दाई-दीदी क्लीनिक-शुभारंभ
मुख्यमंत्री भूपेश बघेल ह आज माईलोगिन मन बर एक ठिन बिसेस ‘‘दाई-दीदी क्लीनिक‘‘ के सुभारंभ करीन। मुख्यमंत्री ह पायलेट प्रोजेक्ट के रूप म रईपुर, दुरूग-भिलाई अउ बिलासपुर नगर निगम क्षेत्र म तीन ठिन स्पेशल मोबाइल दाई-दीदी क्लीनिक ल अपन रईपुर स्थित निवास कार्यालय ले हरा झंडी देखाके रवाना करीन। मुख्यमंत्री ह मोबाइल क्लीनिक के भीतरी जाके उपलब्ध सुविधा के अवलोकन करीन अउ अपन ब्लड प्रेसर के जांच घलो करईन। ए दाई-दीदी स्पेसल क्लीनिक म डाॅक्टर सहित सबो चिकित्सकीय स्टाफ महिला होही अउ एमा केवल माईलोगिन मनके ही निःसुल्क इलाज करे जाही।
माईलोगिन मन बर सुरू करे जाय वाले ए स्पेशल मेडिकल मोबाइल क्लीनिक देस म अपन तरीका के पहिली क्लीनिक होही। ए क्लीनिक के सुरू होय ले माईलोगिन मजदूर, बस्ती इलाका म रहइया माईलोगिन अउ लइका मन ल अपन घर के तीर ही महिला डाॅक्टर मनके माध्यम ले सुविधा मिलही। ए क्लीनिक के संचालन मुख्यमंत्री सहरी स्लम स्वास्थ्य योजना के अंतर्गत करे जाही।
विश्व शौचालय दिवस-01
आज विश्व सौचालय दिवस हरय। ए दिन स्वच्छता के बारे म जागरूकता लाय अउ लोगन मन ल सौचालय के प्रयोग करे खातिर प्रोत्साहित करे बर मनाय जाथे।
एक ठिन संदेस म उपराष्ट्रपति एम. वेंकैया नायडू ह कहिन हे कि साफ-सफाई म लापरवाही ले कुपोषण होथे अउ एखर ले बीमारी के फइले के खतरा बाढ़ जथे। विश्व सौचालय दिवस म उपराष्ट्रपति ह कहिन कि कोनों भी स्वस्थ समाज अउ स्वस्थ राष्ट्र बर स्वच्छता अउ साफ-सफाई बर प्राथमिकता जरूरी हवय। ओमन ह लोगन मन ले अनुरोध करीन हे कि ओमन भारत ल खुला म सौच ले मुक्त कराय खातिर अपन संकलप ल एक घांव फेर दोहराय।
उहें, प्रधानमंत्री नरेन्द्र मोदी ह किहीन कि भारत ह सबो बर सौचालय के अपन वचनबद्धता म दृढ़ता ले अमल करीन हे। एक ठन ट्वीट म ओमन कहिन कि पाछु कुछु बछर म हमन करोड़ों भारतवासी मन ल स्वच्छ सौचालय उपलब्ध कराय के सानदार उपलब्धि हासिल करे हन।
ऐति, छत्तीसगढ़ म पंचायत अउ ग्रामीण विकास मंत्री टी.एस. सिंहदेव ह आज अपन निवास कार्यालय ले वर्चुअल माध्यम ले स्वच्छ भारत मिशन ग्रामीण के तहत स्वच्छता के क्षेत्र म अच्छा काम करइया मनखे अउ संस्था ल आने-आने पन्द्रह ठिन बिसय म नगद रासि, प्रससस्ति पत्र अउ ट्राॅफी देके सम्मानित करीन। ए मउका म श्री सिंहदेव ह कहिन कि प्रदेस म स्वच्छता के माध्यम ले स्वच्छ अउ सुंदर समाज के निर्माण करना हे। ए सब सहभागिता ले ही संभव हो सकही।
विश्व शौचालय दिवस-02
ए मउका म अट्ठारह ठिन बिसय म तुलनात्मक रूप ले अच्छा काम करे वाले लोगन ल व्यक्तिगत अउ संस्थागत श्रेणी म चार करोड़ पैंतीस लाख रूपिया के पुरस्कार बांटे गीस। ग्रामीण विकास विभाग के अधिकारी मन ह बतईन कि स्वच्छता के पहिली चरण के तहत तैंतीस लाख सौचालय के निर्माण करे गेहे। एखर संगे भीड़भाड़ वाला इलाका ल ध्यान म राखके सामुदायिक सौचालय के निर्माण ल बढ़ावा दे गेहे।
