आज दिनभर के खबर ल अपन गुरतुर छत्तीसगढ़ी भाखा म पढ़व

 

दसवीं/बारहवीं परीक्षा परिणाम
छत्तीसगढ़ माध्यमिक शिक्षा मंडल डहार ले आयोजित दसवीं अउ बारहवीं बोर्ड परीक्षा के नतीजा आज जारी कर दे गीस। दसवीं म करीब चौहत्तर प्रतिशत अउ बारहवीं म उन्यासी प्रतिशत ले जादा लइका मन पास होइन। स्कूल शिक्षा मंत्री डॅाक्टर प्रेमसाय सिंह टेकाम ह मंडल केसभागृह म हाइस्कूल परीक्षा अउ हायर सेकण्डरी परीक्षा दू हजार बाईस के परिणाम जारी करीन।
आज जारी प्राविण्य सूची के अनुसार बारहवीं के परीक्षा म रायगढ़ जिला के कुंती साव पहिलइया स्थान म रीहिस। कुंती ह अंठानबे दशमलव दू शून्य प्रतिशत अंक प्राप्त करे हे। उंहें बिलासपुर के खुशबू वाधवानी ह दूसरइयाअउ जांजगीर-चांपा जिला के जैजेपुर के रेणुका चंद्रा ह तीसरइया स्थान हासिल करे हे।
उंहें दसवीं के परीक्षा म रायगढ़ के सुमन पटेल अउ कांकेर जिला के सोनाली बाला ह अंठानबे दशमलव छै सात प्रतिशत अंक हासिल करके पहिलइया स्थान प्राप्त करे हे। उंहे कवर्धा के अशीफा शाह, राजनांदगांव के दामिनी वर्मा, बिलासपुर के जयप्रकाश कश्यप, रायगढ़ के मुकेश अग्रवाल, गौरेला-पेण्ड्रा- मरवाही के काहेफ अंजुम अउ कांकेर जिला के कमलेश सरकार ह अंठानबे दशमलव एक सात प्रतिशत अंक पाके दूसरइया स्थान प्राप्त करे हे। जबकि महासमुंद के मीनाक्षी प्रधान, राजनांदगांव के कृष कुमार, जाजंगीर-चांपा के गीतू चंद्रा अउ कोंडागांव के हर्षिका चौरड़िया ह अंठानबे प्रतिशत अंक के संग  तीसरइया स्थान प्राप्त करे हे। बारहवीं के प्राविण्य सूची म बाईस अउ दसवीं के प्राविण्य सूची म इकहत्तर झन विद्यार्थी मनके नाम शामिल हे।
दसवीं अउ बारहवीं परीक्षा परिणाम मंडल के वेबसाईट म उपलब्ध हे। मंडल के वेबसाईट डब्लू डब्लू डब्लू डॅाट सीजीबीएसई डॅाट एनआईसी डॅाट इन अउ रिजल्ट डॅाट सीजी डॅाट एनआईसी डॅाट इन म विद्यार्थी मन अपन परिणाम देख सकत हे।
दसवी बारहवीं परिणाम 02परिणाम जारी करे के बाद स्कूल शिक्षामंत्री ह सफल विद्यार्थी मन ल शुभकामना दीन। संगेसंग ओमन असफल विद्यार्थी मनले कीहिन कि ओमन दुबारा मेहनत करहीं त सफलता जरूर मिलही।
राज्यपाल अनुसुइया उइके अउ मुख्यमंत्री भूपेश बघेल ह दसवीं अउ बारहवीं के परीक्षा म सफल विद्यार्थी मनल अपन शुभकामना दीन। संगेसंग ओमन परीक्षा म अपेक्षित परिणाम प्राप्त नही कर सकने वाला विद्यार्थी मन ल घलो बिना निराश होय धैय अउ मेहनत के संग निरंतर प्रयास करे बर कीहिन।

