आज दिनभर के खबर ल अपन गुरतुर छत्तीसगढ़ी भाखा म पढ़व

रक्षा अंलकरण समारोह 

  राष्ट्रपति रामनाथ कोविंद ह आज राष्ट्रपति भवन म आयोजित रक्षा अलंकरण समारोह म सशस्त्र बल मनके कर्मी मन ल वीरता पुरस्कार अउ विशिष्ट सेवा अंलकरण ले सम्मानित करीन। राष्ट्रपति ह अभियांत्रिकी कोर के सप्पर प्रकाश जाधव ल जम्मू अउ कश्मीर म एक अभियान के दौरान आंतकवादी मनके साजिश ल नाकाम करे बर मरणोपरांत दूसरइया उच्चतम शांतिकाल वीरता पुरस्कार कीर्ति चक्र ले सम्मानित करीन।  मेजर विभूति शंकर ढोंढियाल ल पांच आंतकवादी मनके सफाया करे अउ दू सौ किलोग्राम विस्फोटक सामग्री बरामद करे म उंखर भूमिका बर मरणोपरांत शौर्य चक्र से सम्मानित करीन। पाकिस्तानी लड़ाकू विमान ल मार गिराये बर ग्रुप कैप्टर अभिनंदन वर्धमान ल वीर चक्र से सम्मानित करीन।

 मंत्रि परिषद बैठक 

 राज्य मंत्रिमंडल ह डीजल म दू प्रतिशत अउ पेट्रोल म वेट उपर एक प्रतिशत के कमी करे के निर्णय लेहे। एखर ले राज्य सरकार ल करीबन एक हजार करोड़ रूपिया के राजस्व हानि होही।  मुख्यमंत्री भूपेश बघेल के अध्यक्षता म आज रायपुर म होय राज्य केबिनेट बइठका म ये निर्णय ले गीस। बइठका के दउरान पत्रकार मनले चर्चा करत मंत्री मोहम्मद अकबर ह बताइन कि स्कूल शिक्षा विभाग के अंतर्गत राज्य के सबो शासकीय अउ निजी स्कूल मन म कोविड नांइटिन प्रोटोकाल के पालन करत शत प्रतिशत उपस्थिति के संग नियमित रूप ले कक्षा मन ल संचालित करे जाय के निर्णय ले गेहे। ओमन बताइन कि केबिनेट ह एक करोड़ पांच लाख मीट्रिक टन धान खरीदी ल घलो मंजूरी देहे।  राज्य के शासकीय चिकित्सा महाविद्यालय, दंत चिकित्सा महाविद्यालय, नर्सिंग महाविद्यालय अउ फिजियोथेरेपी महाविद्यालय म प्राध्यापक अउ सह प्राध्यापक के पद म लोक सेवा आयोग के माध्यम ले सीधी भर्ती से भरे के अउ  पदोन्नति नियम म छूट प्रदान करे के निर्णय ले गेहे। एखरे संग ही प्रदेश के शासकीय महाविद्यालय मन म संविदा म कार्यरत शिक्षक मन ल उंखर सेवा अवधि के आयु सीमा म अधिकतम दस वर्ष तक के छूट दे, अउ उंखर सेवा के प्रत्येक वर्ष बर दू बोनस अंक घलो देके निर्णय ले गेहे। राज्य मंत्रिमंडल के बइठका म प्रधानमंत्री आय संरक्षण अभियान के अंतर्गत अगले खरीफ मौसम से दलहन फसल के उपार्जन बर प्राइस सपोर्ट स्कीम लागू करे के निर्णय ले गीस। एखर अलावा राज्य म हुक्काबार के विरूद्ध प्रभावी कार्रवाई बर संबंधित छत्तीसगढ़ संशोधन विधेयक के प्रारूप के अनुमोदन करे गीस।  

बिजली बिल/सुरक्षा निधि

छत्तीसगढ़ स्टेट पॉवर डिस्ट्रिब्यूशन कंपनी ह घरेलू उपभोक्ता मन ल राहत देवत हुए बिजली बिल म अतिरिक्त सुरक्षा निधि के राशि ल आधा कर देहे। घरेलु उपभोक्ता मन अब जारी करे गे राशि से कम बिल जमा कर सकहीं। जेन उपभोक्ता मन पहिली ले बिल जमा कर देहे, ओमन ल अगले महीना एखर लाभ देवत हुए उंखर द्वारा जमा करे गे अतिरिक्त सुरक्षा निधि के पचास प्रतिशत राशि ल बिजली बिन म समायोजित कर दे जाही।  उपभोक्ता मन ल एखर बर वर्तमान म जारी बिल म कोनो प्रकार के     संशोधन के जरूरत नइ होवय। बिल जमा करत बेरा अब अतिरिक्त सुरक्षा        निधि ल आधा करके जमा करे जा सकही। उपभोक्ता मन ल बिल सुधरवाय बर बिजली दफ्तर घलो नइ जाय लागय । ये सुविधा पॉवर कंपनी के सबो मेनुअल बिलिंग काउंटर, एटीपी सेंटर अउ ऑनलाइन पेमेंट मोड म उपलब्ध रइही। 

ट्रेन रद्द

 दक्षिण मध्य रेलवे के विजयवाड़ा रेलमंडल के अंतर्गत पदगुपाडु-नेल्लोर स्टेशन मनके बीच अच्छा बरसा होय के सेती रेलवे ट्रेक म पानी भर गेहे, जेखर सेती कुछ गाड़ी मनके परिचालन प्रभावित होय हे। आज अउ काली बिलासपुर – चेन्नई एक्सप्रेस ल रद्द कर दे गेहे। उंहें काली बिलासपुर ले छूटने वाली बिलासपुर-एर्नाकुलम एक्सप्रेस घलो रद्द रइही।