इही बीच, श्री सिंहदेव ह सरगुजा जिला ल राज्य स्तरीय स्वच्छता पुरस्कार -दू हजार बीस म, जिला ओडीएफ पुरस्कार के रूप म,एक करोड़ रूपिया के रासि प्रदान करीन। सरगुजा जिला ल अट्ठारह ठिन श्रेणी ले कुल नौ ठिन श्रेणी म ग्यारह, जबकि जिला स्तर म आठ ठिन श्रेणी म उन्नीस ठिन पुरस्कार मिले हे।
कोरोना समाचार/जागरूकता
केन्द्रीय स्वास्थ्य मंत्री डाॅक्टर हर्षवर्धन ह विश्वास जताईन हे कि अवइया कुछु महीना म देस के नागरिक मन ल कोविड-नाइंटीन टीका उपलब्ध हो जही। भारतीय उद्योग परिसंघ-फिक्की के एक ठिन कारीकरम ल वर्चुअल माध्यम ले संबोधित करत हुए स्वास्थ्य मंत्री ह कहिन हे कि ए टीका के वितरण बर दिसा-निरदेस तैयार करे जात हे। ओमन बतईन कि कोरोना योद्धा मनके बाद ए टीका पैंसठ बछर ले जादा उमर के लोगन मन ल लगाय जाही। अवइया बछर म जुलाई या फेर अगस्त तक ए टीका के चालीस ले पचास करोड़ खुराक उपलब्ध होही, जउन कि सुरूवाती दउर म तीस ले पैंतीस करोड़ लोगन मन ल दे जा सकही।
ऐति, कोरोना संक्रमण ल देखत हुए अब छत्तीसगढ़ के राजधानी रईपुर म कोरोना टेस्ट के बाद ही प्रवेस दे जाही। एखर बर राजधानी के सबो पहुंच मार्ग म पुलिस बल के मौजूदगी म कोरोना टेस्ट कराय जाही। जांच निगेटिव आय म ही जिला के सीमा के भीतर प्रवेस मिल पाही।
इही बीच, अंतर्राष्ट्रीय बैंडमिंटन खिलाड़ी आकर्षि कश्यप ह लोगन मन ले कोरोना वायरस ले बाचे बर जरूरी सावधानी बरते के अपील करीन हे।
इंदिरा गांधी-जयंती
पूर्व प्रधानमंत्री इंदिरा गांधी के आज जयंती हे। ए मउका म प्रदेस म आने-आने कारीकरम आयोजित करे जात हे। मुख्यमंत्री भूपेश बघेल ह अपन रईपुर स्थित निवास कार्यालय म स्वर्गीय गांधी के चित्र म माला पहिना के श्रद्धांजलि अर्पित करीन। मुख्यमंत्री ह इंदिरा गांधी के देस के प्रति योगदान ल याद करत हुए कहिन कि इंदिरा जी ह जीवनभर गरीब अउ समाज के कमजोर वर्ग के उत्थान बर कोसिस करीन अउ देस के एकता, अखंडता के रक्षा बर अपन जीवन न्यौछावर कर दीन।
ऐति, विधानसभा अध्यक्ष डाॅक्टर चरणदास महंत ह विधानसभा परिसर स्थित सेंट्रल हाॅल पूर्व प्रधानमंत्री इंदिरा गांधी के फोटो म श्रद्धासुमन अर्पित करके ओमन ल याद करीन। डाॅक्टर महंत ह कहिन कि श्रीमती गांधी ह देस ही नइ, दुनियाभर म अपन अमिट छाप छोड़ीन हे।
माओवादी-गिरफ्तार/समर्पण
बीजापुर जिला म सुरक्षा बल मन ह एक झिन माईलोगिन समेत तीन झिन माओवादी ल गिरफ्तार करीन हे। एखर करा ले विस्फोटक, माओवादी वर्दी, नक्सली साहित्य अउ नगदी रकम बरामद करे गेहे। गिरफ्तार करे गे महिला माओवादी उपर दू लाख रूपिया के इनाम घोषित रिहीस।
