अग्निपथ योजना-पंजीकरण योजना
केन्द्र सरकार ह कहिन हे कि अग्निपथ योजना के अंतर्गत अग्निवीर मनके भर्ती प्रक्रिया पूरा तरीका ले पारदर्शी अउ निष्पक्ष होही। भारतीय वायुसेना म पहिली बैच के भर्ती बर पंजीकरण प्रक्रिया चौबीस जून ले सुरू होवइया हे। नौसेना अउ थल सेना म पंजीकरण प्रक्रिया एक जुलाई ले सुरू हो जही।
लेफ्टिनेंट जनरल अउ सैन्य मामला के विभाग म अपर सचिव अनिल पुरी ह बतईन कि भर्ती प्रक्रिया अउ रेजिमेंटेसन म कोनों बदलाव नइ करे गेहे। उहें, वाइस एडमिरल दिनेश के. त्रिपाठी ह किहीन कि भारतीय नौसेना अग्निवीर मन बर पच्चीस जून के भर्ती कैलेंडर जारी करइया हे। ओमन ह बतईन कि अग्निवीर मनके पहिली बैच के प्रशिक्षण इक्कीस नवंबर ले आई.एन.एस. चिल्का म होही। भारतीय नौसेना ह कहिन कि अग्निवीर मन ल चार बछर के प्रशिक्षण पूरा करे के बाद मर्चेंट नेवी म सामिल होय के अवसर मिलही।
एयर मार्शल सूरज कुमार झा ह बतईन कि प्रवेश प्रक्रिया, प्रवेश स्तर योग्यता अउ परीक्षा पाठ्यक्रम म कोनों प्रकार के बदलाव नइ करे गेहे। वायुसेना म सबो भर्ती केवल अग्निवीर वायु के माध्यम ले ही होही। उहें, अभ्यर्थी मनके सहायता बर दू ठिन हेल्पलाइन घलो सुरू करे गेहे।
नरवा मिशन-गठन
प्रदेस म नरवा कार्यक्रम के सुचारू संचालन, अनुश्रवण अउ नरवा विकास के कामबूता म तेजी लाय बर अपर मुख्य सचिव सुब्रत साहू के अध्यक्षता म सात सदस्यीय नरवा मिशन के गठन करे गेहे। नरवा विकास कार्यक्रम के तहत प्रदेश के लगभग तीस हजार नाला ल रिचार्ज करे बर चयन करे गेहे। पहिली चरण म नौ हजार पांच सौ इकतालिस नाला के उपचार के स्वीकृति दे गेहे। नाला के उपचार करे बर नरवा विकास कार्यक्रम के चलत नाला म बरसा के जल ल रोके बर लूज बोल्डर चेक, चेक डेम, गली प्लग, कंटूर ट्रैंच, स्टाप डेम समेत आने आने संरचना के निर्माण करे जात हे।
ए कार्यक्रम म प्रदेश म सिंचित क्षेत्र ह बाढ़ही अउ जादा ले जादा जगा म कृषि बर पानी मिल सकही। निस्तार बर घलो पानी के कमी के समस्या बहुत हद तक दू हो सकही। संगेसंग जैव विविधता के घलो संवर्धन होही।
जानबा के अनुसार प्रदेश म नरवा कार्यक्रम मुख्यतः पंचायत अउ ग्रामीण विकास विभाग, वन अउ जलवायु परिवर्तन विभाग डहार ले संचालित करे जात हे।
पदस्थापना
राज्य सरकार ह प्रदेस के आठ झिन तहसीलदार मन ल डिप्टी कलेक्टर के पद म पदोन्नत करे हे। जारी आदेस के अनुसार गौरेला-पेण्ड्रा मरवाही के तहसीलदार शशि कुमार चौधरी ल बलरामपुर-रामानुजगंज के डिप्टी कलेक्टर बनाय गेहे। उहें, बिलासपुर के तहसीलदार रमेश कुमार मोर ल रायगढ़, बालोद के तहसीलदार रामरतन प्रसाद दुबे ल बलौदाबाजार-भाटापारा, मुंगेली के मायानंद चन्द्रा ल बस्तर अउ रायगढ़ के जगतराम शतरंज ल सरगुजा के डिप्टी कलेक्टर के रूप म पदोन्नत करे गेहे। एखर अलावा कोरबा के तहसीलदार सुरेश कुमार साहू ल बालोद, दुर्ग के रामकुमार सोनकर ल बेमेतरा अउ बिलासपुर के तहसीलदार मनोज कुमार खांडे ल कोरबा के डिप्टी कलेक्टर बनाय गेहे।
लखमा-इंडोनेशिया प्रवास
उद्योग मंत्री कवासी लखमा ह अभी इंडोनेशिया दउरा म हवय। अपन प्रवास के बेरा श्री लखमा ह काली बाली शहर म आयोजित होवइया जी-टवेंटी एवीपीएन ग्लोबल कान्फ्रेंस म सामिल होइन। ए बेरा म ओमन ह औद्योगिक प्रतिनिधि मनले गोठबात करके छत्तीसगढ़ म सस्टेनेबल डेवलपमेंट उपर होवत कामबुता के बारे म विस्तार ले जानकारी दीन।
ओमन ह उंहा के औद्योगिक प्रतिनिधि मनले गोठबात करके ओमन ह छत्तीसगढ़ म निवेश बर नेवता दीन। श्री लखमा ह अमेरिका के सनफोर्ड पैक्स संस्था के एक्जीक्यूटिव डॉयरेक्टर प्रिया शंकर ले घलो मुलाकात करीन अउ ओमन ह छत्तीसगढ़ म चलत गोधन न्याय योजना, सुराजी गांव योजना, सी-मार्ट, महात्मा गांधी ग्रामीण औद्योगिक पार्क समेत आने-आने विसय उपर विस्तार ले जानकारी दीन।
