आज दिनभर के खबर ल अपन गुरतुर छत्तीसगढ़ी भाखा म पढ़व

गरूड़ ऐप

राज्य के मुख्य निर्वाचन पदाधिकारी रीना बाबा साहेब कंगाले ह आज राज्य के बूथ लेवल ऑफिसर-बीएलओ प्रतिनिधि मनके बइठका लीन। बइठका म श्रीमती कंगाले ह राज्य के मतदान केन्द्र मन म सुविधा सुनिश्चित करे अउ गरूड़ ऐप के प्रगति के समीक्षा करीन। ओमन बतईन कि भारत निर्वाचन आयोग डहार ले विकसित डिजिटल ऐप गरूड़ ल मतदाता मनके सुविधा बर बनाय गेहे।
श्रीमती कंगाले ह सब्बो बीएलओ मन ल निर्वाचन आयोग के डिजिटल प्लेटफॉर्म उपर जानकारी दे, गरूड़ ऐप डाउनलोड करे अउ बूथ के एश्योर्ड मिनियम फैसेलिटी-ए.एम.एफ. के जानकारी ल पूरा करे उपर पांच सौ रूपिया वन टाईम डेटा रिचार्ज बर मानदेय दे जाही। ये संबंध म सब्बो कलेक्टर मन ल निर्देश जारी कर दे गेहे। श्रीमती कंगाले ह बतईन कि एखर बर बीएलओ ल गरूड़ ऐप म बूथ म स्वच्छ पेयजल, शौचालय, रैम्प जइसे आवश्यक सुविधा मनके फोटो अपलोड करे ला लागही, जेखर से मतदाता मन बर बूथ म सबो आवश्यक            सुविधा मुहैया कराय जा सकय। आयोग ह सबो आवश्यक जानकारी उपलब्ध कराय बर तीस नवंबर तक के समय देहे।

मुख्यमंत्री-प्रधानमंत्री पत्र

मुख्यमंत्री भूपेश बघेल ह प्रधानमंत्री नरेन्द्र मोदी ल पत्र लिखके मांग करे हे कि कोरोना से जेन मनखे मनके मउत होय हे उंखर परिजन मन ल मुआवजा के रूप म चार लाख रूपिया के रासि देके पहल करे जाय। श्री बघेल ह पत्र म किहीन हे कि चौदह मार्च 2020 के केन्द्रीय गृह मंत्रालय डहार ले कोरोना से मृत मनखे मनके परिजन मन ल चार लाख रूपिया रासि देके घोसना करे गे रिहीस। ओमन किहीन कि केन्द्र सरकार ह बाद म ये अधिसूचना म संशोधन करीन अउ मुआवजा के रासि ल घटाके पचार हजार रूपिया कर दे रिहीन। मुख्यमंत्री ह पत्र म यहू बतईन कि एसडीआरएफ मानदंड के अनुसार मुआवजा रासि चार लाख में से पचहत्तर प्रतिशत जउन ह तीन लाख रूपिया होथे। ए रासि केन्द्र सरकार डहार ले वहन करे जाना हे, जबकि बाचे पच्चीस प्रतिशत रासि राज्य सरकार के जिम्मेदारी होही।

नगरीय निकाय चुनाव

छत्तीसगढ़ राज्य निर्वाचन आयोग डहार ले नगरीय निकाय चुनाव के कार्यक्रम घोषित करे जाय के बाद निकाय मन म चुनाव के तैयारी सुरू होगे हे। इही कड़ी म आज दुर्ग कलेक्टर डॉक्टर सर्वेश्वर नरेन्द्र भूरे अउ वरिष्ठ पुलिस        अधीक्षक बद्रीनारायण मीणा ह नगरीय निकाय मन म चुनाव के तैयारी के निरीक्षण करीन। ओमन भिलाई, भिलाई-चरौदा, रिसाली अउ जामुल नगरीय निकाय क्षेत्र मनके दौरा करीन। ये दउरान ओमन मतदान करे बर स्ट्रांग रूम, नामांकन कक्ष अउ मतगणना कक्ष म करे जात तैयारी मनके जायजा घलो लीन।
गौरतलब हे कि प्रदेश के दस जिला मनके पन्द्रह सहर म निकाय चुनाव बर मतदान बीस दिसंबर के होही। इही दिन सोलह सहर मनके सत्रह वार्ड मन म घलो उपचुनाव कराय जाही। सत्ताईस नवंबर ले नामांकन के प्रक्रिया सुरू हो जही। तीन दिसंबर तक नामांकन भरे जा सकही। छह दिसंबर तक नामांकन वापसी के बाद चुनाव चिन्ह के वितरण होही। तेईस दिसंबर के मतगणना के बाद चुनाव परिणाम घोषित कर दे जाही। इहू बखत चुनाव बैलेट पेपर से होही। चुनाव म नोटा के प्रावधान घलो रिही।

