आज दिनभर के खबर ल अपन गुरतुर छतीसगढ़ी भाखा म पढ़व

दीपावली-गोवर्धन पूजा
राजधानी रईपुर समेत प्रदेसभर म आज गोवर्धन पूजा अउ अन्नकूट के तिहार बड़ उछाह अउ उमंग के साथ मनाय जावत हे। आज के दिन गउ माता के पूजा करके ओला भोग अर्पित करे जाथे। राजधानी रईपुर के प्राचीन दूधाधारी मठ म घलो अन्नकूट अउ गोवर्धन पूजा के कारीकरम आयोजित करे गीस। प्रदेस के आने-आने जिला म घलो अन्नकूट अउ गोवर्धन पूजा तिहार मनाय जाय के समाचार मिले हे।
राज्यपाल अनुसुईया उइके ह प्रदेसवासी मन ल गौरा-गौरी अउ गोवर्धन पूजा के बधाई अउ सुभकामना दीन हे।
उहें, बस्तर रेंज के पुलिस महानिरीक्षक सुंदरराज पी. ह बस्तर के मनखे मन ल, बस्तर के दूरस्थ थाना क्षेत्र, चैकी अउ बेस कैम्प म तैनात सुरक्षा बल के अधिकारी, जवान, अउ उंखर परिवार वाला मन ल देवारी तिहार के सुभकामना दीन हे। ओमन सुरक्षा बल डहार ले क्षेत्र म सांति स्थापित करे म सहयोग अउ कोरोना संक्रमण ले बचाव के संगेसंग सुघ्घर स्वास्थ्य के कामना करे हे।
गौठान दिवस
प्रदेसभर म आज गोवर्धन पूजा के तिहार गौठान दिवस के रूप म घलो मनाय जावत हे। मुख्यमंत्री भूपेश बघेल ह अपन रईपुर स्थित निवास म आज बिहनिया अपन धर्मपत्नी अउ परिवार वाला मन संग गाय ल खिचड़ी खवा के गोवर्धन के पूजा करीस। ओमन गौरा-गौरी के पूजा-अर्चना करके प्रदेसवासी मन ल खुसहाल अउ सुख-समृद्ध रेहे के कामना करीस। ए दउरान पारंपरिक लोकधून के बीच सुआ नर्तक दल अउ राउत नर्तक दल मन ह अपन आकर्षक प्रस्तुति दीन।
एखर पहिली, श्री बघेल ह दुरूग जिला के जंजगिरी अउ कुम्हारी गांव म प्रदेसवासी मनके मंगलकामना खातिर सांटा के प्रहार झेले के रस्म निभाईस। ए मउका म मुख्यमंत्री ह लोगन ले किहीन कि ए दारी देवारी तिहार कोरोना काल म आय हवय। एखर सेती मास्क पहिनना अउ साबुन ले होना जरूरी हवय।
बिरसा मुण्डा-जयंती
प्रधानमंत्री नरेन्द्र मोदी ह बिरसामुंडा के जयंती म आज ओमन ल श्रद्धांजलि अर्पित करीन। श्री मोदी ह किहीन बिरसा मुंडा सही मायने म गरिबहा मनके मसीहा रिहीस। ऐति, छत्तीसगढ़ के राज्यपाल अनुसुईया उइके अउ मुख्यमंत्री भूपेश बघेल ह आदिवासी नेता अउ स्वतंत्रता संग्राम सेनानी बिरसा मुंडा के जयंती म उंखर योगदान ल सुरता करके ओमन ल अपन श्रद्धांजलि अर्पित करीन।
कोरोना समाचार/जागरूकता
छत्तीसगढ़ म कोरोना संक्रमित मरीज मनके संख्या दू लाख दस हजार ले जादा बाढ़ गे। अभी 19 हजार ले जादा मरीज मनके आने-आने अस्पताल या होम आइसोलेशन म इलाज चलत हवय। इही बीच, काली प्रदेस म 716 नवा मामला आगू आय हे। उहें, कोरोना ले 17 लोगन मनके मउत घलो होय हे।
ऐति, कोरोना संक्रमण ल लेके डाॅक्टर मन लोगन ल जागरूक करत हवय कि कोनों मनखे म अगर कोरोना के लक्षण दिखय त ओखर तुरते जांच कराय, जेखर ले ए बीमारी ल बाढ़े ले रोके जा सकय।
