आज दिनभर के खबर ल अपन गुरतुर छत्तीसगढ़ी भाखा म पढ़व

प्रमुख समाचार –

विधानसभा मानसून सत्र

छत्तीसगढ़ विधानसभा के मानसून सत्र बीस जुलाई ले शुरू होही। विधानसभा सचिव दिनेश शर्मा ह बताइन कि सत्र सत्ताईस जुलाई तक चलही। सत्र के दउरान कुल छै बइठका होही। मानसून सत्र म वित्तीय कामकाज के संगेसंग आने सरकारी काम ल घलो निपटाय जाही।

कोरोना समाचार

प्रदेश म कोरोना संक्रमण के बाढ़त मामला ल देखत राज्य सरकार ह स्वास्थ्य विभाग ल सतर्क रेहे के निर्देश देहे। संगेसंग लोगन मन ल  कोरोना ले बचाव बर जारी निर्देश के पालन करे के घलो विनती करे हे। मुख्य सचिव अमिताभ जैन ह पाछू एक हफ्ता के दउरान प्रदेश म कोरोना मरीज मनके बाढ़त संख्या ल देखत स्वास्थ्य विभाग ल जरूरी कदम उठाय बर केहे हे अउ संगेसंग स्वास्थ्य विभाग ल बूस्टर डोज के टीकाकरण बढ़ाय के निर्देश घलो देहे।
जानबा के मुताबिक प्रदेश म काली करीबन साढ़े नौ हजार सैंपल के जांच म एक सौ इकतीस मनखे मन म कोरोना पाये गीस। सबले जादा उनतीस मरीज रायपुर जिला म मिले हे। उंहें दुर्ग जिला म इक्कीस, अउ सरगुजा जिला म सोला झिन नवा मरीज मिले हे। ए बेरा प्रदेश म कोरोना के पांच सौ पच्यासी मरीज मनके इलाज आने-आने अस्पताल अउ होम आइसोलेशन म चलत हे।

त्रस्तरीय पंचायत उपचुनाव

त्रिस्तरीय पंचायत उपचुनई म राज्य के इक्कीस जिला म आने-आने पंचायत संस्था मनके एक सौ सतरह पद के चुनई बर अठाईस जून के बीहनिया सात बजे ले मंझनियां तीन बजे तक वोट डारे जाही । एमा जनपद पंचायत सदस्य के तीन, सरपंच के बैंसठ अउ पंच के बावन पद सामिल हे। जउन पंचायत क्षेत्र मन म चुनाव होना हे, उंहा अठाईस जून के छुट्टी रइही।
ु चुनाव ले जुड़े क्षेत्र मन म छब्बीस ले अठाईस जून तक शराब के बेचे उपर रोक लगाय जाही। ए बारे म आबकारी विभाग ले जुड़े जिला के कलेक्टर मन ल निर्देश जारी कर दे गेहे।

आत्मानंद स्कूल निर्देश

प्रदेश के स्वामी आत्मानंद अंग्रेजी माध्यम स्कूल मन म जिहां हिंदी माध्यम के छात्र मन पढ़त हे। उंहा हिंदी माध्यम के पढ़ई कराय जाही। ए बारे म लोक शिक्षण संचालक ह जम्मों कलेक्टर अउ जिला शिक्षा अधिकारी मन ल निर्देश जारी करे हे। निर्देश म केहे गेहे कि हिंदी माध्यम के स्कूल मन म छात्र मन ल प्रवेश नइ दे जाय के शिकायत मिलत हे। लोक शिक्षण संचालक ह स्पष्ट करे हे कि एखर पहिली जारी करे गे निर्देश म घलो ये केहे गेहे कि हिंदी माध्यम के स्कूल मन म नवा छात्र मन ल प्रवेश लेबर नइ रोके जा सकय।
लोक शिक्षण संचालक ह पत्र म लिखे हे कि हिंदी माध्यम के पढ़ई बर स्कूल मन म अलग ले पद मंजूर करे गेहे।

