तहसील कार्यालय शुभारंभ
मुख्यमंत्री भूपेश बघेल ह आज अपन रायपुर के निवास कार्यालय ले प्रदेश के तेईस ठन नवा तहसील मनके शुरूआत करीन। ओमन ह उम्मीद जताइन कि नवा तहसील बने ले आम लोगन ल राजस्व के काम म आसानी होही। प्रदेश के पंद्रा जिला म नवा तहसील बनाय गे हावय।
समारोह म श्री बघेल ह तेईस ठन नवा तहसील अउ चार ठन पुराना तहसील बर कार्यालय भवन निर्माण अउ एक-एक ठिन गाड़ी के मंजूरी दे जाय के घोषणा करीन।
कार्यक्रम म मुख्यमंत्री ह लोगन ले देवारी बर शिल्पकार मन डहार ले बनाये परंपरागत मिट्टी के दिया अउ मूर्ति के संग दूसर चीज खरीदे के अपील करीन।
धान खरीदी पंजीयन
राज्य सरकार ह किसान मनके सुविधा बर समर्थन मूल्य म धान खरीदी के पंजीयन तारीख बढ़ा दे हवय। अब किसान मन ह सतरा नवंबर तक पंजीयन करा सकही। मुख्यमंत्री भूपेश बघेल के निर्देश म ए संबंध म राज्य सरकार डहार ले एक ठन आदेश जारी करे गेहे।
एखर पहिली धान खरीदी पंजीयन बर आखरी तारीख दस नवंबर तय करे गे रीहिस। एमा सांसद छाया वर्मा अउ महिला बाल विकास मंत्री अनिला भेड़िया संघरा कतकोन जनप्रतिनिधि मन ह मुख्यमंत्री ले भेंट करके पंजीयन के तारीख ल आगू बढ़ाय के मंाग करे रीहिन।
सिंहदेव/अकबर/चैबे – लोकार्पण
स्वास्थ्य मंत्री टी.एस. सिंहदेव ह कीहिन कि आखरी व्यक्ति तक स्वास्थ्य सुविधा पहुंचाना सरकार के प्रमुख लक्ष्य म शामिल हे।
श्री सिंहदेव ह स्वास्थ्य विभाग के आने आने योजना के समीक्षा करत कीहिन कि जादा ले जादा योग्य लोगन ल ए योजना के फायदा पहुंचय, ये तय करे के जरूरत हे। ओमन यहू घलो कीहिन कि अस्पताल मन म चिकित्सा विशेषज्ञ मनके कमी ल दूर करे के हरसंभव प्रयास करे जाही।
उंहें कृषि मंत्री रविंद्र चैबे ह काली बेमेतरा जिला के साजा क्षेत्र म करीबन संतावन करोड़ रूपिया के विकास काम के लोकार्पण अउ भूमिपूजन करीन। ए मउका म कृषि मंत्री ह ग्रामीण मनके मांग म सैगोना अउ कुरूद के बीच बरसाती नाला म बड़े पुल बनाय के आश्वासन दीन।
इही बीच पर्यावरण मंत्री मोहम्मद अकबर ह मीडिया ल भरोसा देवइन कि उंखर ले जुड़े सबो मंाग के निपटारा प्राथमिकता के संग करे जाही। ये बात श्री अकबर ह काली कवर्धा म जिला प्रेस क्लब के लोकार्पण के मउका म कीहिन । ओमन ह मीडिया कर्मी मन ल भूमि आबंटन ले जुड़े मंाग बर संबंधित प्रक्रिया ल पूरा करे के भरोसा देवइन ।
कोरोना समाचार/जागरूकता
पाछू कुछएक दिन ले प्रदेश म कोरोना संक्रमण के मामला म थोरबहुत कमी दर्ज करे गेहे। फेर संक्रमित मरीज मनके मृत्युदर म बढ़ोत्तरी ल चिंताजनक बताये जावत हे। डॅाक्टर मनके अनुसार कोरोना के लक्षण दिखे के बाद तुरते जांच नइ कराय म अउ इलाज मिले म देरी होय के सेती कतकोन मरीज मनके मौत होवत हे।
चिकित्सक मनके कहना हे कि लक्षण दिखते साथ कहंू ओ मरीज मन ह जांच करा लेतीन अउ इलाज शुरू हो जातीस त उंखर मनके जान बचाय जा सकत रीहिस।
इही बीच कंाकेर जिला म कोविड नाइंटिन के नोडल अधिकारी डॅाक्टर डी.के. रामटेके ह लोगन ले कोरोना ले बचाव बर जरूरी सावधानी बरते बर कीहिन हे।
केबिनेट दर्जा
राज्य सरकार ह पांच ठन आयोग के अध्यक्ष मन ल केबिनेट मंत्री के दर्जा दे हवय।
मंत्रालय ले जारी एक ठन आदेश के अनुसार राज्य गौ सेवा आयोग के अध्यक्ष महंत रामसुंदर दास, राज्य महिला आयोग के अध्यक्ष डॅाक्टर किरणमयी नायक, राज्य अल्पसंख्यक आयोग के अध्यक्ष महेंद्र सिंह छाबड़ा अउ राज्य पिछड़ा वर्ग के अध्यक्ष थानेश्वर साहू के संग राज्य खाद्य आयोग के अध्यक्ष गुरप्रीत सिंह बाबरा ल केबिनेट मंत्री के दर्जा देगे हवय।
