त्रिस्तरीय पंचायत उपचुनई म राज्य के इक्कीस जिला म जनपद पंचायत सदस्य के तीन, सरपंच के बासठ अउ पंच के बावन पद बर काली वोट डारे जाही। वोट डारे के बेरा बीहनिया सात बजे ले मंझनियां तीन बजे तक रीही। एखर बर दू सौ पचपन मतदान केंद्र बनाय गेहे।
जउन पंचायत क्षेत्र म चुनई होना हे उंहा अठाईस जून के सामान्य अवकाश घोषित करे गेहे। उंहें अइसन कारखाना जिहां हप्ता म सात दिन काम होथे उंहा पहिली अउ दूसर पाली के मजूर मन ल वोट डारे बर मतदान के समय-सीमा खतम होय के पहिली दू-दू घंटा के छुट्टी दे जाही। एखर संगेसंग जउन कारखाना म चौबीस घंटा उत्पादन काम होथे, उंहा के मजदूर मन ल बारी-बारी ले वोट डारे के सुविधा दे जाही । चुनाव ल देखत एखर ले जुड़े क्षेत्र म छब्बीस ले अठाईस जून तक शराब बेचे म प्रतिबंध रीही। ये संबंध म आबकारी विभाग ह संबंधित जिला के कलेक्टर मन ल निर्देश जारी कर देहे।
काली अठाईस जून ले प्रदेशभर म ग्रामसभा के आयोजन करे जाही। एमा रायपुर जिला पंचायत के मुख्य कार्यपालन अधिकारी रवि मित्तल ह रायपुर जिला के सबो अनुविभागीय अधिकारी अउ जनपद के मुख्य कार्यपालन अधिकारी मन ल काली ले ग्रामसभा कराय के निर्देश दीन हे।
ओमन हरएक ग्राम पंचायत मुख्यालय अउ ओखर आश्रित गांव म ग्राम सभा के आयोजन करे बर एक समय सारिणी तियार करे अउ उंहा के लोगन के जरूरत के मुताबिक अधिकारी अउ कर्मचारी मन ल विशेष जिम्मेवारी देके निर्देश दीन। मुख्य कार्यपालन अधिकारी ह राखे गे ग्रामसभा अउ पारित संकल्प ल ई-ग्राम स्वराज पोर्टल म अपलोड करे के कार्रवाई सुनिश्चित करे बर कीहिन हे।
मुख्यमंत्री भूपेश बघेल ह जशपुर जिला म एक सौ बीस करोड़ पचास लाख रूपिया ले जादा के एक सौ बावन ठिन काम के लोकार्पण अउ भूमिपूजन करीन हे। अपन भेंट-मुलाकात कार्यक्रम के बेरा मुख्यमंत्री ह पर्यटन ल बढ़ावा देबर रिसोर्ट म टेलिस्कोप के शुभारंभ करीन। ये मउका म ओमन कीहिन कि जिला म पर्यटन के बहुते संभावना हवय। जिला म चारो कोति प्रकृति के सुघरई देखे बर मिलत हे। ओमन कीहिन कि पर्यटन ल बढ़ावा देबर जिला म सरलग विकास काम करे जात हे। श्री बघेल ह कीहिन कि पर्यटन स्थल के विकास ले इंहा के लोगन ल रोजगार मिलही अउ आमदनी बाढ़ही।
मुख्यमंत्री ह रिसोर्ट म जिलाधिकारी मनके समीक्षा बइठका लीन। ये बेरा म ओमन कीहिन कि जम्मों अधिकारी मन ल क्षेत्र के विकास अउ लोगन के हित म सरलग काम करना चाही। ओमन यहू कीहिन कि लोगन के आमदनी म बढ़वार करके ओखर जीवन स्तर ल उंचा करना सरकार के प्रमुख उद्देश्य हरय। श्री बघेल ह अधिकारी मनले सबो किसम के कृषि, उद्यानिकी अउ बागवानी फसल के उत्पादन बर विस्तृत कार्य योजना देखाय बर कीहिन। भू माफिया मनके सक्रिय रेहे के सिकइत म मुख्यमंत्री ह आयुक्त ल पंद्रह दिन के भीतरी जम्मों प्रकरण के जांच करके रिपोर्ट देके निर्देश दीन। गौ तस्करी के मामला म कीहिन कि ये समस्या पूरा राष्ट्र के हे ।गोधन न्याय योजना ले सरकार ह एखर समाधान खोजे हे। ये बेरा म श्री बधेल ह रंजीता स्टेडियम परिसर म फूड प्रोसेसिंग एंड पैंकेजिंग लैब म खाद्य उत्पाद प्रसंस्करण प्रयोगशाला अउ पैकेजिंग केंद्र भवन के लोकार्पण करीन। मुख्यमंत्री ह जोहार जशपुर वेबसाइट घलो शुरू करीन। एखर संगेसंग स्वामी आत्मनंद सासकीय उत्कृष्ट हिंदी माध्यम बालक विद्यालय के शुभारंभ करीन