माओवादी हमला

दंतेवाड़ा जिला के किरंदुल थाना क्षेत्र म बैलाडीला के पहाड़ी के नीचे खोले गे नवा पुलिस कैम्प उपर माओवादी मन ह पाछू रतिहा हमला कर दीन। जंगल कोति ले माओवादी मन ह कैम्प उपर ग्रेनेड लांचर के मदद ले पंद्रह ठिन ग्रेनेड ले हमला करीन अउ संगेसंग फायरिंग घलो करीन।
ए हमला ले सीएएफ के दू झिन जवान अउ दू झिन महिल मजदूर मन घायल होगे हे। जिला के पुलिस अधीक्षक सिद्धार्थ तिवारी ह बताइन कि माओवादी मन डहार ले करे गे गोलीबारी के जवाब म पुलिस अउ सुरक्षा बलके जवान मन ह जवाबी कार्रवाई करीन। घायल मनके स्थिति सामान्य बताये जात हे। पुलिस अधीक्षक ह बताइन कि खदान क्षेत्र के सुरक्षा ल देखत दंतेवाड़ा जिला के अतिसंवेदनशील जगा हिरोली म हालेच म एक ठिन नवा पुलिस कैम्प लगाय गेहे।

श्यामाप्रसाद मुखर्जी पुण्यतिथि

राष्ट्रवादी राजनेता डॅाक्टर श्यामाप्रसाद मुखर्जी के आज पुण्यतिथि हरय। ए मउका म उपराष्ट्रपति एम. वेंकैया नायडू प्रधानमंत्री नरेंद्र मोदी अउ आने नेता मन ह डॅाक्टर मुखर्जी ल श्रद्धाजंलि दे हवयं । उपराष्ट्रपति ह कीहिन कि डॅाक्टर मुखर्जी ह देश के एकता अउ अखंडता ल मजबूत करे बर अपन पूरा जीनगी ल लगा दीन।

भाजपा पोषण बैठक

छत्तीसगढ़ प्रदेश पोषण अभियान समिति के बइठका काली प्रदेश भाजपा कार्यालय म होइस। बइठका के अगवई करत प्रदेश भाजपा अध्यक्ष विष्णुदेव साय ह कीहिन कि छत्तीसगढ़ पोषण अभियान, कुपोषण के खिलाफ एक ठिन बड़का कदम हरय। ओमन कहिन कि जादा ले जादा लोगन मन ल ए अभियान म जोड़े के जरूरत हे।
ए मउका म नेता प्रतिपक्ष धरमलाल कौशिक ह कीहिन कि कुपोषण ल खतम करे बर केंद्र सरकार डहार ले जउन योजना चलाये जात हे। ओला लोगन मन तक पहुंचाना हे। बइठका म रायपुर के विधायक बृजमोहन अग्रवाल अउ छत्तीसगढ़ पोषण अभियान के प्रदेश संयोजिका हर्षिता पांडे के संगेसंग आने पदाधिकारी मन घलो अपन विचार राखीन।

नपाध्यक्ष अविश्वास प्रस्ताव

महासमुंद नगर पालिका अध्यक्ष प्रकाश चंद्राकर के विरूद्ध लगाये गे अविश्वास प्रस्ताव उपर बुलाये गे सम्मिलन के अध्यक्षता बर संयुक्त कलेक्टर अउ अनुविभागीय अधिकारी भागवत जायसवाल ल पीठासीन अधिकारी बनाय गेहे। ये अविश्वास प्रस्ताव उपर सम्मिलन चार जुलाई के होही।

जेईई मेंस

संयुक्त प्रवेश परीक्षा – जेईई मेंस आज ले शुरू होगे हे। राष्ट्रीय परीक्षा एजेंसी डहार ले देश के पांच सौ एक शहर अउ देश के बाहिर बाईस शहर मन म ए परीक्षा ले जात हे। राष्ट्रीय परीक्षा एजेंसी डहार ले स्नातक पाठ्यक्रम मन म प्रवेश बर साझा विश्वविद्यालय प्रवेश परीक्षा सीयूईटी देश के पांच सौ चौवन शहर अउ विदेश मनके तेरह शहर म पंद्रह जुलाई ले शुरू होही।

