आज दिनभर के खबर ल अपन गुरतुर छत्तीसगढ़ी भाखा म पढ़व

अंतर्राष्ट्रीय योग दिवस 01

आठवां अंतर्राष्ट्रीय योग दिवस काली इक्कीस जून के देशभर म मनाये जाही। काली होवइया अंतर्राष्ट्रीय योग दिवस के पूरा तियारी कर ले गेहे। एसो अंतर्राष्ट्रीय योग दिवस आजादी के अमृत महोत्सव बछर म होवत हे। एखर सेती देश के पचहत्तर प्रतिष्ठित जगा म योग दिवस मनाये जाही। प्रधानमंत्री नरेंद्र मोदी  काली मैसूर के मैसूर पैलेस ग्राउण्ड एक सामूहिक योग प्रदर्शन हजारो प्रतिभागी मन संग सामिल होही।  प्रधानमंत्री ह अंतर्राष्ट्रीय योग दिवस ल सफल बनाये अउ योग ल लोकप्रिय बनाये के आह्वान करीन हे।
ओमन कहिन कि एसो अंतर्राष्ट्रीय योग दिवस के विसय हरय- मानवता के लिये योग एसो अंतर्राष्ट्रीय योग दिवस म एक आने आकर्षण गार्जियन रिंग होही। ये एक रिलेयोग स्ट्रीमिंग कार्यक्रम होही। जेमा विदेश म भारतीय मिशन कोति ले राखे गे अंतर्राष्ट्रीय योग दिवस कार्यक्रम के डिजिटल फीड ल एक संघरा ले जाही।  कतकोन केंद्रीय मंत्री आने आने जगा म योग कार्यक्रम म भाग लीही।
एति छत्तीसगढ़ म घलो काली अंतर्राष्ट्रीय योग दिवस के मउका म कार्यक्रम राखे गेहे। ये मउका म रायपुर के चंदखुरी के माता कौशल्या धाम ले लोगन योग अउ संयंम के पाठ सीखहीं। मुख्य कार्यक्रम योग आयोग के अध्यक्ष ज्ञानेश शर्मा के अगवई म कौशल्या मंदिर परिसर म काली बीहनिया सात बजे राखे गेहे। ये बेरा म योग प्रशिक्षक अउ योगाचार्य के देखरेख म बारा सौ ले जादा प्रतिभागी योगाभ्यास प्राणायाम अउ ध्यान करही।
उंहें भारत सरकार के सूचना अउ प्रसारण मंत्रालय के केंद्रीय संचार ब्यूरो कोति ले कबीरधाम जिला के भोरमदेव मंदिर परिसर म अंतर्राष्ट्रीय योग दिवस म केंद्रीय जनजाति कार्य मंत्रालय के राज्य मंत्री रेणुका सिंह के मौजूदगी म कार्यक्रम होही।

अंतर्राष्ट्रीय योग दिवस 02

एति मुख्यमंत्री भूपेश बघेल ह मंत्री, विधानसभा अध्यक्ष, संसदीय सचिव,     विधायक, आयोग प्राधिकरण के अध्यक्ष अउ सदस्य मन ल मुख्य अतिथि के रूप म नाम बताय गेहे। विधानसभा अध्यक्ष डॅाक्टर चरणदास महंत कोरबा जिला के कार्यक्रम म मुख्य अतिथि के रूप म, गृहमंत्री ताम्रध्वज साहू दुर्ग, पंचायत अउ ग्रामीण विकास मंत्री सरगुजा जिला के कार्यक्रम म सामिल होही।
इही बीच राज्यपाल अनुसुइया उइके अउ मुख्यमंत्री भूपेश बघेल ह प्रदेसवासी मन ल अंतर्राष्ट्रीय योग दिवस के बधाई देवत कीहिन कि हरएक मनखे ल  योग ल अपन जिनगी म सामिल करना जरूरी हे। ओमन कीहिन कि रोज योग करे ले शरीर स्वस्थ होय के संगेसंग मन के एकाग्रता बाढ़थे।

दुर्घटना

बिलासपुर जिला के रतनपुर तीर रद्दा दुर्घटना म चार झिन के मउत होगे उंहें एक झिन गंभीर रूप ले घायल हे। खबर के मुताबिक ए सबो झन कोरबा के रहवइया रीहिन। कुछु काम बर रायपुर आय रीहिन हे, अउ काली रतिहा कोरबा बर लहुटत रीहिन। इही बेरा रतनपुर के भरारी गांव तीर भिनसरहा कार ह एक खड़े टरक ले टकरा गे । ये दुर्घटना म चार झन के मउकाच म मउत होगे। मउत होय लोगन म एक माइलोगिन सामिल हे। गंभीर रूप ले घायल एक आने मनखे ल अस्पताल म भर्ती कराय गेहे।
उंहें कोरबा जिला के बालको क्षेत्र म एक कार के अंतेतंते होके पुलिया ले नीचे गिरे म कार म बइठे एक मनखे के मउत होगे अउ दू झन घायल होगे हे, जउन ल इलाज बर अस्पताल म भर्ती कराय गेहे।

