बारिश
प्रदेश के कतकोन जगा म पाछू तीन-चार दिन ले होवत सरलग बरसा के सेती जनजीवन अस्त-व्यस्त होगे हे। नदी-नाला उफान म होय के सेती कतकोन गांव के सड़क संपर्क जिला मुख्यालय ले कट गेहे। बस्तर जिला म आज घलो बरसा के दउर जारी हे। सावधानी ल देखत जिला कलेक्टर आज घलो जिला म चलत सबो निजी अउ सरकारी स्कूल मन म छुट्टी घोषित कर देहे।
एति राजनांदगांव जिला म शिवनाथ नदी उफान म हे अउ इंहा के तीन बैराज मोंगरा, घुमरिया अउ सूखा नाला ले अब तक बैंसठ हजार क्यूसेक पानी छोड़े जा चुके हे। अंबागढ़ चौकी ब्लॉक के महाराष्ट्र सीमा ले लगे गांव मन म बाढ़ के हालात बने हुए हे। इंहा खेत म लगे फसल ह घलो बूड़ गेहे।
दुर्ग जिला म पाछू करीबन पंद्रह घंटा ले बरसा के सेती निचला इलाका अउ सड़क म पानी भर गेहे। भिलाई के कतकोन जगा मन म नाली के गंदा पानी ह रद्दा उपर बोहात हे अउ शहर के तीनो अंडर ब्रिज अउ सिरसा गेट म घलो पानी भर गेहे।
उंहे बेमेतरा जिला म घलो शिवनाथ, संकरी अउ हाफ नदी के संग आने नदी मन ह खतरा के निसान ले उपर बोहात हे। एखर सेती कतकोन गांव के जिला मुख्यालय ले संपर्क टूट गेहे। जिला के तेंदूभाटा गांव म बिजली गिरे ले खेत म काम करत एक झिन माइलोगिन के मउत होगे।
इही बीच कोरबा जिल म घलो सरलग बरसा के सेती जनजीवन प्रभावित होय हे। हंसदेव नदी ले जुड़े नहर के तटबंध आज बीहनिया टूट गीस । जेखर ले तेज बहाव के संग पानी तीर तखार के रहइया इलाका मन म घुस गेहे। जिला प्रशासन के टीम ह राहत अउ बचाव के काम म लगे हुए हे।
कोविड टीकाकरण विशेष अभियान
प्रदेस म पंद्रह अगस्त ले पंद्रह सितंबर तक विसेस अभियान चलाके कोविड के पहिली अउ दूसर टीका के संग बूस्टर डोज लगाये जाही। एखर बर आज मंत्रालय म वीडियो कॉन्फ्रेसिंग के माध्यम ले मुख्य सचिव अमिताभ जैन के अध्यक्षता म कोविड टीकाकरण मॉनिटरिंग बर गठित राज्य स्तरीय स्टीयरिंग कमेटी के बइठका होइस।
बइठका म मुख्य सचिव ह संभागीय मुख्यालय म स्थित पांच बड़का कार्यालय म काली ले चौदह अगस्त तक टीकाकरण कैम्प लगाये के निर्देश् दीन। ओमन कीहिन कि उन्नीस, बीस अउ इक्कीस अगस्त के ब्लॉक स्तर के पांच बड़े कार्यालय मन म टीकाकरण शिविर म अमृत महोत्सव के तहत निशुल्क बूस्टर डोज लगाये जाही।
सामुदायिक वन संचालन अधिकार
राज्य म अनुसूचित जानजाति अउ आने परंपरागत वनवासी मन ल जागरूक करे बर पंद्रह अगस्त ले छब्बीस जनवरी तक सामुदायिक वन संसाधन अधिकार जागरूकता अभियान चलाये जाही। ए अभियान के एक ठिन केलैण्डर तियार करे गेहे। विश्व आदिवासी दिवस के मउका म मुख्यमंत्री भूपेश बघेल ह काली ए केलैण्डर के विमोचन करीन। ए अभियान के शुरूआत स्वतंत्रता दिवस के दिन सबो ग्राम पंचायत म वन अधिकार कानून के बारे म जानकारी देत करे जाही। एखर बाद अवइया बछर जनवरी तक सबो वन आधारित गांव के ग्राम सभा मन म सामुदायिक वन संसाधन म चर्चा प्रस्ताव करे के लक्ष्य घलो राखे गेहे।
हर घर तिरंगा
आजादी के पचहत्तर बछर पूरा होय के सेती देसभर म तेरह ले पंद्रह अगस्त तक हर घर तिरंगा अभियान चलाये जाही। ए अभियान के बारे म जागरूकता फैलाय खातिर छत्तीसगढ़ म कतकोन कार्यक्रम करे जात हे। इही कड़ी म रायपुर के मठपुरैना स्थित शासकीय मूकबधिर स्कूल के लईका मन डहार ले हमर तिरंगा थीम अउ आने बिसय म पेंटिंग बनाये गीस।
हाथी उत्पात