इही बीच, छत्तीसगढ़ के प्रसिद्ध सूफी गायक पद्मश्री मदन सिंह चैहान ह लोगन मन ले कोरोना वायरस ले बचाव खातिर जरूरी सावधानी बरते के अपील करीन हे। ओमन अपन एक गीत के माध्यम ले लोगन तक संदेस पहुंचाय के प्रयास करीन हे।
शहीद जवान-परिजन मुलाकात
प्रदेस के आने-आने जिला मन म जिला प्रसासन अउ पुलिस के अधिकारी मन देवारी के मउका म सहीद जवान मनके घर वाले मन ले मुलाकात करे बर ओखर घर जावत हे।
इही कड़ी म कोंडागांव जिला के एस.डी.एम. कपिल चन्द्रा अउ आने-आने अधिकारी मन ह आज सहीद जवान मनके परिवार वाले मन ले भेंटवार्ता करीन अउ उंखर हालचाल जानीन। ए अधिकारी मन ह मुख्यमंत्री के सुभकामना संदेस के संगेसंग सहीद जवान मनके परिजन मन ल भेंट स्वरूप उपहार दीन।
श्रम मंत्रालय-सामाजिक सुरक्षा
केन्द्रीय श्रम मंत्रालय ह सामाजिक सुरक्षा ले संबंधित संहिता के तहत प्रारूप नियम मन ल अधिसूचित कर देहे। प्रारूप नियम मन म करमचारी भविष्य निधि, करमचारी राज्य बीमा निगम, असंगठित क्षेत्र के काम करइया ले संबंधित उपकर के बारे म संहिता म बताय गे प्रावधान मन ल लागू करे के बेवस्था हे। मंत्रालय ह हितधारक मन ले ए बारे म आपत्ति अउ सुझाव मंगाय हवय। मंत्रालय ह किहीस कि प्रारूप नियम के अधिसूचना के तारीख ले पैंतालीस दिन के अवधि के भीतर आपत्ति अउ सुझाव दिए जा सकत हे।
प्रारूप नियम मन म केन्द्र सरकार के पोर्टल म असंगठित काम करइया अउ प्लेटाफाॅर्म काम करइया समेत अधार के पंजीकरण के बेवस्था हे।
मतदाता सूची-पुनरीक्षण
भारत निर्वाचन आयोग के निरदेस के मुताबिक छत्तीसगढ़ म ए समय बिसेस संक्षिप्त मतदाता पुनरीक्षण के काम चलत हवय। एमा अवइया 16 नवंबर के विस्तृत मतदाता सूची के प्रकाशन करे जाही। एखर बाद 16 नवंबर ले -15 दिसंबर के बीच दावा-आपत्ति प्रस्तुत करे जा सकही। प्राप्त दावा-आपत्ति के निराकरण पांच जनवरी तक करे जाही।
राज्य के मुख्य निर्वाचन पदाधिकारी रीना बाबा साहेब कंगाले ह बतईन कि मतदाता सूची के अंतिम प्रकाशन 15 जनवरी 2021 तक कर दे जाही। ए कारीकरम के तहत अइसन युवा मतदाता जेखर आयु 01 जनवरी 2021 तक 18 वर्ष हो जही, ओमन ए मतदाता सूची म अपन नाव जुड़ा सकत हे।
माशिमं आवेदन पत्र
छत्तीसगढ़ माध्यमिक शिक्षा मंडल के हाईस्कूल, हायरसेकण्डरी अउ व्यावसायिक मुख्य परीक्षा खातिर आवेदन पत्र सामान्य शुल्क के साथ पंद्रा दिसंबर तक जमा कराये जा सकत हे। उंहें प्रायवेट अउ अवसर परीक्षा खातिर विद्यार्थी विलंब शुल्क के साथ इकतीस दिसंबर तक आवेदन पत्र जमा कर सकहीं।
छत्तीसगढ़ माध्यमिक शिक्षा मंडल के सचिव प्रोफेसर व्ही.के. गोयल ह बताइन कि आवेदन पत्र मंडल के वेबसाइट म आॅनलाईन जमा करे जा सकही।