प्रधानमंत्री-कोरोना वैक्सीन
प्रधानमंत्री नरेन्द्र मोदी ह काली कोरोना वैक्सीन के आपूर्ति, वितरण अउ प्रशासनिक व्यवस्था के तियारी के समीक्षा करीन। ओमन ह ए दिसा म नवा प्रयोग करइया लोगन, वैज्ञानिक, शिक्षाविद् अउ दवा कंपनी के प्रयास के तारीफ करीन अउ निरदेस दीन कि कोरोना वैक्सीन के बनाय के तैयारी ल अउ सरल बनाय के प्रयास होना चाही। भारत म कोरोना के पांच ठिन वैक्सीन ह लगभग बने के स्थिति म पहुंचत हे। वैक्सीन मिले के बाद के तैयारी बर अउ ओखर उपयोग बर स्वास्थ्यकर्मी अउ कर्मचारी मन ह एखर ले जुड़े तैयारी ल आगू बढ़ावत हे। केन्द्र सरकार ह कोविड वैक्सीन के अनुसंधान अउ विकास बर कोविड सुरक्षा मिशन म नौ सौ करोड़ रूपिया के मदद दे हवय।
कोरोना समाचार/जागरूकता
प्रदेस म कोरोना संक्रमित मरीज मनके संख्या दू लाख उन्नीस हजार ल पार कर गेहे। काली प्रदेस म एक हजार आठ सौ बयालीस नवा मरीज मनके पुष्टि करे गीस। राज्य म अभी तक दू हजार छह सौ इंक्यानवे मरीज मनके मउत कोरोना ले होगे हवय। केन्द्र अउ राज्य सरकार डहार ले कोरोना ल रोके बर कतकोन कदम उठाय जावत हे। उहें, जिला प्रसासन डहार ले घलो कोरोना ल रोके बर स्थानीय स्तर म निरदेस जारी करे गेहे।
कोरोना संक्रमण के बाढ़त मामला ल देखत डाॅक्टर, विश्व स्वास्थ्य संगठन अउ यूनिसेफ डहार ले लोगन ल आगाह करे जावत हे कि संक्रमण ले बांचे बर सार्वजनिक जघा म मास्क पहिरना, दू गज के दूरी रखना, भीड़ ले बचना अउ हाथ के समय-समय सफाई करना जरूरी हे।
इही बीच, रईपुर जिला कलेक्टर ह स्वास्थ्य विभाग ल होटल म काम करइया करमचारी अउ रूकइया मनके रैंडम जांच के निरदेस दीन हे। उहें, बाजार मन म फल-सब्जी बेचइया लोगन अउ दूसर दुकानदार मनके घलो कोरोना जांच करे बर केहे गे हवय।
उहें, चिकित्सा सिक्षा विभाग के बिसेस सचिव सी.आर. प्रसन्ना ह रायगढ़ जिला म चिकित्सा सुविधा अउ कोरोना संक्रमण के स्थिति ल लेके समीक्षा करीन। ए दउरान ओमन किहीन कि कोरोना ले होवत मृत्यु दर म कमी लाय बर संक्रमित मनके जल्दी पहिचान करके उंखर उपचार करना जरूरी हे। ओमन लोगन ले अपील करीन कि कोरोना के लक्षण दिखे म तुरते अपन जांच कराएं।
इही बीच, सामाजिक कार्यकर्ता अउ गैर सरकारी संगठन के संस्थापक पद्मश्री फूलबासन बाई यादव ह लोगन ले कोरोना संक्रमण ले बांचे बर जरूरी सावधानी बरते के अपील करीन हे।
विश्व मत्स्य दिवस
आज विश्व मत्स्य दिवस मनाय जावत हे। दुनियाभर म सबो मछुआरा समुदाय, मछली पालक अउ एखर ले जुड़े लोगन के एकता प्रदर्सित करे बर ए दिन ल हर बछर इक्कीस नवंबर के मनाय जाथे।
ए मउका म आज राजधानी रईपुर म मछुवारा सम्मेलन के आयेाजन करे गीस। सम्मेलन म मुख्यमंत्री भूपेश बघेल ह किहीन कि राज्य सरकार ह मछली पालन ल खेती के दर्जा दे जाय के पहल करही। एखर बर योजना बनाय के निरदेस अधिकारी मन ल दे गे हवय। मुख्यमंत्री ह किहीन कि खेती-किसानी जइसनेच मछली पालन बर सहकारी बैंक ले ब्याजमुक्त ऋण देवाय के अउ बिजली दर म छूट दे जाय के सुरूवात घलो करे जाही।
कारीकरम म मुख्यमंत्री ह पन्द्रह झिन मछुवारा मन ल मोटर साइकिल संघरा आईस बाॅक्स अउ दू झिन मछुवारा मन ल आॅटो संघरा आईस बाॅक्स दीन। ओमन ह दस झिन मछुआ हितग्राही मन ल आवास योजना म पहला किश्त के चालीस-चालीस हजार रूपिया के अनुदान रासि के चेक घलो दीन।
पूरक परीक्षा
छत्तीसगढ़ माध्यमिक सिक्षा मंडल के कक्षा दसवीं-बारहवीं पूरक परीक्षा अउ डी.एल.एड. प्रथम वर्ष के परीक्षा अट्ठाईस नवंबर ले सुरू होही। ए बखत विद्यार्थी मन ह अपनेच स्कूल म परीक्षा देवाही। बोर्ड परीक्षा के गोपनीय सामग्री के वितरण तेईस नवंबर ले करे जाही। कोरोना संक्रमण ल देखत माध्यमिक सिक्षा मंडल ह पूरक परीक्षा बर बिसेस प्रोटोकाॅल जारी करे हे। एमा एक ठिन कमरा म सिरिफ दस झन विद्यार्थी मन ह परीक्षा दे बर बइठ सकही। परीक्षा ले पहिली सबो झन ल हाथ सैनिटाईज करना जरूरी होही। संगेसंग मास्क पहिरे बिना विद्यार्थी अउ कमरचारी मन ल कक्षा म प्रवेस नइ दे जाही।