साय-बयान

भारतीय जनता पार्टी के प्रदेश अध्यक्ष विष्णुदेव साय ह किहीन हे कि प्रदेश के पन्द्रह नगरीय निकाय मन म होवइया चुनाव म भाजपा पूरा दमखम के संग मुकाबला म उतरही। ओमन किहीन कि प्रदेश के कांग्रेस सरकार ह पहिली ही निकाय चुनाव म जनता ले अपन प्रतिनिधि सीधा चुने के अधिकार छीन लेहे। ए बखत निकाय चुनाव म घलो कांग्रेस ह अध्यक्ष अउ महापौर के चुनाव अप्रत्यक्ष पद्धति से कराय के घोसना कर देहे। एखर से ए स्पष्ट होवत हे कि कांग्रेस चुनाव के बाद खरीद-फरोख्त अउ जोड़-तोड़ के राजनीति करही।

कोविड टीका

राष्ट्रव्यापी टीकाकरण अभियान के अंतर्गत अब तक एक सौ उन्नीस करोड़ अड़तीस लाख ले जादा कोविड रोधी टीका लगाय जा चुके हे। पाछु चौबीस घंटा म नब्बे लाख सत्ताईस हजार ले जादा लोगन मनके टीकाकरण करे गीस।
उहें, छत्तीसगढ़ म कोरोना से बचाव बर अब तक दू करोड़ इकसठ लाख उनहत्तर हजार ले जादा लोगन मन ल कोविड टीका लगाय जा चुके हे।
इही बीच, राज्य म काली कोरोना संक्रमण के उन्नीस नवा मामला सामने आय हे। उहें, प्रदेस के इक्कीस जिला म काली कोरोना संक्रमण के एक भी नवा मामला सामने नइ आय हे। राज्य के पांच जिला – कबीरधाम, गौरेला-पेण्ड्रा-मरवाही, बलरामपुर-रामानुजगंज, सुकमा, नारायणपुर म कोरोना के एको सक्रिय मरीज नइ हे। वर्तमान म तीन सौ दस मरीज मनके प्रदेस के अलग-अलग अस्पताल अउ होम आइसोलेशन म इलाज चलत हे।

भाजपा महिला/कांग्रेस-बैठक

आज सूरजपुर म भारतीय जनता पार्टी महिला मोर्चा के प्रदेश कार्यसमिति के बइठका म केन्द्रीय मंत्री रेणुका सिंह ह किहीन कि छत्तीसगढ़ म हर तरफ लूट, हत्या, डकैती, चोरी, बलात्कार अउ छेड़छाड़ जइसे घटना होवत हे अउ            अपराधी मन बेखौफ घुमत हे। ओमन किहीन कि प्रदेस म कानून व्यवस्था पुरी तरह ध्वस्त हो चुके हे।
बइठका म भाजपा महिला मोर्चा के राष्ट्रीय कार्यकारिणा सदस्य सीमा पात्रे ह किहीन कि केन्द्र के मोदी सरकार के योजना मन ल जन-जन तक पहुंचाना हे अउ प्रदेस सरकार के विफलता ल जनता के सामने लाना हे। उहें, महिला मोर्चा के प्रदेस प्रभारी लता उसेंडी ह किहीन कि केन्द्र सरकार डहार दे जाने वाला          प्रधानमंत्री आवास योजना के लाभ छत्तीसगढ़ सरकार, प्रदेस के जनता ल नइ दिला पावत हे।
दूसर डहार छत्तीसगढ़ प्रदेश कांग्रेस कमेटी के प्रवक्ता धनंजय सिंह ठाकुर ह किहीन हे कि केन्द्र सरकार प्रधानमंत्री आवास योजना अउ फंड के आवंटन म छत्तीसगढ़ के संग भेदभाव करत हे। ओमन किहीन कि केन्द्रीय आवास योजना म भाजपा शासित अउ गैर भाजपाशासित राज्य मन बर अलग-अलग नियम बनाय गेहे। श्री ठाकुर ह किहीन कि प्रधानमंत्री आवास योजना के फंड के आवंटन बर छत्तीसगढ़ म रेरा म पंजीयन करना अनिवार्य रखे गेहे। उहें, भाजपाशासित राज्य मध्यप्रदेश ल रेरा म पंजीयन के बगैर लगातार फंड के आवंटन करे गेहे।

धान खरीदी

प्रदेस म समर्थन मूल्य म आगामी एक दिसंबर ले धान खरीदी सुरू होही एखर बर प्रदेस के जम्मों जिला मन म तैयारी करे जात हे। उपार्जन केन्द्र मन म धान ल बरसा ले बचाय अउ एखर उचित रखरखाव सहित अन्य पहलु मन उपर अधिकारी मन डहार ले निगरानी रखे जात हे।
इही कड़ी म धान खरीदी बर बारदाना बिक्री, वितरण, केन्द्रीय अउ दूसर संबंधित अधिकारी मन से नियमित समन्वय के बेवस्था ल सुचारू रूप से संचालित करे बर राज्य सासन डहार ले भारतीय प्रशासनिक सेवा के अधिकारी मोहम्मद कैसर अब्दुलहक ल खाद्य विभाग के बिसेस कर्तव्यस्थ अधिकारी के अतिरिक्त प्रभार सौंपे गेहे। श्री कैसर करा पंचायत अउ ग्रामीण विकास विभाग म विशेष सचिव अउ मनरेगा के आयुक्त के प्रभार पहिली जइसे बने रइही।

