आज दिनभर के खबर ल अपन गुरतुर छत्तीसगढ़ी भाखा म पढ़व

निर्वाचन आयोग राज्यसभा

भारत निर्वाचन आयोग ह पंद्रह ठन राज्य म राज्यसभा के संतावन ठन सीट बर चुनाव के घोषणा कर देहे। एमा छत्तीसगढ़ के घलो दू ठन सीट शामिल हे। भाजपा के राज्यसभा सांसद रामविचार नेताम अउ कांग्रेस के छाया वर्मा के कार्यकाल इही बछर उनतीस जून के सिरावत हे।
भारत निर्वाचन आयोग के जारी राज्यसभा चुनाव के कार्यक्रम के अनुसार ए चुनाव के अधिसूचना चौबीस मई के जारी करे जाही। एखरे संग नामांकन के प्रक्रिया घलो शुरू होही। राज्यसभा बर इकतीस मई तक नामांकन दाखिल करे जा सकही। एक जून के नामांकन पत्र के जांच होही अउ तीन जून तक उम्मीदवार ल नामांकन पत्र वापस लेके मउका दे जाही। जरूरत पड़े म दस जून के राज्यसभा बर मतदान कराय जाही। इही दिन मतगणना के बाद विजेता के घोषणा कर दे जाही।

रोजगार सहायक-मानदेय

मुख्यमंत्री भूपेश बघेल ह महात्मा गांधी राष्ट्रीय ग्रामीण रोजगार गारंटी योजना मनरेगा के रोजगार सहायक मनके मानदेय ल पांच हजार अउ छै हजार रूपिया ले बढ़ाके कलेक्टर दर के अनुसार नौ हजार पांच सौ चालीस रूपिया करे के घोषणा करीन हे। मुख्यमंत्री ह आज रायपुर म मनरेगा के रोजगार सहायक मनके एक ठन प्रतिनिधि मंडल ले गोठबात के दउरान ये घोषणा करीन।
मुख्यमंत्री ह रोजगार सहायक मनके सेवा शर्त ले जुड़े मांग के बारे म कीहिन कि ए संबंध म राज्य स्तर म बनाये गे समिति ले प्रतिवेदन मिले के बाद फैसला करे जाही।

बॉक्साइट एमओयू

छत्तीसगढ़ के बॉक्साईट अउ लेटराइट भंडार के भू तकनीकी मूल्यांकन करे जाही। एखर ले बॉक्साइट के कमी ले जूझत उद्योग मन ल फायदा मिलही। एखर बर छत्तीसगढ़ विज्ञान अउ प्रौद्योगिकी परिषद-सीकॉस्ट अउ जवाहरलाल नेहरू एलुमिनियम अनुसंधान, विकास अउ अभिकल्प केंद्र खनिज मंत्रालय के बीच एमओयू होय हे। दूनो संस्थान अंतरिक्ष प्रौद्योगिकी के मदद ले ए खनिज मनके भंडारण के जिलेवार डिजिटल डेटाबेस बनाही।

अंतर्राष्ट्रीय नर्स दिवस

आज अंतर्राष्ट्रीय नर्स दिवस हे। ये दिन ल पूरा दुनिया म समाज बर नर्स मनके योगदान के सम्मान म मनाये जाथे। आजेच आधुनिक नर्सिंग के संस्थापक फ्लोरेंस नाइंटिगेल के जनमदिन घलो हे।
प्रधानमंत्री नरेंद्र मोदी ह लोगन के बीमारी के देखभाल म नर्स मनके योगदान के तारीफ करीन हे। एक ठन ट्वीट म ओमन कीहिन हे कि उंखर मनके समर्पण अउ करूणा सीखे के लइक हे।
छत्तीसगढ़ के मुख्यमंत्री भूपेश बघेल ह अंतर्राष्ट्रीय नर्स दिवस म सेवाभाव के प्रतिमूर्ति सबो नर्स मन ल बधाई अउ शुभकामना दीन हे।

माओवादी आईईडी बरामद

बीजापुर जिला म सीआरपीएफ अउ जिला बल के संयुक्त गश्त पार्टी ह पांच किलो के प्रेशर कुकर आईईडी बरामद करे हे। माओवादी मन ह ये आईईडी  ल नेलसनार थाना क्षेत्र के फुण्डरी गांव म इंद्रावती नदी म नवा बनत पुलिया के तीर लगाये रीहिन। अतिरिक्त पुलिस अधीक्षक डॅाक्टर पंकज शुक्ला ह एखर पुष्टि करत बताइन कि सुरक्षा बल ल नुकसान पहुंचाये बर माओवादी मन ह ये आईईडी ल लगाये रीहिन। जेला बीडीएस के टीम ह निष्क्रिय कर दीन।

राजनांदगांव निगम बजट

राजनांदगांव नगर निगम के महापौर हेमा सुदेश देशमुख ह आज विपक्ष के हंगामा के बीच बछर दू हजार बाईस-तेईस के बजट पेश करीन। चार सौ पैसठ करोड़ उन्यासी लाख नब्बे हजार रूपिया के अनुमानित बजट म पच्चीस लाख इकसठ रूपिया के घाटा बताय गे हावय। बजट पेश करे के दउरान नगर निगम  सभापति ह भाजपा पार्षद गगन आईच ल निलंबित करीन। जेखर विरोध म भाजपा पार्षद दल ह बइठका के बहिष्कार करत सदन ले वॉकआउट करके विरोध प्रदर्शन करीन।