उहें, दिग्विजय महाविद्यालय राजनांदगांव म आने-आने संकाय के द्वितीय वर्ष के परीक्षा परिणाम के घोसना करे गेहे। परीक्षा म अनुपस्थित अउ अनुत्तीर्ण होय विद्यार्थी मन ल दूसर मउका दे जाही। ए विद्यार्थी मन ह पच्चीस नवंबर तक आवेदन जमा करके परीक्षा म सामिल हो सकत हे।
किसान आत्महत्या जांच
दुरूग जिला म बोरी तहसील के डोमा गांव के किसान प्रेमलाल साहू डहार ले आत्महत्या करे जाय के मामला म पुलिस ह जांच सुरू कर देहे। धमधा एसडीएम ह दुरूग कलेक्टर ल भेजे अपन जांच रिपोर्ट म बताय हवय कि मृतक उपर व्यक्तिगत, सहकारी समिति या बैंक के कोनों करजा नइ रिहीस। मृतक ह अपन पिता ले मौखिक बंटवारा म मिले डेढ़ एकड़ जमीन म खेती-बाड़ी करके अपन परिवार के पालन-पोसन करत रिहीस। संगेसंग मजूरी के काम घलो करत रिहीस।
स्पंदन कार्यक्रम
स्पंदन कारीकरम म गरियाबंद जिला के पुलिस अधीक्षक भोजराम पटेल ह पुलिस लाइन म दरबार लगाके जवान मन ले उंखर समस्या सुनीन। ए दउरान ओमन ह पुलिस कर्मी मनके समस्या अउ उंखर आवेदन के तुरते निपटारा करे जाय के आश्वासन दीन। ए मउका म ओमन ह हरेक थाना ले तीन झिन जवान मन ल एक हफ्ता बर खेल, योग, कैरम, डांस, गीत अउ मनोरंजन के सुविधा देवाय के निरदेस अधिकारी मन ल दीन। पुलिस अधीक्षक ह किहीन कि पुलिसकर्मी मनके संग विचार साझा करे ले उंखर जीवन म सकारात्मक बदलाव आही।
सुकमा-सड़क निर्माण
सुकमा जिला के संवेदनशील क्षेत्र जगरगुंडा मार्ग म मल्लेबाग नाला के तीर टूटे पुल के मरम्मत के काम सुरक्षाकर्मी मनके मदद ले पूरा कर ले गेहे। पुल के दुबारा बने ले ए रद्दा म पाछु तीन महीना ले बंद अवई-जवई अब फेर सुरू होगे हे। पुल के टूटे ले लोगन ल कतकोन परेसानी के सामना करना पड़त रिहीस। ए मार्ग ल बहाल कराय म केन्द्रीय रिजर्व पुलिस बल-सीआरपीएफ, कोबरा बटालियन अउ डिस्ट्रिक्ट रिजर्व गार्ड-डीआरजी के जवान मनके बड़े योगदान रेहे हे।
माओवादी-ग्रामीण हत्या
सुकमा जिला के कोमलपाड़ इलाका म माओवादी मन ह दू झिन युवक मनके हत्या कर दीन। कुछेक दिन पहिली माओवादी मन ह ए युवक मन ल पकड़ के अपन संग लेगे रिहीन। माओवादी मनके के किस्टाराम एरिया कमेटी ह बयान जारी करके हत्या के जिम्मेदारी लेहे।
उहें, नारायणपुर जिला के अबूझमाड़ क्षेत्र म नारायणपुर-कुतुल रद्दा म आकाबेड़ा अउ कोड़कानार के बीच पाछु रतिहा माओवादी मन ह दू जघा म सड़क खोद के अवई-जवई ल बाधित कर दीन।
संक्षिप्त समाचार
अउ अब थोरकुन समाचार सार म-
– चार दिन के छठ परब आज छत्तीसगढ़ संघरा देस के दूसर भाग म घलो उगत सूर्य ल अध्र्य देके बाद संपन्न होगे।
– गृहमंत्री ताम्रध्वज साहू काली रईपुर के अपन निवास ले वीडियो कान्फ्रेंसिंग के माध्यम ले प्रदेस म कानून-व्यवस्था अउ अपराध उपर नियंत्रण के बारे म समीक्षा करही। एमा सबो रेंज के पुलिस महानिरीक्षक अउ पुलिस अधीक्षक मन सामिल होही।
– छत्तीसगढ़ राज्य महिला आयोग के अध्यक्ष डाॅक्टर किरणमयी नायक ह तेईस नवंबर ले सरगुजा संभाग के आने-आने जिला म महिला उत्पीड़न ले जुड़े प्रकरण के सुनवाई करही।
– कोरिया जिला म एसईसीएल बैकुंठपुर क्षेत्र के चरचा वेस्ट खदान म अचानक छत के एक ठिन बड़े हिस्सा के गिरे ले एक झिन मजदूर के मउत होगे।
अउ
– धमतरी जिला के गंगरेल बांध के मां अंगार मोती मंदिर म काली मड़ई मेला के आयोजन करे गीस। संगेसंग दूर-दराज ले आय श्रद्धालु मन डहार ले चरण पखारे के रस्म घलो अदा करे गीस।