प्रदेश के मुख्य सचिव अमिताभ जैन ह कीहिन हे कि किसान मनके जरूरत के हिसाब ले समिति म खातु के मात्रा सुनिश्चित करय। ओमन सहकारी समिति म खातु बीजा उपर हरएक दिन निगरानी राखे के निर्देश दीन हे। श्री जैन ह आज खरीफ बछर दू हजार बाईस तेईस बर प्रदेश म रासायनिक उर्वरक के मांग अउ ओला बांटे के स्थिति के समीक्षा करीन। मंत्रालय म राखे गे समीक्षा बइठका म श्री जैन ह अधिकारी मनले कीहिन कि धान के फसल के उत्पादन बर जरूरी उर्वरक के उपलब्धता समिति स्तर म निश्चित करे जाय। एखर बर समितिवार तियारी करे के निर्देश दीन हे।
ओमन यहू कीहिन कि कोनो रासायनिक खातु के कमी के सेती फसल उत्पादन प्रभावित झन होवय। ओमन खरीफ बछर दू हजार बाईस-तेईस म फसल परिवर्तन करइया किसान मनके विशेष रूप ले मदद करे बर कीहिन । मुख्य सचिव ह अधिकारी मन ल नैनो उर्वरक के राज्य के जलवायु के मुताबिक फसल उत्पादन म पड़इया प्रभाव के जानकारी बर हरएक सहकारी समिति स्तर म एक किसान के चिन्हारी करके अउ तय करे गे रकबा म एखर प्रदर्शन करे के निर्देश घलो देहे।
राष्ट्रीय सांख्यिकी कार्यालय कोति ले आजादी के अमृत महोत्सव म आज ले राष्ट्रव्यापी प्रश्नोत्तरी प्रतियोगिता ‘अन्वेषा दू हजार बाईस‘ के आयोजन करे गेहे। रायपुर के न्यू सर्किट हाउस म प्रतियोगिता के शुभारंभ मउका म आजादी के अमृत ज्योति प्रज्वलन करे गीस। ये जोत पंद्रह अगस्त दू हजार बाईस तक सरलग प्रज्वलित राखे जाही। ये प्रतियोगिता तीन जुलाई तक चलही।
एति रायपुर रेलमंडल म रेलवे सुरक्षा बल कोति ले पचहत्तरवां आजादी के अमृत महोत्सव के सेती रन फॉर यूनिटी के आयोजन करे गीस। एमा एक सौ तिरालिस अधिकारी अउ रेलवे सुरक्षा बल मनके सदस्य मन ह भागी लीन । ए बेरा म भाटापारा अउ भिलाई म एक सौ पच्चीस पौधा रोपे गीस। संगेसंग रेलवे सुरक्षा बल परिसर के सफई करके स्वच्छता के संदेस दे गीस हे।
छत्तीसगढ़ कर्मचारी-अधिकारी फेडरेशन ह केंद्रीय कर्मचारी मन असन चौंतीस प्रतिशत महंगाई भत्ता दे समेत आने मामला लेके उनतीस जून के एक दिवसीय आंदोलन के आह्वान करीन हे। ये आंदोलन म सर्व शिक्षक संघ के संघरे के संभावना हरय। संघ के नेता मन कीहिन हे कि छत्तीसगढ़ राज्य के कर्मचारी मन ल केंद्रीय कर्मचारी के तुलना म बारा प्रतिशत कमती महंगाई भत्ता दे जावत हे। संगेसंग ओमन सातवां वेतनमान के मुताबिक गृह भाड़ा भत्ता देके घलो मांग करीन हे।
प्रदेस म काली अठाईस जून के कतकोन जगा म हल्का ले मध्यम बरसा होय अउ गरज-चमक संग छींटा बौछार पड़े के संभावना हवय। उंहें एक दू जगा म गाज गिरे के संभावना जताय गेहे। मौसम विभाग ले मिले जानकारी के मुताबिक उपरी हवा के चक्रीय चक्रवाती घेरा मध्यप्रदेश के मध्यभाग म हवय। उंहें एक ठिन कमती दबाव के क्षेत्र दक्षिण-पश्चिम राजस्थान ले उत्तर छत्तीसगढ़ होवत पश्चिम मध्य बंगाल के खाड़ी तक बने हे। जेखर प्रभाव ले काली प्रदेश के कई ठन जगा म बरसा होय के संभावना हवय।
– छत्तीसगढ़ लोक सेवा आयोग कोति ले खनिज अधिकारी अउ सहायक भौमिकीय विद्, उप पुलिस अधीक्षक-रेडियो के परीक्षा तीस जून के दू पाली म राखे जाही। ये परीक्षा रायपुर म तय करे गे चार ठिन परीक्षा केंद्र म होही।
– मुंगेली म भारतीय जनता पार्टी के जिला इकाई कोति ले मीसाबंदी अउ उंखर परिवार वाले मनके सम्मान करे गीस।
– सरायपाली नगर पालिका अध्यक्ष अमृत पटेल के खिलाफ दस झिन पार्षद मन ह जिला निर्वाचन अधिकारी ल अविश्वास प्रस्ताव के अरजी सौंपीन।
– राजनांदगांव जिला के चिचोला क्षेत्र के तेलीटेला गांव म करंट के चपेट म आय ले दू झिन भाई के मउत होगे। उंहें इही जिला म कोरकोट्टी तीर गाड़ी के ठोकर ले एक मनखे के मउत होगे।
और
– कोंडागांव जिला घोड़ागांव तीर राष्ट्रीय राजमार्ग क्रमांक तीस म होय रद्दा दुर्घटना म एक मनखे के मउकाच म मउत होगे। उंहें कुछएक लोगन गंभीर रूप ले घायल होगे हे।