आज दिनभर के खबर ल अपन गुरतुर छत्तीसगढ़ी भाखा म पढ़व

साख सहकारी गोदाम

प्रदेश म नवगठित प्राथमिक कृषि साख सहकारी समिति मनके सुदृढ़ीकरण अउ सुचारू संचालन बर सात सौ गोदाम सह कार्यालय भवन बनाये जाही। एखर बर नाबार्ड के रूरल इंफ्रास्ट्रक्चर डेवलपमेंट फंड के तहत एक सौ पचहत्तर करोड़ रूपिया के राशि स्वीकृत करे गेहे। ये जानकारी वनमंत्री मोहम्मद अकबर अउ सकारिता मंत्री डॅाक्टर प्रेमसाय सिंह टेकाम डहार ले काली लेगे सहकारिता विभाग के समीक्षा बइठका म अधिकारी मन दीन।

बइठका म कर्मचारी मनके रिक्त पद उपर भर्ती अउ कार्यालय सह गोदाम के निर्माण उपर विशेष जोर दे गीस। जेखर ले मैदानी स्तर म किसान मन ल सोसायटी के तहत संचालित आने आने गतिविधि मनके जादा लाभ मिल सकय।

भाजपा किसान मोर्चा

भारतीय जनता पार्टी किसान मोर्चा ह वर्मी कम्पोस्ट के अनिवार्यता ल खतम करे के मांग ल लेके आज प्रदेशभर म राज्यपाल के नाम ज्ञापन सौंपिन। भाजपा किसान मोर्चा के प्रदेश अध्यक्ष श्याम बिहारी जायसवाल ह कीहिन कि राज्य सरकार ह किसान मन ल प्रति एकड़ तीन बोरी वर्मी कम्पोस्ट खरीदे बर बाध्य कर देहे। ओमन कीहिन कि राज्य सरकार दस दिन के अंदर ए आदेश ल वापिस लेवय अउ किसान मन ल एच्छिक रूप ले खरीदे बर छूट देवय। ओमन कीहिन कि यदि सरकार अइसे नइ करही त तेइस मई के सबो सोसायटी म भाजपा किसान मोर्चा डहार ले धरना प्रदर्शन के आयोजन करे जाही।

एखरे संग ओमन प्रदेश सरकार डहार ले हालेच म जारी राजीव गांधी न्याय योजना के आखरी किस्त के राशि म तीस ले चालीस फीसदी तक के कटौती के आरोप लगावत ए अंतर के राशि ल तुरते किसान मन ल दे जाय के मांग करीन।

पुलिस विभाग भर्ती

प्रदेश के पुलिस विभाग म सूबेदार, उपनिरीक्षक संवर्ग अउ प्लाटून कमांडर के भर्ती दू हजार इक्कीस के तहत दस्तावेज परीक्षण अउ शारीरिक माप परीक्षण जम्मों रेंज मुख्यालय- रायपुर, दुर्ग, बिलासपुर, जगदलपुर अउ सरगुजा म आयोजित करे जाही। ए दउरान रेंज के अंतर्गत आने वाला जिला मनके अभ्यर्थी मनके निर्धारित तिथीवार परीक्षण करे जाही। अभ्यर्थी ए परीक्षण म शामिल होय बर प्रवेश-पत्र काली चौदा मई ले छत्तीसगढ़ पुलिस के वेबसाईट ले डाउनलोड कर सकत हे। परीक्षण तिथि अउ स्थल के जानकारी प्रवेश पत्र म दे गेहे।

सरोज पांडेय-रेलमंत्री मुलाकात

छत्तीसगढ़ ले राज्यसभा सांसद सरोज पांडेय ह दिल्ली म केंद्रीय रेलमंत्री अश्वनी वैष्णव ले भेंट करीन। ए दउरान ओमन छत्तीसगढ़ बर रेलवे ले जुड़े कई ठिन मांग अउ जम्मों स्टेशन मन म यात्री सुविधा के समीक्षा करत एखर बढ़ोत्तरी ल लेके चर्चा करीन। सांसद ह रेलमंत्री ले बिलासपुर ले रीवां चलने वाला बिलासपुर-रीवा एक्सप्रेस ल दुर्ग ले चलाये के आग्रह करीन। अइसने दुर्ग ले नौतनवा के बीच हप्ता म दू दिन चलने वाला नौतनवा एक्सप्रेस ल रोजे चलाये के मांग करीन। एखर उपर रेल मंत्री ह तुरते विचार करे के आश्वासन दीन।