ऐति, दंतेवाड़ा जिला म लोन वर्राटू अभियान के प्रेरित होके एक झिन माओवादी ह पुलिस अधीक्षक अभिषेक पल्लव के आगू आत्मसमर्पण करीन।
समुद्र सिंह-गिरफ्तार
आबकारी विभाग म करोड़ों रूपिया के घोटाला के आरोप म फरार ओएसडी समु्रद सिंह ल आर्थिक अपराध अन्वेषण ब्यूरो-ईओडब्ल्यू के टीम ह आज राजधानी के तीर बोरियाकला म ओखर घर ले गिरफ्तार करीन हे। गिरफ्तारी के बाद समुद्र सिंह के तबीयत खराब होय म ओला एक ठिन निजी अस्पताल म भर्ती कराय गेहे।
बतादन कि करीबन डेढ़ बछर पहिली फरार समुद्र सिंह उपर आबकारी विभाग ह करोड़ों रूपिया के गड़बड़ी करे के आरोप हे।
हाथी-उत्पात
कोरिया जिला म हाथी के दल ह खड़गवां क्षेत्र के कई ठिन गांव के फसल नुकसान पहुंचाईन हे। जानबा के मुताबिक क्षेत्र के मंगोरा, बिरनीडांड, बेलकामार, भुसकीडांड, कटकोना, कारिछापर, भुजबलडांड अउ जरौधा म कई झिन ग्रामीण मनके घर ल क्षतिग्रस्त करीन हे। उहें, हाथी के हमला ले एक पशु घायल होगे। हाथी के दल ह क्षेत्र म धान, अरहर, बाजरा, सरसों, आलू, शंकरकंद अउ उड़त के फसल ल बर्बाद कर दीन।
खाद्य विभाग वेबसाइट-लोकार्पण
मुख्यमंत्री भूपेश बघेल ह रईपुर स्थित अपन निवास कार्यालय म छत्तीसगढ़ राज्य खाद्य आयोग के वेबसाइट के लोकार्पण करीन। ए मउका म मुख्यमंत्री ह कहिन कि ए वेबसाइट के माध्यम ले सार्वजनिक वितरण प्रणाली सहित खाद्य अउ पोषण सुरक्षा ले जुड़े पांच ठिन योजना के सिकायत के तुरते अउ पारदर्सी तरीका ले निराकरण हो सकही। ओमन मन ह कहिन कि ए योजना के हितग्राही मन जरूरत होय म सीधा वेबसाइट म अपन सिकायत दर्ज करा सकही। एखर बर ओमन ल राज्य खाद्य आयोग या फेर एखर ले संबंधित कार्यालय जाय के जरूरत नइ होही। श्री बघेल ह कहिन कि राज्य खाद्य आयोग के गठन सार्वजनिक वितरण प्रणाली, मध्यान्ह भोजन योजना, पूरक पोषण आहार योजना, प्रधानमंत्री मातृ वंदन योजना अउ छात्रावास आश्रम ल बीपीएल दर म पोषण आहार सहायता योजना के क्रियान्वयन के निगरानी अउ सिकायत निवारण बर करे गेहे।
ए अवसर म खाद्य मंत्री अमरजीत भगत ह कहिन कि विभाग के कोसिस होही कि राज्य सरकार के योजना के क्रियान्वयन सही ढंग ले पारदर्सिता के संग होवय।
आॅनलाइन कक्षा-निर्देश
महाविद्यालय अउ विश्वविद्यालय म आॅनलाइन कक्षा ले नइ जुड़े वाले छात्र मन अब परीक्षा नइ दिला पाही। अइसन म छात्र मन ल हर हाल म आॅनलाईन कक्षा म अपन उपस्थिति दरज कराय बर होही।
उच्च सिक्षा विभाग ह सबो विश्वविद्यालय अउ कालेज ल एक ठिन पत्र जारी करके किहीन हे कि पाठ्यक्रम म कोन्हों भी प्रकार के कटौती नइ करे जाही। विभाग ह पत्र म स्पष्ट करीन हे कि आॅनलाईन कक्षा म छात्र मनके जुड़ना जरूरी हे, जउन छात्र मन नइ जुड़ही ओमन ल अनुपस्थित माने जाही।
