदेस अध्यक्ष नवीन मारकंडे ह राज्य सरकार उपर अनुसूचित जाति वरग के संग अन्याय करे के आरोप लगाईन हे। ए बयान जारी करके ओमन किहीन कि प्रदेस म एसो गुरूघासी दास अलंकरण नइ देना अउ सोधपीठ ल बंद करे के संग गिरौधपुरी म विकास काम नइ कराना राज्य सरकार के अनुसूचित जन विरोधी मानसिकता ल बतावत हे।
गुरूनानक जयंती
सिक्ख पंथ के संस्थापक गुरूनानक देव जी के आज पांच सौ इंक्यानवां जंयती छत्तीसगढ़ समेत देसभर म उछाह के संग मनाय जात हे।
राष्ट्रपति रामनाथ कोविंद, उप राष्ट्रपति एम. वेकैंया नायडू, प्रधानमंत्री नरेन्द्र मोदी, छत्तीसगढ़ के राज्यपाल अनुसुईया उइके अउ मुख्यमंत्री भूपेश बघेल ह गुरूनानक जयंती म लोगन ल बधाई दीन हे।
उहें, आज कार्तिक पुन्नी हे। ए बेरा म श्रद्धालु मन आज भिनसरहा ले नंदियां म स्नान करके भगवान सिव के पूजापाठ करीन। फेर, कोरोना महामारी के सेती एसो मेला नइ लगाय गेहे। मुख्यमंत्री भूपेश बघेल ह आज बिहनिया कार्तिक पुन्नी के मउका म रईपुर के महादेवघाट पहुंच के खारून नंदियां म स्नान करके आरती अउ दीपदान करीन। मुख्यमंत्री ह ऐहतिहासिक हटकेश्वर महादेव मंदिर म पूजापाठ करके प्रदेस के विकास अउ जनता के सुख-समृति के कामना करीन।
संक्षिप्त समाचार
अउ अब थोरकुन समाचार सार म-– पंचायत अउ ग्रामीण विकास मंत्री टी.एस. सिंहदेव ह आकाशवाणी रईपुर के प्रसारित बिसेस कारीकरम ‘‘हमर ग्राम सभा‘‘ म राज्य सरकार के नीति, योजना अउ कारीकरम ले जुड़े श्रोता मनके सवाल के जुवाब दीन।- कबीरधाम जिला के पुलिस अधीक्षक शलभ कुमार सिन्हा ह बाजार-चारभाटा के प्रभारी उपनिरीक्षक समेत दू झिन आरक्षक ल अवैध रूप ले लेनदेन के मामला म मिले सिकईत के आधार म तत्काल प्रभाव ले निलंबित कर देहे।

– इही जिला म अपराधिक घटना म रोक लगाय अउ सामाजिक बुराई ल दुरिहा करे खातिर बिसेस जागरूकता अभियान चलाय जात हे। एखर बर जिला के पुलिस अधीक्षक ह अंजोर रथ ल रवाना करीन।

– बिलासपुर म तिरालीसवां राउत नाचा महोत्सव पांच दिसंबर ले सुरू होही। एमा भाग लेवइया नर्तक दल के सदस्य मनके कोरोना जांच कराय जाही। एखर बर स्वास्थ्य विभाग ह एक टीम गठित करे हे।
अउ
– रईपुर पुलिस ह नशा के कारोबार के खुलासा करत ए मामला म चार झिन आरोपी ल गिरफ्तार करे हे। आजाद चैक पुलिस के कार्रवाई म ए आरोपी मन तीर ले चार सौ नग ले जादा प्रतिबंधित कफ सिरफ बरामद करे गेहे।