नीति आयोग-शहरी इंडेक्स

नीति आयोग डहार ले जारी ‘‘सत्त विकास लक्ष्य शहरी इंडेक्स‘‘ म छत्तीसगढ़ के रायपुर नगरीय क्षेत्र ल ‘‘फ्रंट रनर‘‘ के श्रेणी म रखे गेहे। गौरतलब हे कि नीति आयोग डहार ले अइसना सतत् विकास लक्ष्य के अंतर्गत शहरी इंडेक्स ल जारी करे गेहे। इंडेक्स म देश के छप्पन नगरीय क्षेत्र मन म ससत्तर सूचकांक म प्राप्त करे गे प्रगति के आधार उपर रैंकिंग दे गेहे। रायपुर ह सड़सठ दशमलव तीन-छह अंक प्राप्त करके बीसवां रैंक हासिल करे हे। छप्पन नगरीय क्षेत्र म सर्वाधिक अंक पचहत्तर दशमलव पांच अंक प्राप्त करके शिमला प्रथम स्थान म हे।

हाईकोर्ट-जीपी सिंह

प्रदेश के आईपीएस अउ निलंबित एडीजी जी.पी. सिंह के याचिका मन उपर आज छत्तीसगढ़ उच्च न्यायालय म सुनवाई होईस। याचिकाकर्ता के वकील ह जवाब पेश करे बर अदालत से समय मांगे रिहीस, जेला मंजूर करत हुए कोर्ट ह जवाब दे बर आठ दिसंबर तक के समय देहे।


रायपुर-कोर्ट

रायपुर के जिला अउ सत्र न्यायालय ह प्रतिबंधित संगठन-सिमी अउ इंडियन मुजाहिद्दीन के टेरर फंडिग मामला म चार आरोपी मन ल दोषी करार देवत हुए दस-दस साल के सश्रम कारावास के सजा सुनाय हे।
गौरतलब हे कि सिमी अउ इंडियन मुजाहिद्दीन बर ये चारो आरोपी छत्तीसगढ़, बिहार अउ पश्चिम बंगाल म फर्जी नाम से खाता खुलवाके पइसा के लेनदेन करत रिहीन। इंखर खाता म पाकिस्तान से संगठन बर फंडिंग करे जात रिहीस, जेमा एमन मन अपन कमीशन काटके इंडियन मुजाहिद्दीन के सदस्य मन ल रूपिया पहुचावत रिहीन।

मनरेगा-महिला श्रमिक

प्रदेस म महात्मा गांधी राष्ट्रीय ग्रामीण रोजगार गारंटी अधिनियम-मनरेगा के काम म महिला मनके भूमिका लगातार बाढ़त हे। मनरेगा म अकुशल श्रमिक के रूप म काम करइया करीब इंक्यावन प्रतिशत महिला हे। उहें, कार्यस्थल म काम के नाप-जोख अउ श्रमिक मनके प्रबंधन के काम देखइया महिला मेटांं मन के भागीदारी छप्पन प्रतिशत हे। इही नहीं मेट के रूप म गांव के महिला मन कार्यस्थल म बदले हुए भूमिका म नजर आवत हे। ए महिला मन पहिली केवल मजदूरी करे तक सीमित रिहीन। चालू वित्तीय बछर म मनरेगा के अंतर्गत अब तक बयालीस लाख चार हजार ले जादा मजदूर मन ल रोजगार उपलब्ध कराय गेहे। एमा इक्कीस लाख तीस हजार ले जादा महिला श्रमिक हे।

हॉकी प्रतियोगिता

बिलासपुर के बहतराई खेल परिसर म आज ले अंतर विश्वविद्यालयीन हॉकी प्रतियोगिता सुरू होगे। उच्च शिक्षा मंत्री उमेश पटेल ह ये प्रतियोगिता के शुभारंभ करीन। ये मौका म ओमन किहीन कि कोरोना काल के बाद खिलाड़ी मन ल नवा दिशा दे बर ये प्रतियोगिता के आयोजन करे जात हे, जेन ह बिलासपुर बर गौरव के बात आय।

मौसम

प्रदेस के उत्तरी भाग म काली ले सुष्क हवा आय के संभावना हे, जेखर सेती प्रदेस के न्यूनतम तापमान म गिरावट होय के आसार हे।
मौसम विभाग ह अधिकतम अउ न्यूनतम तापमान म विशेष परिवर्तन नइ होय के संभावना जताय हे। राज्य के कुछ हिस्सा म शुष्क हवा के आय ले ठंड बाढ़ सकथे। 

Leave a Reply

Your email address will not be published. Required fields are marked *