कोरबा शहीद सम्मान

आजादी के अमृत महोत्सव के उपलक्ष्य म प्रधानमंत्री नरेंद्र मोदी डहार ले ए साल छब्बीस जनवरी के गणतंत्र दिवस समारोह के मउका म देश के वीर अमर शहीद मन ल स्मृति चिन्ह प्रदान करे के घोषणा करे गे रीहिस। एखर तहत प्रधानमंत्री कार्यालय ले मिले स्मृति चिन्ह शहीद मनके परीजन मन ल भेंट करे जात हे। इही कड़ी म कोरबा जिला के थाना पाली क्षेत्र अंतर्गत ग्राम मुनगाडीह निवासी शहीद सावर शत्रुघन प्रसाद डिक्सेना बर देगे स्मृति चिन्ह ओमन के परिजन नरेश डिक्सेना ल ससम्मान प्रदान करे गीस।

राष्ट्रीय लोक अदालत

प्रदेश के न्यायालय मन म काली चौदा मई के राष्ट्रीय लोक अदालत के आयोजन करे जाही। एखर तहत राजीनामा योग्य दाण्डिक प्रकरण, सिविल प्रकरण, परिवार न्यायालय के पारिवारिक विवाद, श्रम न्यायालय के प्रकरण, स्थायी जन उपयोगी लोक अदालत के प्रकरण, मोटर दुर्घटना दावा, विद्युत विभाग अउ राजस्व ले जुड़े प्रकरण मनके निराकरण आपसी राजीनामा के आधार म करे जाही।

हेलिकॉप्टर दुर्घटना

प्रदेश के राजधानी रायपुर के स्वामी विवेकानंद हवाई अड्डा म काली रतिहा होय हेलिकॉप्टर दुर्घटना म दू झिन पायलट मनके मउत होगे । ए हादसा हेलिकॉप्टर के लैंडिग के बेरा होइस। ए दुर्घटना ओतका बेर होइस जब छत्तीसगढ़ राज्य के हेलिकॉप्टर अपन नियमित प्रशिक्षण उड़ान म रीहिस। रायपुर के वरिष्ठ पुलिस अधीक्षक प्रशांत अग्रवाल ह बताइन कि ए दुर्घटना म हेलिकॉप्टर म सवार दूनो पायलट कैप्टन गोपाल कृष्ण पांडा अउ कैप्टन ए.पी. श्रीवास्तव गंभीर रूप ले घायल होगे। ओमन ल तुरते तीर के निजी अस्पताल म ले जाय गीस जिहां ओमन ल मृत घोषित करे गीस।
राज्य सरकार डहार ले जारी बयान अनुसार प्रारंभिक साक्ष्य मनके आधार म अइसे लगत हे कि ए दुर्घटना तकनीकी खराबी के सेती होय हे। दुर्घटना के सही कारण के पता लगाये बर डी.जी.सी.ए. अउ राज्य सरकार के आदेश म विस्तृत तकनीकी जांच कराये जाही।

राज्यपाल अनुसुइया उइके, मुख्यमंत्री भूपेश बघेल अउ पूर्व मुख्यमंत्री डॅाक्टर रमनसिंह ह दूनो पायलट के मउत उपर गहरा दुख जताय हे। इही बीच दिल्ली ले आए डीजीसीए के अधिकारी मनके मौजूदगी म दूनो पायलट के पोस्टमार्टम करे गीस । कैप्टन अजय प्रताप श्रीवास्तव के अंतिम संस्कार काली दिल्ली म करे जाही उंहें कैप्टन गोपाल कृष्ण पांडा के अंतिम संस्कार आज रायपुर के देवेन्द्र नगर मुक्तिधाम म करे गीस।