निशांत उपाध्याय-निधन

छत्तीसगढ़ी फिल्म के जाने माने अभिनेता अउ कोरियोग्राफर निशांत उपाध्याय के काली रतिहा निधन होगे। ओमन अबड़ दिन ले गंभीर बीमारी के इलाज करावत रीहिन। ओखर इलाज रायपुर के एक ठिन प्रायवेट अस्पताल म चलत रीहिस। निश्ांत उपाध्याय के निधन ले मुख्यमंत्री भूपेश बघेल अउ संस्कृति मंत्री अमरजीत भगत के संगेसंग छत्तीसगढ़ी फिल्म के कलाकार मन ह दुख जताय हे।

महासमुंद डकैती

महासमुंद जिला के खल्लारी म अज्ञात डकैत मन ह रायपुर के एक झिन घड़ी कारोबारी के सेल्समैन अउ ड्रायवर ल बंधक बनाके उंखर तीर ले नौ लाख रूपिया लूट लीन। पुलिस के मुताबिक सेल्समैन ह रायपुर ले वेन म सवार होके पईसा लेबर बागबाहरा गे रीहिन। तभे ए डकैत मन ह ड्रायवर अउ सेल्समैन ल बीच म रोक के अपन गाड़ी म बइठाके जंगल कोति ले जाके पेड़ म बांध दीन। आरोपी मन ह पईसा लेके भाग गे। पुलिस ह नाकाबंदी करके आरोपी के तलाश शुरू कर देहे।

मौसम

प्रदेस म अवइया चौबीस घंटा के दउरान कतकोन जगा म हल्का ले मध्यम बरसा या गरज-चमक के संग बौछार पड़े के संभावना हे। मौसम विभाग के मुताबिक ए बेरा दक्षिण-पूर्वी उत्तर प्रदेश के उपर एक ठिन चक्रीय चक्रवाती घेरा बने हे। जेखर प्रभाव ले प्रदेश म एक-दू जगा म गरज-चमक के संग भारी बरसा होय अउ गाज गिरे के चेतावनी घलो दे गेहे।
जानबा के मुताबिक ए बेरा प्रदेश म मानसून सक्रिय होय ले आने-आने जगा म हल्का ले मध्यम बरसा होय के समाचार मिले हे।

संक्षिप्त समाचार

– राज्यपाल अनुसुइया उइके ह रानी दुर्गावती के बलिदान दिवस म ओमन ल श्रद्धांजलि दे हवय। ओमन अपन संदेस म कीहिन कि रानी दुर्गावती के पूरा जिनगी ह समाज बर प्रेरणादायी हवय।
– छत्तीसगढ़ लोक सेवा आयोग ह कौशल विकास अउ तकनीकी शिक्षा के संगेसंग रोजगार विभाग के प्राचार्य वर्ग एक अउ प्राचार्य वर्ग दू के उनचास पद बर चयनसूची जारी कर देहे।
– कोरबा जिला के आमाटीकरा गांव म महुआ तिहार के दउरान सामाजिक भोज म सामिल होय गांव के लोगन मनके तबियत खराब होय के बाद ओमन ल उंहा के स्वास्थ्य केंद्र म भर्ती कराय गेहे, जिहां एक झिन मनखे के मउत होगे।
– गरियाबंद जिला के पांडुका थानाक्षेत्र म पिकअप वाहन के टक्कर ले फटफटी म बइठे दू झिन मनखे के मउकाच म परान छूट गे।
और
– भिलाई ईस्पात संयंत्र के बार एंड रॉड मिल म आगजनी के घटना म लाखों रूपिया के नुकसान होय के खबर मिले हे। ए घटना के सेती सरिया उत्पादन के काम प्रभावित होय हे।