आवासीय विद्यालयरायगढ़ जिला के लैलूंगा अउ सरगुजा के लुण्ड्रा म एकलव्य आदर्श आवासीय विद्यालय इही शिक्षण सत्र ले प्रारंभ करे जाही। दूनों विद्यालय मन म साठ-साठ विद्यार्थी मनके प्रवेश ले जाही। आदिम जाति विकास मंत्री डॅाक्टर प्रेमसाय सिंह टेकाम के अध्यक्षता म आयोजित बइठका म ये निर्णय ले गीस।
बइठका म लेगे निर्णय के मुताबिक एकलव्य आदर्श आवासीय विद्यालय के ड्रापआउट लइका मन बर रायपुर के सड्डू म कोचिंग सेंटर बनाये जाही। ए कोचिंग सेंटर म एकलव्य विद्यालय मनसे कक्षा बारहवीं पास विद्यार्थी मन ल विभिन्न प्रतियोगी परीक्षा मनके कोचिंग दे जाही। उंहें एकलव्य आदर्श आवासीय विद्यालय मन म अब अनूसुचित जनजाति के विशेष पिछड़ी जनजाति वर्ग के विद्यार्थी मन ल प्रवेश म प्राथमिकता दे जाही।

राष्ट्रीय लोक अदालतप्रदेश के विभिन्न न्यायालय मन म आज राष्ट्रीय लोक अदालत के आयोजन करे गीस। एखर तहत राजीनामा योग्य दांडिक प्रकरण, सिविल प्रकरण, परिवार न्यायालय के पारिवारिक विवाद, श्रम न्यायालय के प्रकरण, स्थायी जनउपयोगी लोक अदालत के प्रकरण, मोटर दुर्घटना दावा, विद्युत विभाग अउ राजस्व से संबंधित प्रकरण मनके निराकरण, आपसी राजीनामा के आधार म करे गीस।

माओवादी विस्फोटबीजापुर जिला म माओवादी मन डहार ले लगाये गे आईईडी के चपेट म आये ले छत्तीसगढ़ सशस्त्र बल के एक झिन जवान ह गंभीर रूप ले घायल होगे।
मिले जानकारी के मुताबिक जिला के नेलसनार थाना क्षेत्र के हेमलापारा स्थित आठवीं वाहिनी सी-कंपनी के टीम ह एरिया डॅामिनेशन बर निकले रीहिस। इही दौरान इंदिरावती नदी के तीर बंगोलीघाट करा माओवादी मन डहार ले लगाये गे आईईडी के विस्फोट होय ले आरक्षक रामनाथ मौर्य के दूनो पैर म गंभीर चोट आय हे। घायल जवान ल स्वास्थ्य केंद्र नेलसनार म प्राथमिक उपचार के बाद दंतेवाड़ा जिला अस्पताल रेफर करे गेहे।

बातों-बातों-मेंप्रादेशिक समाचार एकांश डहार ले समसामयिक विषय उपर आधारित हमर कारीकरम ‘‘बातों-बातों-में‘‘ ह ए बखत स्टार्टअप इंडिया उपर केन्द्रित रइही।  ए कार्यक्रम के तहत स्टार्टअप इंडिया से प्रेरित होके अपन कारोबार शुरू करइया युवा इंजीनियर आदित्य बोकावरपू से करे गे भेंटवार्ता के प्रसारण करे जाही। एखर प्रसारण आकाशवाणी के रईपुर केन्द्र डहार ले काली बिहनिया नौ बजके तीस मिनट म करे जाही, जेला छत्तीसगढ़ के सब्बो आकाशवाणी केन्द्र मन ह रिले करही।

जिले की चिट्ठीआकाशवाणी समाचार डहार ले काली संझा छै बजके तीस मिनट ले छै बजके पैंतीस मिनट तक जिला के चिट्ठी कार्यक्रम के प्रसारण करे जाही। ये कार्यक्रम आकाशवाणी के रायपुर केंद्र डहार ले प्रसारित होही। जेला सबो केंद्र मन ह रिले करही। ए बखत के अंक म जशपुर जिला के गतिविधि के बारे म जानकारी दे जाही।

