मन की बात
प्रधानमंत्री नरेन्द्र मोदी ह राष्ट्र के युवा मन ले लोकतांत्रित मूल्य उपर विश्वास बनाय राखे के आह्वान करीन हे। आकाशवाणी ले मन की बात कारीकरम म श्री मोदी ह किहीन हे कि अवइया पीढ़ी ल आपातकाल के दउरान चलाए गे जन-आंदोलन ल भूलना नइ चाही। देस म 25 जून, 1975 के अपातकाल लगाय गे रिहीस। प्रधानमंत्री ह किहीन कि उही बेरा देस के नागरिक मनके जम्मों अधिकार छिन्न ले गे रिहीस। श्री मोदी ह किहीन कि आज जिहां भारत अपन स्वतंत्रता के 75 बछर के उत्सव मनावत हवय, त अइसन बेरा म देसवासी मन ल आपातकाल के ओ भयानक दउर ल कभू नइ भूलना चाही।
ओमन किहीन कि पाछु कुछु बछर म अंतरिक्ष के क्षेत्र म देस ह कई ठिन बड़का उपलब्धि हासिल करे हवय। एमा ले एक उपलब्धि इन-स्पेस नाव के एजेंसी स्थापित करना हवय, जउन भारत के निजी क्षेत्र खातिर नवा-नवा अवसर ल प्रोत्साहित करथे। प्रधानमंत्री ह किहीन कि ओखर मनके ए सुरूवात ह बिसेस रूप ले देस के युवा मन ल अपन डहार आकर्षित करे हे।
प्रधानमंत्री ह किहीन कि भारत के युवा मन स्टार्टअप ले लेके खेल जगत तक म नवा-नवा कीर्तिमान बनावत हवय। अभी के बेरा म खेल इंडिया युवा खेल मन म देस के खेलइया मन ह अब्बड़ अकन नवा रिकॉर्ड बनाय हवय।
ओमन आगू किहीन कि देस म मानसून ह लगातार आगू बाढ़त हवय, जेखर ले लोगन मन ले ओमन जल संरक्षण करे खातिर बिसेस प्रयास करे के अपील करीन। संगेसंग मन की बात कारीकरम म प्रधानमंत्री ह जम्मों लोगन मन ल कोविड ले बचाव खातिर सबो नियम मन के पालन करे बर घलो किहीस हवय।
मुख्यमंत्री-भेंट मुलाकात
प्रदेस के विशेष पिछड़ा जनजाति के शिक्षित युवा मन ल उंखर योग्यता अनुसार तृतीय अउ चतुर्थ श्रेणी के पद म सरकारी नौकरी दे जाही। मुख्यमंत्री भूपेश बघेल ह आज जशपुर जिला के बगीचा गांव म भेंट-मुलाकात कारीकरम के दउरान ए घोसना करीन। ओमन बगीचा गांव म पॉलीटेक्निक कॉलेज, स्वामी आत्मानंद उत्कृष्ट अंग्रेजी माध्यम स्कूल खोले जाय के, बैडमिंटन कोर्ट बनाय जाय के अउ सामुदायिक स्वास्थ्य केन्द्र म 100 ठिन बिस्तर के सुविधा देके संगेसंग आने-आने अब्बड़ अकन घोसना करीन।
अपन प्रवास के दउरान मुख्यमंत्री ह कुनकुरी विधानसभा म 82 करोड़ रूपिया ले जादा के आने-आने विकास कार्य मनके लोकार्पण अउ भूमिपूजन करीन। ए दउरान मुख्यमंत्री ह कुनकुरी म जिला अधिकारी मनके समीक्षा बैठक लीन अउ सरकारी योजना के लाभ जम्मों मनखे तक पहुंचाय के निरदेस दीन। बइठका म मुख्यमंत्री ह राजस्व प्रकरण मनके समीक्षा करत लंबित प्रकरण ल समय-सीमा म करे के संगेसंग अभियान चलाके लोगन मनके जाति प्रमाण पत्र बनाय बर किहीन हे।
एखर पहिली, कुनकुरी म पत्रकार मन ले गोठबात करत मुख्यमंत्री ह किहीन कि छत्तीसगढ़ पहिली नक्सलगढ़ के नाम ले जाने जात रिहीस। फेर, अब के बेरा म राम वनगमन पर्यटन परिपथ, देवगुड़ी, आदिवासी नृत्य महोत्सव जइसन आयोजन अउ पर्यटन स्थल मन ल बढ़ावा मिले ले छत्तीसगढ़ के एक ठिन नवा पहिचान बने हे। ओमन किहीन कि राज्य म रोजगार के क्षेत्र म सरलग कामबूता चलत हवय। बिजली बिल हाफ योजना के लाभ लोगन मन ल मिलत हवय। उद्योग मन खातिर उहां के रहइया मन ल निर्णय ले बर पड़ही। ओमन किहीन कि राजस्व विभाग ले संबंधित सिकायत मन ल घलो जल्दीच दूर कर ले जाही।
यूजीसी नेट
विश्वविद्यालय अनुदान आयोग राष्ट्रीय पात्रता परीक्षा-यू.जी.सी. -नेट 2022 के तारीख के घोसना कर दे गे हवय। यू.जी.सी. नेट के दिसंबर 2021 अउ जून 2022 के परीक्षा ल ए बछर एके संघरा आयोजित कराय जाही। जउन परीक्षा ह 08 जुलाई ले सुरू होके 14 अगस्त तक संपन्न होही।
कोरोना समाचार
