विस शीतकालीन सत्र-अधिसूचना
छत्तीसगढ़ विधानसभा के सीतकालीन सत्र इक्कीस दिसंबर ले सुरू होही। ए सत्र तीस दिसंबर तक चलही। ए दउरान कुल सात बइठका होही। ए बारे म विधानसभा सचिवालय ह अधिसूचना जारी कर देहे। अधिसूचना के मुताबिक ए सत्र म सरकारी कामकाज संपादित करे जाही। संगेसंग कोरोना संक्रमण के स्थिति अउ समर्थन मूल्य म धान खरीदी के संगेसंग आने मुद्दा उपर घलो गोठबात होय के संभावना हे।
मुख्यमंत्री-केन्द्रीय मंत्री मुलाकात
छत्तीसगढ़ के मुख्यमंत्री भूपेश बघेल ह नागपुर प्रवास के दउरान केन्द्रीय सड़क परिवहन अउ राजमार्ग मंत्री नितिन गडकरी ले मिलके प्रदेस म तीन ठिन नवा राष्ट्रीय राजमार्ग घोसित करे के विनती करीन। ए राष्ट्रीय राजमार्ग म रायगढ़-घरघोड़ा-पत्थलगांव रद्दा, अंबिकापुर-वाड्रफनगर-बम्हनी-रेनूकूट-बनारस रद्दा अउ पंडरिया-बजाग-गाड़ासरई रद्दा सामिल हे। मुख्यमंत्री ह बतईन कि ए रद्दा मन आदिवासी बहुल इलाका ले गुजरथे अउ भारत माला प्रोजेक्ट के प्रस्तावित रद्दा ल घलो जोड़थे। मुख्यमंत्री ह भारत माला योजना के तहत रायपुर-दुर्ग बायपास ले प्रभावित भू-स्वामी मन के मुआवजा रासि भुगतान ल जल्दी करे के बात केन्द्रीय मंत्री ले किहीन।
स्पेशल दाई-दीदी क्लीनिक
मुख्यमंत्री ह काली पूर्व प्रधानमंत्री इंदिरा गांधी के जयंती के मउका म माईलोगिन मन बर स्पेशल दाई-दीदी क्लीनिक के सुरूवात करही। ए बेरा नगर पालिक निगम रईपुर, भिलाई अउ बिलासपुर म माईलोगिन मन बर एक-एक ठिन दाई-दीदी क्लीनिक के सुरूवात करे जात हे। माईलोगिन मन बर सुरू होवइया ए स्पेशल मेडिकल मोबाइल क्लीनिक ह देस म अलगेच क्लीनिक होही। क्लीनिक के गाड़ी मन म सिरिफ महिला स्टाफ रइही अउ माईलोगिन मनके मुफत म इलाज करे जाही। ए क्लीनिक के संचालन मुख्यमंत्री सहरी स्लम स्वास्थ्य योजना कोति ले करे जाही।
त उहें, मुख्यमंत्री ह काली प्रदेस के तेंदूपत्ता सकलइया परिवार वाले मनके हुसियार लइका मन ल सिक्षा प्रोत्साहन रासि ल आॅनलाइन बांटही। ए दउरान सिक्षा प्रोत्साहन योजना अउ हुसियार छात्र-छात्रा मन ल पुरस्कार योजना के तहत चार हजार मेधावी छात्र मनके खाता मन म करीबन साढ़े आठ करोड़ रूपिया भेजे जाही।
टेनिस अकादमी-लोकार्पण
राजधानी रईपुर स्थित कृषि विश्वविद्यालय के तीर चार एकड़ भूईंया म टेनिस स्पोट्र्स अकादमी बनाय जाही। एखर बर खेल अउ युवा कल्याण विभाग डहार ले सत्रह करोड़ पचहत्तर लाख रूपिया प्रशासकीय मंजूरी मिल गेहे। अकादमी ल पन्द्रह महीना के भीतर पूरा करे के लक्ष्य हे। मुख्यमंत्री ह वीडियो कान्फ्रेंसिंग के माध्यम ले काली ए टेनिस स्पोटर्स अकादमी के भूमिपूजन करही।
इंदिरा प्रियदर्शनी नेचर सफारी मोहरेंगा
मुख्यमंत्री ह काली अपन रईपुर स्थित निवास कार्यालय ले वीडियो कान्फ्रेंसिंग के माध्यम ले ‘‘इंदिरा प्रियदर्शन नेचर सफारी मोहरेंगा‘‘ के लोकार्पण करही। वन विभाग डहार ले राजधानी रईपुर के करीबन चालीस किलोमीटर दूरिहा खरोरा-तिल्दा रद्दा उपर स्थित मोहरेंगा वन क्षेत्र म करीबन पांच सौ पचपन हेक्टेयर म ए नेचर सफारी विकसित करे गेहे।
वन मंत्री मोहम्मद अकबर ह बतईन कि नेचर सफारी मोहरेंगा के हरा-भरा जंगल म साजा, खैर, तेंदू, सेमहा, चार, बेल, धावड़ा, आंवला, अमली, महुआ अउ बांस प्रजाति के रूख हवय। ए जघा म जंगली जानवर मन बर चार ठिन तरिया बनाय गेहे।
विश्व शौचालय दिवस
