मतदाता पुनरीक्षण
प्रदेस म विशेष संक्षिप्त मतदाता पुनरीक्षण कारीकरम म आज मतदाता सूची के प्रकासन करे गीस। पन्द्रह दिसंबर तक दावा आपत्ति पेस करे जा सकही अउ एखर निपटारा पांच जनवरी तक करे जाही। उहें, मतदाता सूची के आखिरी प्रकासन पन्द्रह जनवरी दू हजार इक्कीस तक करे जाही। ए कारीकरम म अइसन युवा मतदाता जेखर उमर एक जनवरी दू हजार इक्कीस तक अट्ठारह साल के हो जही, ओमन मतदाता सूची म अपन नाव जुड़वा सकथे। युवा मन भारत निर्वाचन आयोग के वेबसाइट ‘‘नेशनल वोटर सर्विस पोर्टल‘‘ म जाके आॅनलाईन अरजी कर सकथे।
मुख्यमंत्री-केन्द्रीय गृहमंत्री-पत्र
मुख्यमंत्री भूपेश बघेल ह केन्द्रीय गृहमंत्री अमित शाह ल चिट्ठी लिखके बस्तर संभाग म माओवादी समस्या के निपटारा बर सुझाव देहे। मुख्यमंत्री ह चिट्ठी म केहे हे कि ए बेरा जारी रणनीति के संगेसंग प्रभावित क्षेत्र मन म बड़ संख्या म रोजगार खोले जाय, जेखर ले माओवाद प्रभावित क्षेत्र के बेरोजगार मन ह माओवादी समूह मन म सामिल झन होवय।
मुख्यमंत्री ह गृहमंत्री ले बस्तर म बनइया स्टील प्लांट्स म तीस प्रतिसत छूट म लौह अयस्क देवाय के बिनती करे हे, जेखर ले सैकड़ो-करोड़ों रूपिया के निवेस अउ हजारों के संख्या म रोजगार के मउका मिल सकही। मुख्यमंत्री ह लोगन मनके आजीविका के साधन के विकास बर कलेक्टर मन ल कम ले कम पचास-पचास करोड़ रूपिया के रासि हर साल दे जाय के मांगे करे हे।
बिरसा मुंडा-राज्यपाल
राज्यपाल अनुसुईया उइके ह किहीन कि महापुरूष मनके काम अउ उंखर जिनगी के मूल्यांकन ए बात ले होथे कि ओमन राष्ट्रीय अउ सामाजिक समस्या के निपटारा कतेक सीमा तक करीन। राज्यपाल ह बिरसा मुंडा के जयंती के मउका म राखे गे वेबीनार ल संबोधित करत किहीन कि बिरसा मुंडा ह सोषण अउ गुलामी के खिलाफ जोरदरहा आवाज उठाईन। राज्यपाल ह किहीन कि बिरसा मुंडा ह अपन क्रांतिकारी बिचार ले समाज के दिसा अउ दसा बदल दीन। ओमन किहीन कि बिरसा मुंडा ह अंग्रेज मन ले राजनीतिक आजादी के संगेसंग आदिवासी मनके सामाजिक अउ आर्थिक अधिकार बर घलो लड़ाई लड़ीन।
राज्यपाल ह बिरसा मुंडा के सहादत ल सुरता करत ओखर सिक्षा अउ आदर्स ल अपनाय के जरूरत बतईन।
कोरोना समाचार/जागरूकता
देस म कोरोना संक्रमण ले ठीक होय के दर म सुधार होवत हे। अब ए ह तिरानवे दशमलव दू सात प्रतिसत होगे हे। केन्द्रीय स्वास्थ्य मंत्रालय के मुताबिक अब तक बयासी लाख उनचास हजार ले जादा कोरोना संक्रमित मरीज मन ठीक होगे हे। ए बेरा करीबन पांच लाख मरीज मनके इलाज चलत हे। केन्द्रीय स्वास्थ्य मंत्रालय ह केहे हे कि जांच निगरानी अउ रणनीति उपर बने ढंग ले अमल होय के सेती संक्रमण ले ठीक होवइया लोगन मनके संख्या बाढ़त हे। ए बेरा देस म महामारी के सेती मृत्यु दर एक दशमलव चार सात प्रतिसत हे।
ऐति, प्रदेस म काली पांच सौ तीस कोरोना संक्रमित नवा मरीज के पहिचान करे गेहे। इही बीच, काली छह सौ तेईस कोरोना संक्रमित मरीज मन ह इलाज के बाद ठीक होय हे। ऐति, बिलासपुर संभाग के आयुक्त डाॅक्टर संजय अलंग ह लोगन मन ले कोरोना वायरस ले बचाव बर जरूरी सावधानी बरते के अपील करे हे।
माओवादी-आत्मसमर्पण