स्वास्थ्य मंत्री टी.एस. सिंहदेव ह एक घांव फेर कोरोना संक्रमित होगे हवय। ओमन अपन ट्वीट म जानकारी दीन कि दिल्ली प्रवास ले लहुटे के बाद ओमन कोविड के जांच करईन, जेमा उंखर मनके रिपोर्ट पॉजिटिव आय हवय। श्री सिंहदेव ह किहीन कि अभी उंखर स्वास्थ्य बने हवय अउ ओमन डॉक्टर के सलाह म होम आइसोलेशन के नियम के पालन करत हवय।
इही बीच, प्रदेस म काली कोरोना संक्रमण के 92 ठिन नवा मामला मिलीस हवय। उहें, 95 झिन मरीज मन ल स्वस्थ होय के बाद डिस्चार्ज करे गे हवय। दुरूग जिला म सबले जादा 26 झिन मरीज मन कोरोना संक्रमित पाय गे हवय। राज्य म कोरोना के सक्रिय मरीज मनके संख्या ह बाढ़के 640 पहुंच गे हवय।
उहें, राज्य म कोविड के सरलग टीकाकरण चलत हवय। प्रदेस म अब तक 4 करोड़ 13 लाख 39 हजार ले जादा टीका लगाय जा चुके हे।
ठगी आरोपी गिरफ्तार
राजधानी रईपुर म एक ठिन निजी बैंक ले फर्जी चेक के जरिया 16 करोड़ 40 लाख रूपिया ले जादा के रासि निकाले जाय के मामला आगू आय हवय। ए मामला म पुलिस ह दू झिन बैंक मैनेजर समेत चार झिन आरोपी मन ल गिरफ्तार करे हवय। पूछताछ म आरोपी मन ल बतईन कि दू ठिन प्राईवेट बैंक के मैनेजर मनके संग मिलके ए ठगी के घटना ल अंजाम दे गीस हवय।
रईपुर के वरिष्ठ पुलिस अधीक्षक प्रशांत अग्रवाल ह बतईन कि आरोपी मनके पास ले 84 लाख रूपिया बरामद करे गे हवय। ए मामला के आने आरोपी मनके तलाश करे जावत हे। एसपी ह बतईन कि ए बैंक के एक झिन कर्मचारी ह थाना म रिपोर्ट दर्ज करईन कि छत्तीसगढ़ राज्य कृषि मंडी बोर्ड के खाता ले फर्जी तरीका ले करोड़ो रूपिया निकाल के आने-आने बैंक खाता मन म ट्रांसफर कर दे गे हवय। एखर बाद पुलिस ह जांच सुरू करीन अउ हैदराबाद ले दू झिन अउ रईपुर ले 5 झिन आरोपी मन ल गिरफ्तार करीन।
दुर्घटना
प्रदेस म पाछु 24 घंटा के दउरान होय आने-आने सड़क दुर्घटना म दू झिन नोनी मन समेत तीन झिन लोगन मनके मउत होगे। उहें, 20 ले जादा लोगन मन ह घायल होगे हवय।
जानबा के मुताबिक कबीरधाम जिला म पंडरिया विकासखंड के पोलमी गांव के तीर म काली संझा प्रयागराज ले आवत यात्री बस ह अपन नियंत्रण ल गंवा के खाई म गिर गीस, जेखर ले दू झिन नोनी मनके मउत होगे अउ 20 ले जादा लोगन मन ह घायल होगीन। बस म तकरीबन 60 यात्री मन सवार रिहीन, जउन मन सुल्तानपुर ले बिलासपुर लहुटत रिहीन। घायल मन ल कुकदूर गांव के प्राथमिक स्वास्थ्य केन्द्र अउ पंडरिया के सामुदायिक स्वास्थ्य केन्द्र म भर्ती कराय गे हवय।
मुख्यमंत्री भूपेश बघेल ह घटना के जानकारी पाय के बाद जिला प्रशासन ल तुरते राहत पहुंचाय अउ घायल मनके उपचार करे के निरदेस दीन।
उहें, जांजगीर-चांपा जिला के अकलतरा म तेज रफ्तार ट्रक ह दुपहिया सवार एक झिन गुरूजी ल टक्कर मार दीन, जेखर ले उंखर मउकाच म मउत होगे।
अउ अब थोरकुन समाचार सार म-
– कोरबा म काली भारतीय जनता पार्टी के आने-आने मंडल मन म आपातकाल के दउरान मीसाबंदी कानून के तहत जेल म बंद करे गे लोगन मनके सम्मान करे गीस।
– जशपुर जिला के पंडरापाठ चौकी के भड़िया गांव म पहाड़ी नाला म काली एक झिन महिला अउ उंखर दू झिन लइका मन बोहा गीन। जानबा मिले के बाद रेस्क्यू टीम ह एक झिन बच्चा के सव ल काली संझा बरामद कर लीन। उहें, महिला अउ एक झिन आने लइका के सव घलो आज बरामद कर ले गे हवय।
– महासमुंद जिला के कोमाखान पुलिस ह टेमरी के पास एक गाड़ी ले 280 किलोग्राम गांजा जब्त करीस, जेखर कीमत तकरीबन 56 लाख रूपिया बताय जावत हे। ए मामला म पुलिस ह तीन झिन लोगन मन ल गिरफ्तार करीन हे।
और
– स्वर्गीय राजेश गंजीर के स्मृति म चौथा राज्य स्तरीय कराटे प्रतियोगिता आज ले धमतरी के इंडोर स्टेडियम म सुरू होईस। ए स्पर्धा म दुरूग, बिलासपुर, भिलाई, बेमेतरा, रईपुर अउ राजनांदगांव के खेलइया मन भाग लेवत हवय।