दुर्घटना

प्रदेश म पाछू चौबीस घंटा के दउरान होय दू ठन अलग-अलग सड़क हादसा म पांच झन बाराती मनके मउत होगे। उंहें बाईस झन घायल होगे हवय। मिले जानकारी के अनुसार राजनांदगांव जिला म पाछू रतिहा बाराती मनले भरे एक ठन गाड़ी के पलटे ले तीन झन मनखे के मउत होगे उंहें सोला झिन घायल होगे हवय। घायल मनल गंडई के सामुदायिक स्वास्थ्य केंद्र म भर्ती कराय गे हवय। गंभीर रूप ले घायल छै झिन लोगन ल राजनांदगांव मेडिकल कॉलेज अस्पताल रेफर करे गीस। सबो बाराती मन मालवाहक गाड़ी म बइठके पंचदेवरी गांव ले गंडई लहुटत रीहिन, तभे धोधा गांव के तीर उंखर मनके गाड़ी अंतेतंते होके पलट गीस।
उंहें धमतरी जिला के नगरी-सिहावा रोड म सियादेही के तीर एक ठन गाड़ी के पलटे ले दू झिन बाराती मनके मउकाच म मउत होगे अउ छै झिन ले जादा घायल होगिन। ए मन सबो झन गरियाबंद ले धमतरी के तरसीवां आवत रीहिन तभे सियादेही के पास ये हादसा होइस।

जीपी सिंह जमानत

आय ले जादा संपत्ति के मामला म गिरप्तार आईपीएस जीपी सिंह ल छत्तीसगढ़ हाईकोर्ट ह जमानत दे देहे। होईकोर्ट ह श्री िंसंह ल पचास हजार बॉंड के सशर्त जमानत देहे। कोर्ट ह केहे हे कि जीपी सिंह ह राज्य के बाहिर रइही अउ सेशन कोर्ट या हाईकोर्ट म बलाये म पेशी म मौजूद रीही।
खबर के मुताबिक हईकोर्ट ले जमानत नइ मिले म जीपी सिंह ह सुप्रीम कोर्ट चल दे रीहिन। सुप्रीम कोर्ट ह हाईकोर्ट ल जमानत याचिका म जल्दीच सुनवाई के आदेश दे रीहिन। जीपी सिंह ह गिरप्तारी के बाद करीबन एक सौ बीस दिन जेल म रीहिन।

रणजी कप्तान धोखाधड़ी

छत्तीसगढ़ के रणजी टीम के कप्तान आईपीएल खिलाड़ी हरप्रीत सिंह भाटिया के खिलाफ धोखाधड़ी के मामला दर्ज करे गे हावय। उंखर मन उपर आरोप हे कि ओमन ह लेखाकार पद बर बुंदेलखंड विश्वविद्यालय के फर्जी मार्कशीट बनाके सरकारी नौकरी बर आवेदन करे रीहिन।
छत्तीसगढ़ प्रदेश कांग्रेस कमेटी खेलकूद प्रकोष्ठ के प्रदेश अध्यक्ष प्रवीण जेन ह एला गंभीर अउ दुर्भाग्यपूर्ण घटना बताय हे।

विशेष ओपीडी

प्रदेश म रायपुर अउ बिलासपुर के शासकीय आयुर्वेदिक महाविद्यालय चिकित्सालय म मानसिक समस्या ले जूझत लोगन मन बर विशेष ओपीडी शुरू करे गेहे। हर शुक्रवार के एमा मरीज मनल  आयुर्वेद ले जुड़े उपचार अउ स्वस्थ जीवन शैली के बारे म परामर्श निशुल्क दे जावत हे। आयुष संचालनालय के सहायक संचालक डॅाक्टर विजय साहू ह बताइन कि जरूरत के अनुसार मरीज मन ल पंचकर्म सेवा घलो मिलही।

महिला समूह कालीन

सरगुजा जिला के बटवाही गौठान के माइलोगिन मन अब कालीन घलो बनावत हे। एखर बर ओमन ल छत्तीसगढ़ हस्तशिल्प विकास बोर्ड डहार ले ट्रेनिंग देगे हवय। बोर्ड डहार ले ओमन ल कच्चा माल देवाय जावत हे। जेखर ले माइलोगिन मन ल अब स्थानीय स्तर म रोजगार मिलत हे। ओमन ल रोज करीबन दू सौ पचास रूपिया के कमई होवत हे।
भेंट मुलाकात के दउरान मुख्यमंत्री भूपेश बघेल ह इंखर मन डहार ले बनाये गे कालीन के तारीफ करीन। माइलोगिन मन बताइन कि सरगुजा जिला के मैनपाट, लुण्ड्रा अउ सीतापुर म उंखर समूह डहार ले बनाये गे सत्तर ठन कालीन ल लाल बहादुर शास्त्री राष्ट्रीय प्रशासन अकादमी मसूरी भेजे गे हवय।

संक्षिप्त समाचार

– मुख्यमंत्री भूपेश बघेल ह वीडियो कॉन्फ्रेसिंग के माध्यम ले आज बिलासपुर हाइकोर्ट परिसर के महाधिवक्ता कार्यालय के नवा बने द्वितीय तल के लोकार्पण करीन। एखर निर्माण करीबन पौने दो करोड़ रूपिया के लागत ले करे गे हावय।
– बलरामपुर जिला के विकासखंड वाड्रफनगर म लिंक कोर्ट शुरू कर दे गेहे। अपर कलेक्टर लिंक कोर्ट म हर बुधवार के मामला के सुनवाई करही।
अउ
– कांकेर जिला के मनकेशरी डेम म काली पिकनिक मनाये बर गे एक झन युवक के डेम म डूबे ले मउत होगे। गोताखोर मनके मदद ले आज ओखर शव ल बरामद कर ले गेहे।