मरवाही उपचुनाव-कंाग्रेस जीत
मरवाही विधानसभा उपचुनई म कंाग्रेस ह निर्णायक बढ़त हासिल करे हे । सूत्र के मुताबिक कंाग्रेस प्रत्याशी डॅाक्टर के.के. ध्रुव ह भाजपा के डॅाक्टर गंभीर सिंह ल अड़तीस हजार ले जादा वोट ले जीत हासिल करे हे। फेर आधिकारिक घोषणा अभी तक नइ होय हे ।
कंाग्रेस प्रत्याशी ह पहिली चक्र ले अपन बढ़त बनाले रीहिस । जेहा आखरी चक्र तक चलीस। डाकमत पत्र म घलो कंाग्रेस प्रत्याशी ह आगू रीहिस।
रबी फसल पानी
प्रदेश म अवइया रबी सीजन म फसल मनके सिंचई बर आने आने बांधा अउ जलाशय ले पानी दे जाही। जल संसाधन मंत्री रविंद्र चैबे के अध्यक्षता म राखे गे राज्य स्तरीय जल उपयोगिता समिति के बइठका म ये फैसला ले गीस।
रबी सीजन म सिंचई, बांधा अउ जलाशय मनले करीबन दू लाख सोला हजार हेक्टेयर क्षेत्र म पानी देके लक्ष्य राखे गेहे। जल संसाधन मंत्री ह विभागीय अधिकारी मन ल निर्देश दीन कि एखर जानकारी किसान मन ल पहिली ले दे जाय, जेखर ले किसान मन ह बीजा खातु के बेवस्था कर सकही।
बीज निगम बैठक
कृषि मंत्री ह कीहिन हे कि प्रदेश म किसान मनके हित के अनदेखी बरदाश्त नइ करे जाय। श्री चैबे ह राज्य बीज अउ कृषि विकास निगम के संचालक मंडल के बइठका म समिति अउ निजी विक्रेता मन डहार ले किसान मन ल दे जाय खातु बीजा अउ खेती किसानी वाले मशीन के गुणवत्ता उपर नजर राखे के सलाह अधिकारी मन ल दीन। बइठका म कीटनाशक दवई के गुणवत्ता ल लेके मिलत शिकायत उपर अधिकारी मन ल कड़ा कार्रवाई करे के निर्देश दीन।
कोरोना समाचार-जागरूकता
प्रदेश म कोरोना संक्रमण ले बचाव अउ एला रोके बर प्रशासन डहार ले कतकोन परयास करे जावत हे। रायपुर कलेक्टर डॅाक्टर एस.भारतीदासन ह ए बारे म स्वयंसेवी संस्था के प्रतिनिधि मनले बइठका लीन । बइठका म बताइन कि कोरोना संक्रमण के खतरा अभी टले नइ हे। लोगन मन ह मास्क लगाके ही घर ले बाहिर निकलय । तिहार के बेरा म बाजार मन म भीड़भाड़ ल देखत लोगन मन ल जागरूक होना जरूरी हे। रायपुर के मुख्य बाजार म टावर लगाके माईक के माध्यम ले लोगन मन ल जागरूक करे जाही। अउ संगेसंग व्यापारी संघ के प्रतिनिधि मन ल खुदे अउ दुकान म काम करइया कर्मचारी मनके घलो कोरोना टेस्ट कराना चाही।
उंहें यूनिसेफ के स्वास्थ्य विशेषज्ञ डॅाक्टर श्रीधर ह बताइन कि लईका मन ल कोरोना संक्रमण ले बचाना बहुते जरूरी हे। एति प्रदेश म कोरोना संक्रमित मरीज मन ल दे जात स्वास्थ्य सुविधा म सरलग बढ़ोत्तरी होवत हे।
बिलासपुर के एक झिन दंात के डॅाक्टर वैशाली गोवर्धन ह लोगन मनले कोरोना ले बचाव बर जरूरी सावधानी बरते के अपील करे हे।
ईडी-कार्रवाई
प्रर्वतन निदेशालय – ईडी ह प्रदेश के पूर्व आईएएस अधिकारी बाबूलाल अग्रवाल के संगेसंग उंखर दू झिन भाई मन ल मनी लाॅन्ड्रिंग अउ गांव के लोगन मनके बेनामी खाता खोलवाय के मामला म गिरप्तार करे हे। प्रर्वतन निदेशालय ह ए मन ल आज रायपुर जिला न्यायालय म पेश करीन।
जानबा के मुताबिक पहिली घलो बाबूलाल अग्रवाल के खिलाफ सीबीआई अउ ईडी ह एके संघरा कार्रवाई करे रीहिन।
माओवादी आत्मसमर्पण
कोंडगांव जिला म आज दू झिन माओवादी मन ह पुलिस अधीक्षक के आगू आत्मसमर्पण करीन, जेमा एक झिन माइलोगिन माओवादी घलो सामिल हे । ए दूनो माओवादी मन उपर आठ-आठ लाख रूपिया के इनाम घोषित रीहिस।
