खैरागढ़ उपचुनाव
भारतीय जनता पार्टी ह खैरागढ़ उपचुनाव बर कोमल जंघेल ल अपन उम्मीदवार घोषित करे हे। ओमन दू बार खैरागढ़ ले विधायक अउ भाजपा कार्यकाल म संसदीय सचिव रीहिन। कोमल जंघेल वर्तमान म भाजपा के अन्य पिछड़ा वर्ग प्रकोष्ठ के राष्ट्रीय कार्यकारिणी सदस्य हे।
उंहे जनता कांग्रेस छत्तीसगढ़ ह घलो खैरागढ़ उपचुनाव बर अपन प्रत्याशी के नाव के घोषणा कर देहे। पार्टी ह नरेंद्र सोनी ल चुनावी मैदान म उतारे हे। पेशा ले अधिवक्ता नरेंद्र सोनी दिवंगत विधायक देवव्रत सिंह के बहनोई हे।
इही बीच, खैरागढ़ उपचुनाव बर नामांकन पत्र भरे के काम चलत हे। आज कांग्रेस प्रत्याशी यशोदा वर्मा ह मुख्यमंत्री भूपेश बघेल के मौजूदगी म अपन नामांकन भरीन। उंहें अब तक डेमोक्रेटिक लेबर पार्टी, गोंडवाना गणतंत्र पार्टी अउ अंबेडकर पार्टी ले घलो उम्मीदवार मन ह नामांकन पत्र जमा करीन हे। नाम-निर्देशन पत्र दाखिल करे के काली चौबीस मार्च आखरी तारीख हे। पच्चीस मार्च के नामांकन पत्र के जांच होही अउ अठाईस मार्च के उम्मीदवार मन अपन नाम वापस ले सकहीं।
एति बारह अप्रैल के होवइया खैरागढ़ उपचुनाव म मतदान बर सामान्य प्रशासन विभाग ह संबंधित क्षेत्र म सार्वजनिक अवकाश घोषित कर देहे।
इही बीच भारत निर्वाचन आयोग ह खैरागढ़ उपचुनाव बर आईएएस शांतनु पी. गोटमारे ल सामान्य प्रेक्षक नियुक्त करे हे। राजनांदगांव के नागरिक उप निर्वाचन के संबंध म श्री गोटमारे ले स्टेशन रोड स्थित सर्किट हाउस म रोज मंझनिया तीन बजे ले संझा पांच बजे तक मिल सकत हे।
प्रोजेक्ट उन्नति सम्मान
महात्मा गांधी राष्ट्रीय ग्रामीण रोजगार गारंटी अधिनियम-मनरेगा के तहत मजदूर ले स्वरोजगार तक के सफर तय करने वाला प्रोजेक्ट उन्नति के पचहत्तर हितग्राह मन ल काली नई दिल्ली म सम्मानित करे जाही। एमा छत्तीसगढ़ के छै झिन श्रमिक घलो शामिल हे। केंद्रीय गा्रमीण विकास अउ पंचायती राज मंत्री गिरिराज सिंह काली ए हितग्राही मन ल सम्मानित करहीं।
जानबा के मुताबिक ए श्रमिक मनके प्रोजेक्ट उन्नति के माध्यम ले कौशल विकास के प्रशिक्षण देके स्वरोजगार बर तैयार करे गेहे। प्रदेश म ए सम्मान पाने वाला म धमतरी जिला के नीतू साहू अउ फूलवंती कंवर, गरियाबंद के गीतांजलि ध्रुव अउ ओमेश्वरी कंवर, कोरिया के कृष्ण कुमार अउ महासमुंद के बिमल साव शामिल हे।
शहीद दिवस श्रद्धांजलि
देश आज शहीद दिवस मनावत हे। भारत के आजादी के लड़ाई म अपन जान के आहुती देने वाला देश के महान वीर सपूत भगत सिंह, सुखदेव अउ राजगुरू ल आज श्रद्धांजलि दे जावत हे। आज के दिन ए वीर सपूत मन ल फांसी देगे रीहिस।
प्रधानमंत्री नरेंद्र मोदी ह शहीद मन ल श्रद्धांजलि अर्पित करीन। एक ट्वीट संदेश म श्री मोदी ह कीहिन कि मातृभूमि बर उंखर बलिदान देशवासी मन ल हमेशा प्रेरित करत रीही।
एति छत्तीसगढ़ के मुख्यमंत्री भूपेश बघेल ह घलो शहीद मन ल उंखर शहादत दिवस म नमन करीन। रायपुर स्थित निवास कार्यालय म आज ओमन अमर शहीद मनके चित्र म फूल चढ़ाके श्रद्धांजलि दीन।
नेहरू युवा संगठन-शहीद दिवस
नेहरू युवा केंद्र संगठन आजादी के अमृत महोत्सव के तहत आज देश के जम्मों छै सौ तेईस जिला म शहीद दिवस मनाये जावत हे। बछर उन्नीस सौ इकतीस म आजे के दिन भगत सिंह, राजगुरू अउ सुखदेव ल फांसी देगे रीहिस। ए युवा क्रांतिकारी मनके बलिदान के सुरता म हर बछर तेईस मार्च के शहीद दिवस मनाये जाथे।
केंद्रीय युवा कार्य मंत्रालय ह बताइन हे कि नेहरू युवा केंद्र क्रांतिकारी मन ल श्रद्धांजलि थीम म आधारित ए दिवस के आयोजन करत हे। एखर उद्देश्य स्वाधीनता सेनानी के जीवन, कार्य अउ दर्शन के माध्यम ले युवा पीढ़ी म कृतज्ञता, गर्व, सम्मान अउ कर्त्तव्य भावना के संचार करना हे।