आदेश म यहू स्पष्ट करे गे हवय कि आयोग अध्यक्ष मन ल केबिनेट मंत्री के दर्जा सिरिफ शिष्टाचार बर देगे हवय। ओमन ल नियम के अनुसार सुविधा देवाय के जिम्मेदारी संबंधित प्रशासनिक विभाग या आयोग के होही।
सीएमओ नोटिस
स्वच्छ भारत मिशन म शौचालय निर्माण प्रकिया म लापरवाही बरते के मामला म नगरीय अउ प्रशासन विभाग ह अंबिकापुर अउ रायगढ़ नगर निगम के आयुक्त संघरा उन्नीस ठन नगर पालिका अउ पंचायत के मुख्य कार्यपालन अधिकारी मन ल कारण बताओ नोटिस जारी करे हे ।
विभाग के संचालक अलरमेल मंगई डी ह सबो अधिकारी मन ल नोटिस के जुआब सात दिन के भीतर देबर कीहिन हे अउ जुआब नइ दे म उंखर मनके खिलाफ कार्रवाई करे जाही।
मुख्यमंत्री-के.के.धु्रव मुलाकात
मुख्यमंत्री भूपेश बघेल ले आज बीहनिया रायपुर के उंखर निवास म मरवाही उप चुनाव म नवा चुने गे विधायक डॅाक्टर के.के. ध्रुव ह भेंट करीन। मुख्यमंत्री ह उप चुनाव म मिले जीत म खुशी जताइन। ओमन ह डॅाक्टर ध्रुव अउ गौरेला-पेण्ड्रा -मरवाही जिला के प्रभारी मंत्री जयंिसंह अग्रवाल ल अपन शुभकामना दीन हे।
रायपुर-सिनेमा हाॅल
राजधानी रायपुर म पाछू करीबन छै महीना ले बंद मल्टीप्लेक्स अउ सिंगल स्क्रीन सिनेमा हाॅल काली ले खोल दे जाही। रायपुर जिला कलेक्टर डॅाक्टर एस. भारतीदासन ह ए संबंध म आदेश जारी करीन हे। फेर मल्टीप्लेक्स अउ सिनेमा हाॅल ल दर्शक मनके आधा संख्या के संग शुरू करे जाही। कोरोना संक्रमण के सेती हर सीट के आसपास छै फीट के दूरी के नियम के पालन करना जरूरी होही।
माओवादी समर्पण
दंतेवाड़ा जिला म माओवादी मनके घर वापसी बर चलत लोन वर्राटू अभियान ले प्रभावित होके एक झन इनामी संघरा सात झन माओवादी मन ह टेंटम कैम्प म पुलिस अधीक्षक अभिषेक पल्लव के आगू आत्मसमर्पण करीन हे। जेखर बाद ए मन ल प्रोत्साहन राशि घलो देगे हवय। पुलिस अधीक्षक ह बताइन कि पाछू चार महीना म लोन वर्राटू अभियान म एक सौ पंचानवे माओवादी मन ह समाज के मुख्यधारा म शामिल होगे हवय।
आॅनलाइन ठगी मामला
रायगढ़ पुलिस ह बैंक खाता ले आॅनलाइन ठगी के मामला म एक ठन गिरोह के परदाफाश करे हे। पुलिस ह एक झन आरोपी ल झारखंड ले गिरप्तार करे हे। पुलिस अधीक्षक संतोष कुमार सिंह ह बताइन कि पाछू महीना आरोपी मन ह एक झन सेवानिवृत्त सहायक उप निरीक्षक के खाता ले फर्जीवाड़ा करके दस लाख रूपिया ले जादा के राशि निकाल ले रीहिन। मामला के जांच के बाद पुलिस के टीम ह झारखंड जाके एक झन आरोपी ल गिरप्तार करे हे, अउ गिरोह के मुख्य सरगना के तलाश करत हे।
उंहें कोंडागांव जिला म केशकाल पुलिस ह करीबन साढ़े तीन किलो गांजा के संग एक झन आरोपी ल गिरप्तार करे हे।
अपहरण मामला
राजनंादगंाव म पाछू महीना एक झन ढाबा संचालक के बेटा के अपहरण के मामला म पुलिस ह एक झन अउ आरोपी ल गुजरात के सूरत ले गिरप्तार करे हे। अभी तक ए मामला म तीन झन आरोपी के गिरप्तारी होगे हावय अउ पांच झन आरोपी मनके तलाश होवत हे।
उंहे महासमंुद के फिंगेश्वर म अगवा करे गे लइका ल छै घंटा के भीतर पुलिस ह आरोपी मनके चंगुल ले छुड़ा ले हवय। पुलिस के अनुसार लइका के मामा ही अपहरणकर्ता निकलिस जउन ह लइका ल घुमाय के बहाना बनाके अगवा करे रीहिस अउ ओखर बाद पांच लाख रूपिया के फिरोती के मांग परिवार वाले मनले करे रीहिस।
टेªन परिचालन
देवारी अउ छठ तिहार के मउका म रेलगाड़ी म बाढ़त भीड़ के सेती रेलवे प्रशासन डहार ले उपराहा यात्री गाड़ी अउ उपराहा कोच लगाय के बेवस्था करे जावत हे।
एमा दुर्ग-छपरा अउ दुर्ग-भोपाल स्पेशल ट्रेन म काली ले सतरा नवंबर तक उपराहा कोच लगाये जाही। उंहें अमृतसर-बिलासपुर पूजा स्पेशल ट्रेन तेरा नवंबर के अमृतसर के बजाय मेरठ स्टेशन ले शुरू होही। ए ट्रेन अमृतसर ले मेरठ के बीच रद्द रीही।