आजादी का अमृत महोत्सव क्विज-एआईआर

आजादी के अमृत महोत्सव म आकाशवाणी समाचार ह स्वाधीनता संग्राम अउ ओखर गौरव वाले इतिहास उपर विशेष अमृत महोत्सव प्रश्नोत्तरी कार्यक्रम चलावत हे। सुनइया मन ल बतादन कि ए प्रश्न ह राष्ट्रीय स्तर म राखे गे प्रश्नोत्तरी के तहत पूछे जाही। एखर जवाब प्रादेशिक बुलेटिन के प्रश्नोत्तरी बर राखे गे ई-मेल या मोबाईल नंबर के बजाय आज के प्रश्न के बाद बताय गे वाट्सअप नंबर या ई-मेल म भेजना होही।  आज के प्रश्न हे – वो जहाज के नाम बतावव जेखर कर्मचारी मनके हड़ताल म जाय के कारण रॉयल इंडियन नेवी के विद्रोह शुरू होइस।   ये प्रश्न के उत्तर वाट्सअप नंबर – आठ आठ दू छै पांच चार छै दो छै दो – या ई-मेल अमृत महोत्सव क्विज एट द रेट प्रसार भारती डॅाट जीओवी डॅाट इन म भेज सकथे।  भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाव के घोषणा करे जाही।  विजेता ल ई-प्रमाण पत्र अउ सांकेतिक पुरस्कार दे जाही। 

सीजी कैम्प पोर्टल 

राज्य शासन के सर्वोच्च प्राथमिकता वाले योजना मनके मॉनिटरिंग बर सीजी कैम्प पोर्टल शुरू करे गेहे।  मुख्यमंत्री भूपेश बघेल ह आज रायपुर म ये पोर्टल के उद्घाटन करीन। एखर माध्यम ले राज्य सरकार के प्राथमिकता वाले योजना मनके प्रगति के तुलनात्मक आकलन करे जा सकत हे। साथ ही आम जनता के शिकायत मनके निराकरण बर जन शिकायत पोर्टल तियार करे गेहे। जन शिकायत पोर्टल म कोई भी व्यक्ति अपन शिकायत ऑनलाईन दर्ज करा सकत हे ।

अंबिकापुर हाथी 

सरगुजा संभाग के शिवबहरा गांव म करीबन सात ठिन हाथी मनके बेहोश होय के बाद वन विभाग के अमला ह सतर्क होगे हे। काली तीस ठिन हाथी मनके दल मध्यप्रदेश, उत्तरप्रदेश, के सीमा ले लगे इलाका म देखे गे रीहिस। ये हाथी मन ह बीते रतिहा कुछ गांव वाले मनके घर म तोड़ फोड़ करे रीहिन । आशंका जताये जात हे कि ए दउरान हाथी मन ह कीटनाशक दवा खाले होही।  जिला कलेक्टर गौरव सिंह ह बताइन कि मामला के सूचना मिलते ही मुख्य वनमंडल अधिकारी अउ वन विभाग के अमला ल मउका म भेज दे गेहे ।

हत्या आरोपी गिरप्तार  

भिलाई के हथखोज वार्ड-दो के कांग्रेस पार्षद सूरज बंछोर के हत्या के मामला के पुलिस ह खुलासा करे हे। ये मामला म पांच झिन आरोपी ल गिरप्तार करे गेहे। इंखर करा ले दो देशी कट्टा अउ चार जिंदा कारतूस घलो बरामद करे गेहे। वरिष्ठ पुलिस अधीक्षक बद्रीनारायण मीणा अउ अतिरिक्त पुलिस अधीक्षक शहर संजय ध्रुव ह आज एक पत्रकार वार्ता म बताइन कि पुराना रंजिश के कारण पंद्रा नवंबर के रात पार्षद सूरज बंछोर के हत्या कर देगे रीहिस।

अउ अब पेश हे मौसम के हाल – 

अगले चौबीस घंटा के दउरान दक्षिण छत्तीसगढ़ म एक दू स्थान मन म हल्का बरसा होय अउ गरज चमक के संग छीटा पड़े के संभावना हे।  मौसम विभाग के अनुसार बंगाल की खाड़ी से काफी मात्रा म नमी आवत हे। एखर असर पाछू रतिहा रायपुर सहित प्रदेश के अधिकांश जिला मन म  मध्यम ले तेज बरसा होइस। बेमौसम बरसा ले कई जिला म धान के फसल ल नुकसान होय के घलो आशंका जताये जावत हे।


साइकिंलिंग चैंपियनशिप  

पच्चीस नवंबर से हरियाणा म होवइया छब्बीसवां राष्ट्रीय रोड साइकिलिंग चैंपियनशिप म छत्तीसगढ़ के टीम घलो भाग लीहीं। राज्य के टीम चौबीस नवंबर के दुर्ग से हरियाणा बर रवाना होही। ये प्रतियोगिता अठाईस नवंबर तक आयोजित करे गेहे।  साइकिलिंग एसोसिएशन ऑफ छत्तीसगढ़ के महासचिव विनायक चन्नावार ह बताइन कि टीम म शामिल खिलाड़ी मन बर पाछू दिन एक विशेष प्रशिक्षण शिविर घलो आयोजित करे गे रीहिस।
.

Leave a Reply

Your email address will not be published. Required fields are marked *