माओवादी मुठभेड़
बीजापुर जिला के मिरतुर थाना क्षेत्र म पुलिस अउ माओवादी मनके बीच होय मुठभेड़ म एक झिन माओवादी मारे गेहे।
जानबा के अनुसार पुलिस ल कुड़मेर के जंगल म माओवादी मनके होय के सूचना मिले रीहिस। एखर बाद डीआरजी के टीम अउ मिरतुर थाना क्षेत्र ले पुलिस के संयुक्त दल ह सर्चिंग बर रवाना होइन। वापसी के बेरा माओवादी मन ह कुड़मेर के जंगल म पुलिस बल उपर हमला कर दीन। जवान मन डहार ले करे गे जवाबी कार्रवाई म एक झिन माओवादी मारे गीस। जेखर शव ल बरामद कर ले गेहे। उंहें पुलिस ह घटना स्थल ले एक ठिन देसी पिस्टल घलो बरामद करे हे।
साय बयान
भारतीय जनता पार्टी के प्रदेस अध्यक्ष विष्णुदेव साय ह झारखंड के पूर्व राज्यपाल द्रौपदी मुर्मू ल एनडीए के राष्ट्रपति उम्मीदवार घोसित करे म देस के आदिवासी समाज ल बधाई दीन हे। श्री साय ह किहीन हे कि भाजपा ह द्रौपदी मुर्मू के नाम के घोसना करके आदिवासी समाज के नारी शक्ति के सम्मान करे हे।
भाजपा प्रभारी/सह-प्रभारी
भाजपा के प्रदेश अध्यक्ष विष्णुदेव साय ह प्रदेस के जिला म संगठन के दृष्टि ले जिला प्रभारी अउ सह-प्रभारी के नियुक्ति करीन हे। भाजपा ह कोंडागांव जिला के श्रीनिवास मद्दी ल जिला प्रभारी अउ विद्याशरण तिवारी ल सह-प्रभारी बनाय हे। उहें, शिवनारायण पांडेय ल बीजापुर जिला के प्रभारी अउ जी. वेंकेटश्वर राव ल सह-प्रभारी बनाय गेहे। अइसने, जांजगीर-चांपा जिला बर गिरधर गुप्ता ल प्रभारी अउ रंजनीश सिंह ल कोरबा जिला के प्रभारी बनाय गेहे। उहें, बेमेतरा, जशपुर अउ कोरिया जिला म घलो सह-प्रभारी मनके नियुक्ति करे गेहे।
बॉक्सिंग इवेंट
प्रदेश म पहिली घांव – रंबल इन द जंगल – नाम के इवेंट के संग प्रोफेशनल बाक्सिंग के शुरूआत करे जाही। राजधानी रायपुर के बलबीर सिंग जुनेजा इंडोर स्टेडियम म अगस्त महीना म होवइया प्रोफेशनल बॉक्सिंग म ओलंपिक विजेता विजेन्द्र सिंह समेत अंतर्राष्ट्रीय स्तर के पेशेवर मुक्काबाज मन शामिल होही। ए कार्यक्रम छत्तीसगढ़ के लोगन मन ल ए खेल के पहिचान कराय बर एक अच्छा अवसर हवय। विजेन्द्र सिंह ह बछर दू हजार आठ म ओलंपिक के कांस्य पदक जीते वाले पहिली भारतीय मुक्काबाज हवय।
जानबा के अनुसार विजेन्द्र सिंह ह पाछू आठ जून के मुख्यमंत्री भूपेश बघेल ले मुलाकात करके छत्तीसगढ़ म बॉक्सिंग के खेल ल बढ़ावा देके संभावना म विचार विमर्श करे रीहिन अउ ओखर मनले छत्तीसगढ़ म प्रोफेशनल बॉक्सिंग इवेंट कराय के आग्रह करे रीहिन। जेखर उपर मुख्यमंत्री ह सहमति दीन। मुख्यमंत्री के कहना हे कि अवइया पीढ़ी बर खेल ल बढ़ावा देना छत्तीसगढ़ बर बड़ महत्वपूर्ण हे।
संक्षिप्त समाचार
– छत्तीसगढ़ राज्य लघु वनोपज संघ डहार ले प्रदेस म लाख पालन बर कार्यक्रम के आयोजन करे जात हे। एखर चलत कटघोरा म तेईस अउ चौबीस जून के कुसमी लाख पालन अउ अंबिकापुर म पच्चीस अउ छब्बीस जून के रंगिनी लाख पालन के संबंध म लाख पालक किसान मन ल प्रशिक्षण दे जाही।
– संचालनालय खेल अउ युवा कल्याण विभाग डहार ले प्रदेस म आने-आने खेल बर संविदा आधार म प्रशिक्षक मनके नियुक्ति करे जाही। एखर बर पात्र अभ्यर्थी मन तेरह जुलाई तक आवेदन कर सकत हे।
– राजनांदगांव जिला म ट्रक ह कार ल पाछु ले टक्कर मार दीस। ए हादसा म कार सवार एक झिन युवक के मउत होगे। उहें, तीन झिन आने लोगन मन गंभीर रूप ले घायल होगे।
और
– राजनांदगांव के बजरंगपुर नवा गांव क्षेत्र म आज बिहनिया नगर निगम के कचरा उठाय वाला गाड़ी के चपेट म आय ले ढाई बछर के एक झिन लइका के मउत होगे।