हादसा

रायगढ़ जिला के खरसिया थानाक्षेत्र म काली बीहनिया मांड़ नंदिया म जोरदरहा बहाव के सेती एके परिवार के पांच झिन बोहा गीन, जेमा दू झन के बूड़े ले मउत होगे, उंहें तीन झन ल गांव के लोगन के मदद ले बाहिन निकाल ले गीस।
खबर के मुताबिक ये सबो झन खरसिया के मदनपुर के रहवइया हरय। इतवार के बीहनिया परिवार के जम्मों झन नंदिया म नहाये बर गे रीहिन। इही बेरा नंदिया के जलस्तर बाढ़े ले सबो झन बहाव के चपेट म आगीन। तीर तखार के लोगन मन कोनो किसम ले तीन झन ल बाहिर निकालिन फेर दू झिन नाबालिक भाई बहिनी नंदिया के तेज बहाव म बोहागे। पुलिस अउ रेस्क्यू टीम ह नंदिया के संगेसंग तीर तखार के क्षेत्र म खोजबीन शुरू कर देहे। कुछएक घंटा बाद एमा ले एक झिन नोनी ल रेस्क्यू टीम ह नंदिया ले बाहिरग निकालिस। ओखर हालत गंभीर रीहिस हे, जउन ल खरसिया अस्पताल म भर्ती कराय गीस, जिहां इलाज के बेरा ओखर मउत हेगे।
उंहें रेस्क्यू टीम कोति ले चोबीस घंटा म तलासी के बादे आज लापता बालक ल ढूंढ निकाले गीस। फेर पानी म बूडे ले ओखर मउत होगे रीहिस।

माओवादी मुठभेड़

छत्तीसगढ़ के गांतापार जंगल सीमा ले लगे लांजी बालाघाट सीमा म आज पुलिस अउ माओवादी मनके बीच मुठभेड़ होइस। मध्यप्रदेश के हॉक फोर्स ह सीमा म बड़े कार्रवाई करीस, जेमा तीन झिन माओवादी मारे गीस।
खबर के मुताबिक पुलिस ल बालाघाट क्षेत्र के ग्राम पंचायत खांडापाड़ी के कंदला गांव के जंगल म बड़ संख्या म माओवादी मनके रेहे के सूचना मिले रीहिस हे। एति कोंडागांव जिला के मरदापाल थाना क्षेत्र म माओवादी मन ह मुखबीरी के शक म गांव के एक झिन मनखे के गोली मारके हत्या कर दीन।

ट्रेन

ईस्ट-कोस्ट रेलवे संबलपुर रेलमंडल के टीटलागढ़-थेरूबाली सेक्सन म ट्रेफिक कम पॉवर ब्लॉक के काम करे जाही। एखर सेती कुछएक गाड़ी के अवई जवई प्रभावित होही। एमा निजामुद्दीन-विशाखापट्नम सुपर फास्ट एक्सप्रेस अपन तय बेरा सात बजे ले छै घंटा अबेर ले चलही। ये गाड़ी निजामुद्दीन स्टेशन ले करीबन एक बजे रवाना होही। उंहें दुर्ग ले रवाना होवइया दुर्ग-राजेंद्र नगर साउथ बिहार एक्सप्रेस काली इक्कीस जून के रद्द रही।

एक्सप्रेस वे

प्रदेस के लोक निर्माण मंत्री ताम्रध्वज साहू ह कीहिन हे कि रायपुर के लोगन ल बहुते जल्दी एक्सप्रेस वे के सौगात मिल जाही। ओमन कीहिन कि एक्सप्रेस वे के निर्माण काम आखरी चरण म हवय अउ एखर लोकार्पण जल्दीच करे जाही । श्री साहू ह बताइन कि छत्तीसगढ़ म पाछू तीन साल म करीबन पंद्रह सौ करोड़ के लागत ले एक सौ बहत्तर ठिन पूल बनाये गेहे।

मौसम

प्रदेस म मानसून आगे हे। राज्य के कई ठन जिला म पाछू दू दिन ले हल्का ले मध्यम बरसा होवत हे। उंहें तेज हवा, अंधड़ के सेती प्रदेस के कई ठन जगा म पेड़ अउ बिजली के खंभा गिरे के समाचार मिले हे।
खबर के मुताबिक काली रायगढ़ जिला म अंधड़ के संग होय बरसा ले कतकोन जगा बड़े-बड़े पेड़ धरासायी होगे संगेसंग कुछएक जगा के बिजली के खंभा घलो गिर गेहे। उंहें गाज गिरे ले कई ठन सब स्टेशन ल नकसान पहुंचे हे जेखर ले क्षेत्र मन म बिजली गोल रीहिस।
एति बीजापुर म घलो अंधड़, बरसा अउ गाज गिरे ले बिजली के तार टूटे हे अउ कई ठन पेड़ गिर गेहे। अवइया चौबीस घंटा म प्रदेस के कतकोन जगा म गरज चमक संग छींटा बौछार होय के संभावना हरय।
मौसम विभाग ले मिले खबर के मुताबिक एक पूर्व पश्चिम द्रोणिका, पश्चिम उत्तर प्रदेश ले बांग्लादेश तक बने हे। उंहे एक आने द्रोणिका दक्षिण छत्तीसगढ़ ले दक्षिण तटीय आंध्रप्रदेश तक बने हे। जेखर प्रभाव ले बरसा होय के संभावना हे, उंहें एक दू जगा म गाज गिरे अउ भारी बरसा के चेतावनी दे गेहे।

संक्षिप्त समाचार

– बिलासपुर के आईजी रतनलाल डांगी ह कहिन हे कि बोरवेल खुला छोडे  म बोरिंग खोदइया अउ ओखर मालिक दूनो उपर एफआईआर दरज करे जाही। उंहें आईजी ह संभाग के लोगन ले अपील करीन हे कि अइसन किसम के जानकारी मिले म तुरते पुलिस ल सूचना देवय।
अउ

– राजधानी रायपुर के छत्तीसगढ़ पंडरी हाट बाजार म चलत जगार मेला ल पांच दिन बर अउ बढ़ा दे गेहे। अब ये मेला चौबीस जून तक चलही।