शिक्षा का अधिकार
स्कूल शिक्षा विभाग ह शिक्षा के अधिकार अधिनियम के तहत स्कूल म दाखिला के संबंध म जरूरी कार्यवाही करे बर सबो संयुक्त संचालक अउ जिला शिक्षा अधिकारी मन ल दिसा-निरदेस जारी करीन हे।
शिक्षा के अधिकार अधिनियम के तहत बछर दू हजार बीस-इक्कीस ले अंत्योदय कार्डधारक अउ सामाजिक, आर्थिक, जातिगत जनगणना बछर दू हजार ग्यारह के स्थिति म सामिल परिवार के लइका मन ल पात्रता के श्रेणी म राखे जाही। सिक्षा अधिकारी मन ल आरटीई के तहत दाखिला के समीक्षा करत हुए बेरा म कार्यवाही सुनिश्चित करे के निरदेस दे गेहे।
छठ-पर्व
छत्तीसगढ़ सहित देसभर म छठ पर्व श्रद्धा अउ उत्साह ले मनाय जात हे। छठ परब के दूसर दिन आज संझा बेरा म खरना पूजा करे जात हे। ए बेरा म व्रती अउ श्रद्धालु मन सूर्य देवता के अराधना करके ओमन ल खीर, पुड़ी अउ फल अर्पित करही। छठ व्रती मन खरना प्रसाद पाय के बाद छत्तीसग घंटा के निर्जला उपवास राखही, जउन कि सनिवार बिहनिया उगत सूरज ल अध्र्य देके संग संपन्न होही। काली सूर्य ल सांध्य अध्र्य दे जाही। उहें, कोरोना संक्रमण के खतरा ल देखत हुए सबो श्रद्धालु मन ल बचाव ले संबंधित जरूरी दिसा-निरदेस के पालन करे बर केहे गेहे। राज्य सरकार ह छठ परब ल लेके बिसेस दिसा-निरदेस घलो जारी करे हे।
इही बीच, मुख्यमंत्री भूपेश बघेल ह प्रदेसवासी मन ल छठ परब के बधाई अउ सुभकामना दीन हे। ओमन ह लोगन मन ले अपील करीन हे कि ओमन ह छठ पूजा के बेरा कोरोना संक्रमण ले बचाव बर जारी करे गे दिसा-निरदेस के पालन करय।
ओति, बिलासपुर म महापौर रामशरण यादव ह छठ घाट के निरीक्षण करीन। महापौर ह बतईन कि कोरोना संक्रमण ल देखत हुए ए बछर ए परब ल भव्यता के संग नइ मनाय जात हे।
फसल बीमा योजना
खरीफ फसल के कटाई के बाद रबी फसल के बोनी पूरा हो चुके हे। प्रधानमंत्री फसल बीमा योजना के तहत प्राकृतिक आपदा ले होय वाले नुकसान के भरपाई बर किसनहा मन अवइया पन्द्रह दिसंबर तक फसल के बीमा करा सकत हे। ऋणी अउ अऋणी किसनहा मन जउन कि भू-धारक अउ बंटाईदार हवय ओमन ह ए योजना के तहत सामिल हो सकत हे। किसनहा मन ल निर्धारित प्रपत्र म हस्ताक्षरित घोसना पत्र बीमा के आखरी तारीख पन्द्रह दिसंबर के सात दिन पहिली संबंधित बैंक म जरूरी रूप ले जमा कराय बर होही।
भाजपा-महिला मोर्चा
भाजपा महिला मोर्चा के नव-नियुक्त प्रदेस अध्यक्ष शालिनी राजपूत ह किहीन कि प्रदेस म महिला संगठन ल एकजुट करके ससक्त बनाय जाही। श्रीमती राजपुत ह आज दंतेवाड़ा म पत्रकार मन ले गोठबात करत हुए किहीन कि प्रदेस म माईलोगिन मन संग होवत अत्याचार के खिलाफ एकजुट होके उंखर मनके हक बर लड़ाई लड़े जाही।
एखर पहिली, श्रीमती राजपूत ह माई दंतेश्वरी के पूजापाठ करके प्रदेस के सुख-सांति के कामना करीन।