काली विश्व सौचालय दिवय हरय। ए मउका म राज्य स्वच्छता पुरस्कार के विजेता मन ल इनाम दे जाही। प्रदेस के पंचायत मंत्री टी.एस. सिंहदेव ह वीडियो कान्फ्रेंसिंग के माध्यम ले विजेता प्रतिभागी मन ल पुरस्कार दीहीं।
जानबा के मुताबिक राज्य स्वच्छता पुरस्कार-दू हजार बीस के तहत पच्चीस जुलाई ले दू अक्टूबर तक अरजी मंगाय गे रिहीस।
दुरूग म जिला स्तरीय सत्यापन समिति डहार ले जिला स्तरीय पुरस्कार बर विजेता मन ल चुने गेहे।
कोरोना समाचार/जागरूकता
भारतीय चिकित्सा अनुसंधान परिषद ह सलाह देहे कि प्लाजमा के बिना सोझे समझे प्रयोग कोरोना के इलाज बर ठीक नइ हे। परीक्षण म पाय गेहे कि प्लाज्मा थैरेपी ले कोरोना संक्रमित रोगी मन ल कोनों प्रकार के राहत नइ मिले हे।
ऐति, प्रदेस म कोरोना संक्रमित मरीज मनके संख्या म सरलग बढ़ोतरी होवत हे। प्रदेस म काली एक हजार सात सौ इक्कीस नवा मरीज मनके पहिचान करे गेहे।
उहें, यूनिसेफ के स्वास्थ्य विशेषज्ञ डाॅक्टर श्रीधर ह बतईन कि कोरोना संक्रमण एकदम घातक हो सकथे। फेर, लक्षण दिखे के चैबीस घंटा के भीतर जांच अउ इलाज सुरू कर देना चाही।
इही बीच, छत्तीसगढ़ के प्रसिद्ध साहित्यकार सतीश जायसवाल ह लोगन मन ले कोरोना वायरस ले बचाव बर जरूरी सावधानी बरते के अपील करे हे।
माओवादी गिरफ्तार/आईईडी
बीजापुर जिला म सुरक्षा बल मन ह एक झिन माओवादी ल गिरफ्तार करे हे। जिला पुलिस बल अउ केन्द्रीय रिजर्व पुलिस बल के संयुक्त टीम ह उसूर थाना क्षेत्र के टेकमेटला के जंगल ले ए माओवादी ल विस्फोटक जिनीस के संग गिरफ्तार करीन।
त उहें, दंतेवाड़ा जिला के अरनपुर-कोंडासावली रद्दा उपर सुरक्षा बल मन ह पांच-पांच किलो के चार ठिन आईईडी बरामद करे हे। जिला पुलिस बल, डिस्ट्रिक्ट रिजर्व गार्ड अउ सीआरपीएफ के दू सौ इकतीसवां बटालियन के जवान मन ह तलाशी अभियान के दउरान ए बम ल बरामद करीन।
छठ-पर्व
प्रदेस के संगेसंग देस के कतकोन जघा म चार दिन तक चलइया छठ परब आज नहाय-खाये रसम के संग सुरू होगे। ए परब सनिचर बिहनिया उगत सूरज ल अध्र्य देके सिराही। छठ परब सूर्य उपासन के तिहार हरय। नहाय के बाद पूजापाठ करइया मन ह नहाय-खाये के रसम म अरवा चाउर, चनादाल अउ तुमा जइसन पकाय गे जिनीस ल खाथे।
छठ परब म काली खरना मनाय जाही, जेखर बाद बहत्तर घंटा के निर्जला उपवास सुरू होही, जउन ह सनिचर बिहनिया तक चलही। कोरोना संक्रमण के खतरा ल देखत जम्मों श्रद्धालु मन ल जरूरी दिसा-निरदेस के पालन करे बर केहे गेहे अउ संगेसंग लोगन मन ल ए परब ल घर म रहि के मनाय के अपील करे हे।
इंदिरा गांधी-जयंती
पूर्व प्रधानमंत्री इंदिरा गांधी अउ स्वतंत्रता संग्राम सेनानी वीरांगना रानी लक्ष्मी बाई के काली जयंती हरय। ए मउका म मुख्यमंत्री ह श्रीमती गांधी के देस के प्रति योगदान ल सुरता करत किहीन कि इंदिरा गांधी ह पूरा जिनगी गरीब अउ समाज के कमजोर वर्ग के उत्थान बर प्रयास करीन। त उहें, मुख्यमंत्री ह वीरांगना लक्ष्मी बाई ल सुरता करत उंखर हिम्मत के घलो प्रसंसा करीन।
मौसम
प्रदेस म अब जल्दीच जाड़ा पड़े के संभावना मौसम विभाग कोति ले बताय गेहे। प्रदेस के उत्तरी जघा म अवइया चैबीस घंटा के दउरान तापमान म गिरावट हो सकथे। मौसम विभाग के मुताबिक प्रदेस म दक्षिण पूर्व ले नमी अउ गरम हवा आय के संगेसंग हल्का बादल आय ले तापमान म बढ़ोतरी होवत हे। अवइया चैबीस घंटा के दउरान कोनों-कोनों जघा म गरज-चमक के संग बूंदाबांदी हो सकथे।