राजनांदगांव जिला के मोहला ब्लॉक स्थित खड़गांव क्षेत्र म जंगली हाथी मनके एक दल ह उत्पात मचात हे। ए हाथी मन ह कुसमी वन परिक्षेत्र के करीबन पांच ठिन गांव म पंद्रह ले जादा घर मन म नुकसान पहुंचइन अउ मांडरी-दिघावाड़ी इलाका म केला के फसल ल घलो रौंद दीस। फेर वन अमला ह लोगन मन ल सतर्क करे के संगेसंग हाथी मनके गतिविधि उपर नजर राखे हुए हे। मानपुर के रेंजर पी.आर. ठाकुर ह बताइन कि हाथी मनके ये दल काली संझा मासूल गांव के तीर देखे गीस। एखर बाद ये हाथी मन नदिया पार करके मामंडरी ले राजाडेरा होके महाराष्ट्र डहार बाढ़त हे।
मन की बात
प्रधानमंत्री नरेंद्र मोदी ह ए महीना के अठाईस तारीख के आकाशवाणी ले प्रसारित होवइया मन की बात कार्यक्रम बर लोगन मन ले सुझाव मांगीन हे। प्रधानमंत्री ह कीहिन हे कि आने आने विसय म ओमन ल भेजे गे सुझाव मन ल अवइया मन की बात कार्यक्रम म सामिल करे जाही।
लोगन मन अपन विचार नमो ऐप अउ माई जीओवी डॅाट ओपन फोरम म भेज सकत हे। ओमन टोल फ्री नंबर एक आठ शून्य शून्य – एक एक – सात आठ शून्य शून्य म अपन सुझाव हिंदी अउ अंग्रेजी म रिकॉर्ड करा सकत हे। फोन लाईन पच्चीस अगस्त तक खुला रीही। एक नौ दो दो म मिस्ड कॉल देके अउ एस एम एस के माध्यम ले लिंक पाके सीधा अपन सुझाव प्रधानमंत्री ल भेज सकत हे।
तुंहर सरकार तुहर द्वार
प्रदेस म परिवहन विभाग डहार ले तुंहर सरकार-तुंहर दुआर के सफलता पूर्वक संचालन करे जात हे। एखर तहत पाछू एक बछर के दउरान ग्यारा लाख पचासी हजार ले जादा स्मार्ट कार्ड आधारित पंजीयन प्रमाण-पत्र अउ ड्राइविंग लाइसेंस आवेदन मन ल उंखर घर म भेजे जा चुके हे। ए सुविधा के सुरू होय ले लोगन मन ल परिवहन संबंधी बाईस ठिन सेवा के लाभ घर बइठेच मिलत हे। लोगन मनके सुविधा बर परिवहन विभाग डहार ले एक हेल्पलाइन नंबर – सात पांच आठ शून्य आठ – शून्य आठ शून्य तीन शून्य जारी करे गीस हे।
रक्षाबंधन
भाई-बहिनी के पवित्र स्नेह अउ प्रेम के प्रतीक रक्षाबंधन काली मनाए जाही। रक्षाबंधन के तिहार ल लेके राजधानी रायपुर समेत प्रदेश के सबो जिला के बाजार मन म बड़ रौनक देखे जावत हे। बाजार म कतकोन प्रकार के रंग-बिरंगा राखी के स्टॉल लगाए गेहे। ए बखत घलो स्व-सहायता समूह के माइलोगिन मन डहार ले बनाए गे राखी आकर्षण के केंद्र बने हुए हे।
इही बीच जांजगीर-चांपा के बहेराडीह स्थित किसान स्कूल म माइलोगिन मन पर्यावरण संरक्षण बर जागरूकता लाये के उद्देश्य ले पेड़ मन ल राखी बांधके रक्षाबंधन के तिहार मनाइन।
राज्यपाल अनुसुईया उइके अउ मुख्यमंत्री भूपेश बघेल ह रक्षाबंधन के मउका म प्रदेशवासी मन ल बधाई अउ शुभकामना दीन हे।
सड़क सुरक्षा
प्रदेस म रद्दा दुर्घटना उपर रोक लगाये बर परिवहन विभाग ह एक ठिन नवा कदम उठाय हे। एखर तहत सड़क सुरक्षा खातिर लोगन मनल जागरूक करे बर सोशल मीडिया के मदद ले जाही। एमा अंतर्विभागीय लीड एजेंसी ह लोगन मनले सोशल मीडिया ले जुड़के प्रोत्साहनकर्ता बने के अपील करे हे।
अउ अब थोरकुन समाचार सार म-
– मुख्यमंत्री भूपेश बघेल ह साहित्यकार अउ पत्रकार लीलाधर मंडलोई ल चौदह अगस्त के वसुंधरा सम्मान ले सम्मानित करही।
– इंदिरा गांधी कृषि विश्वविद्यालय म शासकीय अउ निजी महाविद्याल य मन म चलाये जात बीएससी ऑनर्स कृषि, उद्यानिकी अउ कृषि वानिकी पाठ्यक्रम म भर्ती बर ऑनलाईन काउसिंलिग के काम चलत हे। उंहें बीएससी स्नातक पाठ्यक्रम म प्रवेश बर पंद्रह अगस्त तक आवेदन करे जा सकथे।
– दुर्ग के सेंट थॉमस महाविद्यालय के एनसीसी कैडेट साक्षी साहू के चयन स्वतंत्रता दिवस दिल्ली कैम्प बर होय हे। ए कैम्प एक से सोला अगस्त तक नई दिल्ली म करे जात हे।