योग वेबिनार

केंद्रीय सूचना अउ प्रसारण मंत्रालय के क्षेत्रीय लोक संपर्क कार्यालय  बिलासपुर डहार ले आजादी के अमृत महोत्सव अंतर्राष्ट्रीय योग दिवस काउंटडाउन के तहत भरनी स्थ्ति समूह केंद्र सीआरपीएफ बिलासपुर परेड ग्राउण्ड म जागरूकता कार्यक्रम के आयोजन करे गीस। कार्यक्रम के मुख्य अतिथि बिलासपुर रेंज के आईजी रतनलाल डांगी रीहिन। अध्यक्षता सीआरपीएफ बिलासपुर के डीआईजी एल.एन. मिश्रा ह करीन।
ए मउका म आईजी डांगी ह जवान मनले कीहिन कि लगातार ड्यूटी करने वाला लोगन मनके मन अउ तन ल स्वस्थ राखे के सबले सही तरीका हरएक दिन योग करना हवय। ओमन कीहिन कि हरएक दिन जरूरी रूप ले योग करय ताकि तनावमुक्त रहय। उंहें सीआरपीएफ बिलासपुर के डीआईजी एल.एन. मिश्रा ह बताइन कि योग के महत्व ल देखत सीआरपीएफ जवान मन ल एक दिन पीटी त दूसर दिन योगाभ्यास कराये जात हे।

उंहें पत्र सूचना कार्यालय अउ प्रादेशिक लोक संपर्क कार्यालय रायपुर डहार ले आधुनिक जीवन शैली अउ योग विषय उपर वेबिनार के आयोजन करे गीस। वेबिनार म पत्र सूचना कार्यालय, प्रादेशिक लोक संपर्क कार्यालय, रायपुर ले जुड़े आने आने कार्यालय मनके अधिकारी अउ कर्मचारी, गीत-नाटक दल के कलाकार, स्वयंसेवी संगठन के सदस्य, विद्यार्थी अउ अध्यापक मन शामिल होइन।

दसवीं बारहवींं परिणाम

छत्तीसगढ़ माध्यमिक शिक्षा मंडल डहार ले कक्षा दसवीं अउ बारहवीं के मुख्य परीक्षा के परिणाम काली चौदा मई के घोषित करे जाही।

छत्तीसगढ़ माध्यमिक शिक्षा मंडल के सचिव प्रोफेसर व्ही.के. गोयल ह बताइन कि मंडल केसभागृह म काली मंझनियां बारा बजे स्कूल शिक्षा मंत्री डॅाक्टर प्रेमसाय सिंह टेकाम परिणाम जारी करही। परीक्षार्थी परीक्षा परिणाम मंडल के वेबसाईट डब्लू.डब्लू.डब्लू डॅाट सीजीबीएसई डॅाट एनआईसी डॅाट इन अउ रिजल्ट डॅाट सीजी डॅाट एनआईसी डॅाट इन म देख सकत हे।

कुशाभाउ ठाकरे पत्रकारिता दीक्ष्ांत

कुशाभाउ ठाकरे पत्रकारिता अउ जनसंचार विश्वविद्यालय रायपुर के दीक्ष्ांत समारोह तीस मई के आयोजित करे जाही। कार्यक्रम के मुख्य अतिथि राज्यपाल अउ कुलाधिपति अनुसुइया उइके होही। समारोह म उनतीस विद्यार्थी मन ल स्वर्ण पदक प्रदान करे जाही। संगेसंग दूसर अउ तीसर स्थान मिलइया अंठावन विद्यार्थी मन ल प्राविण्य प्रमाण पत्र अउ नौ सौ पैंतालिस विद्यार्थी मन ल डिग्री दे जाही।

वॉलीबाल चयन

प्रदेश के पांच वॉलीबाल खिलाड़ी मनके चयन खेलो इंडिया यूथ गेम्स बर होय हे। ए खिलाड़ी हरियाणा म तीन ले तेरह जून तक राखे गे राष्ट्रीय स्पर्धा म प्रदेश के टीम के नेतृत्व करही। चुने गे खिलाड़ी मन म दुर्ग अउ भिलाई के आंकाक्षा बनाफर, संचारी दीप्ति राठौर, पलक हिरानी अउ कुमारी रोशनी शामिल हे। बतादन कि चयनित खिलाड़ी एखर पहिली घलो आने आने राष्ट्रीय प्रतियोगिता मन म भाग ले रीहिन।