आत्मनिर्भर भारत पुरस्कारछत्तीसगढ़ म श्रमिक मन बर कई ठन कल्याणकारी योजना मन ल संचालित करे बर राज्य शासन के श्रम विभाग ल पुरस्कार मिले हे। नई दिल्ली म आयोजित आत्मनिर्भर भारत सम्मेलन म श्रम विभाग के सचिव अमृत कुमार खलखो ल प्रशस्ति पत्र प्रदान करे गीस।
ए अवसर म श्री खलखो ह बताइन कि राज्य सरकार डहार ले श्रमिक मन बर कई ठन महत्वपूर्ण कार्य करे जात हे। जेमा संगठित अउ असंगठित दूनो क्षेत्र के श्रमिक मन आवश्यक न्यूनतम दस्तावेज के संग पोर्टल म स्वयं ल पंजीकृत कर सकत हे। ओमन यहू बताइन कि पीडीएस डाटाबेस के उपयोग कर श्रमिक  पंजीकरण के काम अब ऑनलाइन करे जा सकत हे।

मौसमदक्षिण-पश्चिम मानसून के अवइया सत्ताईस मई के केरल पहुंचे के संभावना हे। मौसम विभाग ह दक्षिण-पश्चिम मानसून दू हजार बाईस के आरंभ होय के तिथि के पूर्वानुमान लगाये हे।
छत्तीसगढ़ म ए बखत भीषण गर्मी पड़त हे। राजधानी रायपुर म रात के न्यूनतम तापमान तीस डिग्री सेल्सियस ले उपर पहुंच गेहे। उंहें अधिकतम तापमान इकतालिस डिग्री सेल्सियस दर्ज करे गेहे। मौसम विभाग के मुताबिक पूर्व पश्चिम द्रोणिका, पश्चिम मध्यप्रदेश से झारखंड तक गुजरत हे, एखर प्रभाव से प्रदेश म आगामी चौबीस घंटा के दौरान एक दू स्थान म हल्का ले मध्यम बरसा होय के आसार हे ।

संक्षिप्त समाचार
– रायपुर जिला के तिल्दा थाना क्षेत्र म एके ठन परिवार के चार झन लोगन के संदिग्ध हालत म लाश मिले हे। प्रथम दृष्टया एला आत्महत्या के मामला मानके पुलिस ह जांच म जुट गेहे।
– धमतरी जिला म गंगरेल बांध के डूबान क्षेत्र के जंगल म ए बखत जंगली हाथी मनके दल विचरण करत हे। डीएफओ मयंक पांडे ह बताइन कि वन विभाग अउ हाथी मित्रदल के सदस्य मन ए हाथी मनके निगरानी करत हे अउ ग्रामीण मनले जंगल म नइ जाय के अपील करे हे।
– राजनांदगांव जिला पुलिस ह परिपक्वता अवधि पूरा होय के बाद भी निवेशक मन ल जमा करे गे राशि नइ लौटाय के मामला म एक ठिन चिटफंड कंपनी के दू झन संचालक सहित चार झिन आरोपी मन ल गिरप्तार करे हे।
– रायगढ़ जिला के नहरपाली रोड स्थित एक ठिन पावर प्लांट म कीलन मेंटनेंस के दौरान अचानक गरम राख निकले ले एक इंजीनियर अउ एक सुपरवाइजर गंभीर रूप ले झुलस गेहे। उंखर बने इलाज बर मुंबई के अस्पताल म रेफर करे गेहे।
– कोंडागांव जिला म केशकाल थाना क्षेत्र के ग्राम बेड़मा के तीर ट्रक के अनियंत्रित होके पेड़ ले टकराये से ट्रक चालक के मउत होगे, जबकि एक आने मनखे गंभीर रूप ले घायल होगे हे।
अउ
– इही जिला के चिखलकुटी स्थित सीआरपीएफ एक सौ अठाईसवीं बटालियन म विशेष रक्तदान शिविर के आयोजन करे गीस। शिविर म अधिकारी मन सहित पच्चीस झिन जवान मन रक्तदान करीन।