बीजापुर जिला म तीन लाख रूपिया के एक झिन इनामी माओवादी ह सुरक्षा बल के आगू आत्मसमर्पण करे हे। जानबा के मुताबिक भैरमगढ़ एरिया कमेटी प्लाटून के डिप्टी कमांडर लक्षण हेमला ह आज पुलिस अधीक्षक कमलोचन कश्यप अउ सीआरपीएफ के डीआईजी कोमल सिंह के आगू आत्मसमर्पण करीन। ए माओवादी उपर पुलिस दल मन उपर हमला करे के संगेसंग दू हजार तेरह ले दू हजार अट्ठारह के बीच आने-आने माओवादी घटना मन म सामिल रेहे के आरोप हे।
राष्ट्रीय प्रेस दिवस
आज राष्ट्रीय प्रेस दिवस हरय। एखर आयोजन स्वतंत्र अउ उत्तरदायी प्रेस के प्रतीक के रूप म हर साल सोलह नवंबर के मनाय जाथे। आजे के दिन भारतीय प्रेस परिषद ह काम करे बर सुरू करीन।
ए मउका म उपराष्ट्रपति एम. वेंकैया नायडू ह किहीन हे कि प्रेस के आजादी उपर कोनों प्रकार के हमला राष्ट्रीय हित के खिलाफ हरय। एखर बर जम्मों मनखे मन ल विरोध करना चाही। उप राष्ट्रपति ह वैश्विक महामारी कोरोना के प्रकोप ले उपजे गंभीर खतरा के परवाह करे बिना लोगन मन ल सरलग सूचना दे बर कोविड योद्धा के रूप म प्रिंट अउ इलेक्ट्रानिक मीडिया के पत्रकार मनके प्रसंसा करीन।
उहें, केन्द्रीय सूचना अउ प्रसारण मंत्री प्रकाश जावड़ेकर ह घलो मीडियाकर्मी मन ल सुभकामना दे हवय। ऐति, प्रदेस के मुख्यमंत्री ह घलो मीडिया के लोगन मन ल बधाई अउ सुभकामना दे हवय। ओमन किहीन हे कि मीडिया के लोगन मन ह हिम्मत अउ निष्पक्ष पत्रकारिता के माध्यम ले देस म लोकतांत्रिक विमर्स ल एक ठिन नवा दिसा देवाय हे। ओमन किहीन कि प्रदेस म पत्रकार सुरक्षा कानून बनाय के काम ह आखिरी चरण म हवय।
हाथी-उत्पात
प्रदेस के कोरिया जिला म हाथी मनके उत्पात सरगल होवत हे। हमर संवाददाता ले मिले जानबा के मुताबिक खड़गवां वन परिक्षेत्र के मंगोरा, बिरनी, डांड, बेलकमार अउ कटकोना म पाछु रतिहा चालीस ले जादा हाथी के दल ह उत्पात मचाईन। ए दउरान दू ठिन मवेसी के मउत होय अउ एक ठिन मवेसी के घायल होय के समाचार मिले हे। त उहें, दू झिन लोगन के घर ल घलो हाथी मन ह गिरा दीन। संगेसंग किसान मनके बाजरा, राहेर अउ आलू के फसल ल घलो नकसान पहुंचाय हे। वन विभाग के अधिकारी मन ह गांव के लोगन मन ल हाथी ले दूरी बनाके रेहे के सलाह देहे।
भाईदूज
देवारी तिहार के पांचवां अउ आखिरी दिन आज राजधानी रईपुर के संगेसंग प्रदेस म भाईदूज के परब उछाह के संग मनाय जात हे। भाईदूज के मउका म बहिनी मन ह भाई के माथा म टीका लगाके उंखर उज्जवल भविष्य के कामना करीन।
कार्तिक मास के शुक्ल पक्ष के द्वितीया के मनाय जात ए परब ल यम द्वितीया घलो केहे जाथे।
ऐति, प्रदेस के कतकोन जिला मन म आज मातर के तिहार घलो खुसी के संग मनाय जात हे। ए मउका म धमतरी जिला म अखाड़ा मन म बिसेस करतब देखाय गीस। उहें, गांव-गतौरी मन म देवी-देवता के पूजापाठ करके सुख समृद्धि के कामना करे गीस।
जानबा के मुताबिक आज के दिन यादव समाज के लोगन मन ह बड़का मैदान मन म गाय-गरू के झुंड मनके बीच बिसेस प्रकार के करतब दिखाथे अउ संझा मड़ई के आयोजन करे जाथे।
पुलिस-दीपावली
प्रदेस के कतकोन जिला के पुलिस मन ह एसो देवारी तिहार ल वृद्धा आश्रम के सिनहा मन संग मनाईन। राजनांदगांव के चिखली थाना के पुलिसकर्मी मन ह सियनहा मनखे मन संग देवारी तिहार मनाईन। ए दउरान पुलिसकर्मी मन ह सियान मनखे मनके हालचाल जाने के संगेसंग ओमन ल मिठाई खवा के श्रीफल भेंट करके सम्मानित करीन।
जानबा के मुताबिक छत्तीसगढ़ पुलिस ह वरिष्ठ नागरिक मन ल सहायता देवाय बर समर्पण अभियान चलावत हे।