माओवादी समाचार
बीजापुर जिला के बासागुड़ा थाना क्षेत्र म आज सुरक्षा बल मन ह चार झिन माओवादी मन ल गिरप्तार करीन हे। एमा ले एक जनताना सरकार के सदस्य अउ तीन मिलिशिया सदस्य हे। ए माओवादी मन उपर आगजनी, हत्या अउ लूट के घटना म शामिल रेहे के आरोप हे।
ओति गरियाबंद जिला म माओवादी मन डहार ले एक ग्रामीण के पिटाई करे के मामला आगू आय हे। मिले जानबा के मुताबिक अमलीपदर क्षेत्र के खरीपथरा निवासी धनीराम ल उंखर घर ले काली रतिहा कुछ हथियारबंद माओवादी मन अपन संग लेगे रीहिन। जेखर बाद माओवादी मन ह ओखर पिटाई करके गांव के बाहर छोड़ दे रीहिस। बीहनिया ग्रामीण मन ह एखर सूचना पुलिस ल दीन। एखर बाद पुलिस ह मामला दर्ज करके गंभीर रूप ले घायल धनीराम ल अस्पताल म भर्ती करीन।
विश्व क्षय दिवस
काली विश्व क्षय दिवस हरय। जम्मों दुनिया म ए बछर विश्व क्षय दिवस ल इंवेस्ट टू एंड टीबी सेव लाइव्स के थीम म मनाये जावत हे। बछर दू हजार तेईस तक छत्तीसगढ़ ल टीबी मुक्त राज्य बनाये बर स्वास्थ्य विभाग डहार ले कतकेन कदम उठाए जावत हे। एखर तहत प्रदेश म पीएचसी, सीएचसी अउ जिला अस्पताल मन म टीबी के निशुल्क इलाज के सुविधा दे जावत हे।
क्षय नियंत्रण कार्यक्रम के राज्य नोडल अधिकारी डॅाक्टर धर्मेन्द्र गहवई ह बताइन कि प्रदेश म टीबी मरीज मनके पहचान बर डोर टू डोर कैंपेन चलाये जावत हे। एखर तहत अब तक दू करोड़ तिरसठ लाख ले जादा लोगन मनके जांच करे गेहे, जेमा ले दू हजार तीन सौ मनखे मन म टीबी के लक्षण मिले हे।
यूपीएससी छात्र चयन
संघ लोक सेवा आयोग-यूपीएससी के मुख्य परीक्षा म छत्तीसगढ़ के आठ झिन छात्र के चयन इंटरव्यू बर होय हे। मुख्यमंत्री भूपेश बघेल ह चयनित सबो छात्र मन ल बधाई देत उंखर उज्जवल भविष्य के कामना करे हे। ओमन ह चयनित छात्र मनके हित म एक बड़ा फैसला लेत ये घोषणा घलो करीन कि जउन छात्र मन दिल्ली म इंटरव्यू देबर जाही, उंखर छत्तीसगढ़ सदन म रूके अउ भोजन के मुफ्त सुविधा छत्तीसगढ़ सरकार डहार ले दे जाही।
अमृत महोत्सव स्वरोजगार
युवा, महिला, अनुसूचित जाति, अनुसूचित जनजाति अउ अन्य पिछड़ा वर्ग के लोगन मन ल स्वरोजगार के प्रति जागरूक करे के उद्देश्य ले काली चौबीस मार्च के दुर्ग स्थित बीआईटी कॉलेज म एक कार्यक्रम के आयोजन करे जाही। ये कार्यक्रम आजादी क अमृत महोत्सव के तहत होही। एखर आयोजन केंद्रीय सूक्ष्म, लघु अउ मध्यम उद्यम मंत्रालय, लघु उद्योग भारती छत्तीसगढ़ प्रांत, दलित इंडियन चैम्बर्स ऑफ कॉमर्स एंड इंडस्ट्रीज अउ छत्तीसगढ़ चैप्टर के सहयोग ले करे जाही।
फुटबॉल प्रतियोगिता
तिरालिसवां राष्ट्रीय महिला फुटबॅाल प्रतियोगिता आज ले कोरबा म शुरू होगे हे। भारतीय महिला फुटबॅाल महासंघ के राष्ट्रीय सचिव शेख मोहम्मद जावेद ह बातइन कि इकतीस मार्च तक चलइया ए चैंपियनशिप म सतरह राज्य के टीम ह हिस्सा लेवत हे। स्पर्धा के तहत छत्तीस मैच खेले जाही।
खादी प्रदर्शनी
रायपुर के पंडरी स्थित छत्तीसगढ़ हाट परिसर म काली ले राज्य स्तरीय खादी प्रदर्शनी शुरू होय हे। इकतीस मार्च तक चलइया ए प्रदर्शनी के आयोजन खादी अउ ग्रामोद्योग बोर्ड डहार ले करे जात हे। प्रदर्शनी म परंपरागत खादी रेशम अउ हथकरघा के कपड़ा ल घलो शामिल करे गेहे। एखरे संग बनारसी, चंदेरी, भागलपुर, राजस्थानी कपड़ा अउ कलात्मक जीनिस के प्रदर्शनी राखे गेहे। ये प्रदर्शनी बीहनिया ग्यारा बजे ले रतिहा नौ बजे तक खुले रीही। प्रदर्शनी के जगा म सांस्कृतिक कार्यक्रम के आयोजन घलो करे जात हे।