एति दंतेवाड़ा जिला म पुलिस डहार ले बदलेम एड़का- बदलता मन अभियान के शुरूआत करे गीस। पुलिस अधीक्षक ह बताइन कि लोन वर्राटू अभियान के तहत आत्मसमर्पित अउ जेल म बंद या फेर रिहा होवइया माओवादी अउ माओवाद ले प्रभावित परिवार मनके काउंसिलिंग करके ए मन ल सम्मान पूर्वक जिनगी जीये बर पे्ररित करे जाही।
एनजीटी/पटाखा-समय
राष्ट्रीय हरित अधिकरण- एनजीटी के आदेश के बाद प्रदेश म देवारी, छठ, गुरूपर्व, नवासाल अउ क्रिसमस के मउका म पटाखा फोड़े के बेरा तय कर दे गेहे।
आदेश के मुताबिक देवारी परब म रतिहा आठ बजे ले दस बजे तक फटाखा फोड़े जा सकथे। त उंहें छठ पूजा के दिन बीहनिया छै बजे ले आठ बजे तक गुरूपरब म रात आठ बजे ले दस बजे तक, नवा साल अउ क्रिसमस के मउका म रतिहा ग्यारा बजके पचपन मिनट ले साढे़ बारा बजे तक पटाखा फोड़े के मंजूरी दे गेहे।
अइसने पटाखा के परयोग के बारे म उच्चतम न्यायालय डहार ले जारी निर्देश म कम प्रदूषण वाले पटाखा के परयोग करे के बात केहे गेहे। सीरीज पटाखा अउ लड़ी मनके बेचे उपर रोक लगाय गेहे। त उंहें आॅनलाईन बेचे उपर रोक लगा दे गेहे। राज्य शासन डहार ले वायु प्रदूषण ल देखत एनजीटी के आदेश के प्रदेश म कड़ाई ले पालन कराय के निर्देश दे गेहे।
मुख्यमंत्री दौरा
मुख्यमंत्री भूपेश बघेल ह आज दुर्ग जिला के पाटन म स्वामी आत्मानंद पुष्प वाटिका सौंदर्यीकरण के संगेसंग आने आने बनत काम मनके लोकार्पण करीन।
मुख्यमंत्री ह पाटन के एसडीएम अउ तहसील कार्यालय के शुरूआत करत नवा भवन के भूमि पूजन करीन। ए मउका म ओमन स्वर्गीय सुखचैन लाल भाले के प्रतिमा के अनावरण करीन।
हाथी उत्पात
कोरिया जिला के खड़गंवा क्षेत्र के कतकोन गांव मन म ए बेरा पैंतालिस ठिन हाथी के दल ह घूमत हे। हाथी मनके दल ह मुगुमबारी, बड़ेकलवा, काशबहरा, धनपुर, गैरबना अउ धनरास के गांव मन म उत्पात मचाये के संगेसंग पांच ठिन घर ल नुकसान पहुंचाय हे। ए दउरान हाथी मनके हमला ले दू ठिन मवेशी के मउत होगे। वन विभाग के टीम ह हाथी मन उपर नजर राखे हे अउ लोगन मन ल सतर्क रेहे के समझाईश देहे।
एति महासमुंद जिला म घलो हाथी मन ह कोकोभाटा म एक ठिन मवेशी उपर हमला कर दीन। ए हाथी मन ह फसल मन ल नुकसान पहुंचावत चरोदा जंगल कोति गे हवय।
हादसा
महासमुंद जिला म राष्ट्रीय राजमार्ग क्रमांक तिरपन म पटेवा के तीर ट्रक के टक्कर ले फटफटी म बइठे दू झिन मनखे के मउत होगे। दूनो मनखे मन टूमसा गांव ले वापिस लहुटत रीहिन।
एति भिलाई ईस्पात संयंत्र म एस.एम.एस.-दो कास्टर शाॅप के तीर आज पोकलेन ले टकरा के गिरे पाईप के चपेट म आय ले एक झिन माइलोगिन मजूर के मउत होगे अउ दू झिन माइलोगिन मन गंभीर रूप ले घायल हो गेहे।
अउ अब थोरकुन समाचार सार म-
– जनसंपर्क विभाग के विभागीय परीक्षा उनतीस जनवरी ले एक फरवरी तक होही।
– प्रदेश म सामाजिक चेतना उत्थान राज्य अलंकरण पुरस्कार के घोषणा नइ करे जाय ल लेके भाजपा अनुसूचित जनजाति मोर्चा के कार्यकर्ता मन ह आज महासमुंद म धरना प्रदर्शन करीन।
– नगरपालिक निगम राजनंादगांव के कर्मचारी मन ह देवारी तिहार के मउका म सितंबर अउ अक्टूबर महीना के तनखा के संग अग्रिम राशि के भुगतान करे जाय के मांग करे हे।
– राज्य बाल कल्याण परिषद डहार ले बछर दू हजार उन्नीस-बीस के राज्य शौर्य पुरस्कार बर तीस दिसंबर तक अर्जी मंगाय हे।
– दुर्ग पुलिस ह आने आने जिला म ठगी करे के मामला म एक झिन आरोपी ल रायपुर ले गिरप्तार करे हे।
अउ
– महासमुंद जिला म डूरीडीह के तीर पुलिस ह फटफटी म सवार तीन झिन मनखे ल गिरप्तार करके उंखर मनके तीर ले चार किलो के गांजा बरामद करे हे।