प्रधानमंत्री-मुख्यमंत्री समीक्षा
प्रधानमंत्री नरेन्द्र मोदी ह आज राज्य अउ केन्द्रसासित प्रदेस के मुख्यमंत्री मनके संग कोरोना के स्थिति के समीक्षा करीन। वीडियो कान्फ्रेंसिंग के माध्यम ले ए बइठका म छत्तीसगढ़ के संगेसंग दिल्ली, राजस्थान, गुजरात, महाराष्ट्र अउ पश्चिम बंगाल के मुख्यमंत्री मन ह भाग लीन। केन्द्रीय गृह मंत्री अमित शाह, स्वास्थ्य मंत्री डाॅक्टर हर्षवर्धन के संगेसंग मंत्रिमंडल सचिव अउ स्वास्थ्य सचिव घलो ए बइठका म सामिल होईन।
ऐति, राजधानी रईपुर म मुख्यमंत्री ह अपन निवास कार्यालय ले वीडियो कान्फ्रेंसिंग के माध्यम ले ए बइठका म सामिल होईन। बइठका म कोरोना संक्रमण के रोकथाम अउ बचाव के उपाय के समीक्षा करे गीस। एखर अलावा अवइया बेरा म वैक्सीन लगाय बर तियारी उपर घलो गोठबात करे गीस।
मुख्यमंत्री ह बइठका म बतईन कि प्रदेस म कोरोना संक्रमण के स्थिति नियंत्रण म हवय। रोजेच तेईस हजार टेस्टिंग करे जात हे। गांव-गतौरी मन म पहिली कोरोना संक्रमण नइ रिहीस। बाद म थोरबहुत दिखत हे। मुख्यमंत्री ह बतईन कि अस्पताल मन म आॅक्सीजन के सुविधा वाले आईसीयू बैड के संख्या म बढ़ोतरी करे गेहे। जम्मों मेडिकल काॅलेज मन म आरटीपीसीआर जांच के सुविधा हवय। चार ठिन नवा लैब बनाय गेहे। पाछु अक्टूबर महीना के बाद कोरोना के नवा मामला म कमी आय हे।
बइठका म स्वास्थ्य मंत्री टी.एस. सिंहदेव, गृह मंत्री ताम्रध्वज साहू के संगेसंग मुख्य सचिव अउ पुलिस महानिदेसक घलो आय रिहीन।
कोरोना समाचार
प्रदेस म कोरोना संक्रमित मरीज मनके संख्या दू लाख पच्चीस हजार ल पार कर लेहे। काली प्रदेस म दू हजार इकसठ नवा मरीज के पुष्टि होय हे।
जशपुर जिला म कांसाबेल थाना के इक्कीस झिन पुलिसकर्मी कोरोना संक्रमित पाय गेहे। एमा दू झिन माईलोगिन घलो सामिल हे।
ऐति, कोरिया जिला के कोविड अस्पताल म पाछु आठ ले चैदह नवंबर के बीच कराय गे स्वास्थ्य संस्थावार कोविड पेशेंट फीडबैक रिपोर्ट म बढ़िया स्वास्थ्य सुविधा के आधार म पूरा प्रदेस म पहिली रैंक हासिल करे हे।
ओति, जांजगीर-चांपा जिला कलेक्टर ह मुख्य चिकित्सा अउ स्वास्थ्य अधिकारी ह किहीन हे कि कोरोना संक्रमित मरीज मन ल होम आइसोलेशन म भेजे अउ उंखर इलाज के बारे म स्वास्थ्य विभाग के नवा गाइड-लाइन के पालन करवाय।
ऐति, राजनांदगांव जिला म कोरोना के बाढ़त संक्रमण ल देखत अब चउक-चउराहा मन म घलो कोरोना के जांच करे जात हे। संगेसंग जउन मनखे मन मास्क नइ लगावत हे, उंखर मन उपर नगर निगम के टीम ह जुर्माना के कार्रवाई करत हे।
कोरोना-टीकाकरण
राज्य म कोरोना टीकाकरण के तियारी सुरू कर दे गेहे। राज्य म स्वास्थ्यकर्मी मनके करीबन अंठानवे प्रतिसत डाटा सकेले गेहे। टीकाकरण बर करीबन अट्ठाईस हजार जघा अउ आठ हजार ले जादा वैक्सीनेटर उपर चिन्हा लगाय गेहे।
स्वास्थ्य विभाग के अधिकारी मन ह बतईन कि वैक्सीन ल ठीकठाक राखे बर राज्य म छह सौ तीस कोल्ड चैन पाइंट काम करत हे अउ संगेसंग अस्सी ठिन नवा कोल्ड चैन पाइंट बनाय जात हे। टीकाकरण के पूरा निगरानी अउ व्यवस्था बर राज्य स्तरीय स्टेयरिंग समिति बनाय जा चुके हे। राज्य स्तरीय टास्क फोर्स समिति के बइठका घलो होगे हे।
कोरोना-जागरूकता
मेडिकल काॅलेज अस्पताल रईपुर के बिसेसज्ञ डाॅक्टर ओ.पी. सुंदरानी के मानना हे कि जब डाॅक्टर मन आई.सी.यू. जइसन एकदम संक्रमित जघा म रहि के कोरोना संक्रमित मरीज मनके इलाज करके सुरक्षित रहि सकथे, त आम लोगन मन आसानी ले सुरक्षा उपाय अपना के ए संक्रमण ले बच सकथे। ए बेरा भीड़ वाले जघा ले बचना, दू गज के सुरक्षित दूरी के पालन करना जरूरी हे।
ऐति, छत्तीसगढ़ के भरथरी गायिका रेखा जलक्षत्री ह लोगन मन ले कोरोना संक्रमण ले बचाव बर जरूरी सावधानी बरते के अपील करे हे।
जैपनीज इंसेफेलाइटिस टीकाकरण अभियान
स्वास्थ्य मंत्री टी.एस. सिंहदेव ह काली प्रदेस म जैपनीज इंसेफेलाइटिस टीकाकरण अभियान के आॅनलाइन सुभारंभ करीन। एमा पांच जिला बस्तर, बीजापुर, दंतेवाड़ा, कोंडागांव अउ धमतरी के करीबन दस लाख लइका मन ल टीका लगाय जाही। ए टीकाकरण अभियान अट्ठारह दिसंबर तक चलही। टीकाकरण पांच जिला के एक ले पन्द्रह साल तक के जम्मों लइका मन ल जैपनीज इंसेफेलाइटिस ले बांचे बर टीका लगाय जाही।
ओति, कोंडगांव जिला म कलेक्टर पुष्पेन्द्र कुमार मीणा ह जैपनीज बुखार- जे.ई. कैम्पन के गांव मथिनिबेड ले सुभारंभ करीन। ए मउका म कलेक्टर ह गांव के लोगन मन ल टीका के बारे म जानबा देवत किहीन कि ओमन अपन लइका मन ल जैपनीज के टीका जरूर लगवाय।
नरवा योजना
राज्य सरकार के महत्वाकांक्षी सुराजी गांव योजना के तहत नरवा परियोजना म प्रदेस म बरसा के पानी ल रोके, सिंचाई अउ आजीविका के साधन के तेजी ले विकास होवत हे। बस्तर जिला म बरसा के पानी रोके बर रीड्ज टू वेली कंसेप्ट के मुताबिक डीपीआर तैयार करे गेहे। योजना म एला अइसे ढंग ले बनाय जाही, जउन ह सतही भंडारण या भूईंया के जल के माध्यम ले आगू के प्रयोग बर बरसा के जल के थोरकुन मात्रा ल राख के अउ बांचे पानी एमा भरे जा सकही। योजना के मुख्य उद्देश्य गांव-गतौरी मन म सुरक्षित आजीविका बनाना हे, काबर कि गांव के लोगन मन ह सिंचाई अउ खेती-किसानी ले जुड़े कामकाज बर बरसा के पानी उपर निर्भर रहिथे।
भाजपा आरोप
भारतीय जनता पार्टी के प्रदेस अध्यक्ष विष्णुदेव साय ह किहीन हे कि राज्य म बिगड़त कानून व्यवस्था अउ अपराध उपर रोक लगाय म राज्य सरकार ह सफल नइ हो पात हे। ओमन किहीन कि प्रदेस म भय अउ आतंक जइसन स्थिति बने हवय। प्रदेस अध्यक्ष ह किहीन कि कवर्धा अउ रईपुर जिला म नाबालिग नोनी के संग दुष्कर्म के घटना प्रदेस के बिगड़त कानून व्यवस्था के सच्चाई ल बतावत हे।
ऋचा जोगी-जाति प्रमाण पत्र
छत्तीसगढ़ उच्च न्यायालय म ऋचा जोगी के जाति प्रमाण पत्र ल निलंबित करइया समिति के वैधानिकता ल चुनौती देवइया याचिका उपर सुनवाई सात दिसंबर तक टाल दे गेहे। याचिकाकर्ता कोति ले मुख्य न्यायाधीश पी.आर. रामचंद्र मेनन अउ न्यायमूर्ति पी.पी. साहू के डिवीजन बेंच ले ए प्रकरण बर अउ समय के मांग करे गीस, जेला न्यायालय ह मंजूर कर लेहे।
उहें, हाईकोर्ट ह उच्च स्तरीय जाति छानबीन समिति ल हल्बी जाति के दू ठिन प्रमाण पत्र के मसला म अंतिम आदेस जारी करे उपर रोक लगा देहे। ए मामला म दायर दू याचिका म राज्य सरकार ले घलो जवाब-तलब करे गीस।
संक्षिप्त समाचार
अउ अब थोरकुन समाचार सार म-
– सुकमा जिला म सुरक्षा बल मन ह तीन झिन माओवादी मन ल गिरफ्तार करे हे। ए जम्मों माओवादी चिंतलनार थाना क्षेत्रा के रहइया हरय।
– जांजगीर-चांपा जिला के गांव गुदरी म धान के नरई जलाय के दउरान खेत म रखे एक झिन किसान के फसल जलके राख होगे।
– खाद्य सचिव डाॅक्टर कमलप्रीत सिंह ह आज महासमुंद जिला म झालखम्हरिया अउ घुंचापाली सोसायटी के निरीक्षण करीन।
– रााष्ट्रीय साम्प्रदायिक सद्भाव अभियान सप्ताह उन्नीस नवंबर ले मनाय जात हे। काली आखिरी दिन पच्चीस नवंबर के झंडा दिवस मनाय जाही।
– कक्षा दसवीं, बारहवीं अउ डीएलएड प्रथम वर्ष के पूरक परीक्षा अट्ठाईस नवंबर ले सुरू होही।
– महासमुंद जिला के बसना क्षेत्र के नौ मजूर अउ बलौदाबाजार जिला के तीन झिन मजूर मन ल तमिलनाडु म बंधक बनाय जाय के समाचार मिले हे।
अउ
– कबीरधाम जिला म चिल्फी थाना पुलिस ह मध्यप्रदेश ले अवैध परिवहन करके छत्तीसगढ़ लावत दू सौ बावन कुंटल धान के जब्ती करे हे।