आज दिनभर के खबर ल अपन गुरतुर छत्तीसगढ़ी भाखा म पढ़व

जम्बो कोविड केयर सेंटर
 केन्द्रीय पेट्रोलियम अउ प्राकृतिक गैस अउ इस्पात मंत्री धर्मेन्द्र प्रधान ह आज छत्तीसगढ़ के सेल के भिलाई स्टील प्लांट म बने एक सौ चैदह ठिन बिस्तर के कोविड केयर सुविधा ल राष्ट्र ल समर्पित करीन हे। ए अस्पताल गैसीय आॅक्सीजन ले लैस हवय अउ अस्पताल म आॅक्सीजन के आपूर्ति बर संयंत्र ले डेढ़ किलोमीटर के पाईप लाइन ल बिछाय गेहे। ए ह ए परियोजना के पहिली चरण हवय, जेखर उद्देश्य अवइया दू चरण म आॅक्सीजन युक्त पांच सौ बिस्तर तक विस्तार करना हे।  ए अवसर म श्री प्रधान ह कोरोना काल म आॅक्सीजन के आपूर्ति म भिलाई स्टील प्लांट के भूमिका के सराहना करीन हे। ओमन ह आश्वासन दीन हे कि भारत सरकार अउ सेल छत्तीसगढ़ के संग हवय अउ राज्य के मनखे मन बर टीकाकरण ल जादा ले जादा बढ़ाय के हरसंभव प्रयास करे जाही। ओमन ह छत्तीसगढ़ म कार्पोरेट अउ राज्य सरकार ले कम से कम बेरा म टीका ल जादा ले जादा बढ़ाय बर संग मिलके काम करे के गोठबात किहीन। कार्यक्रम म केन्द्रीय इस्पात राज्यमंत्री फग्गन सिंह कुलस्ते ह कोरोना महामारी के बेरा इस्पात क्षेत्र डहार ले करे जात आने-आने उपाय उपर गोठबात करीन। ए वर्चुअल कारीकरम म छत्तीसगढ़ के स्वास्थ्य मंत्री टी.एस. सिंहदेव घलो सामिल होईन।
फसल-एमएसपी
 प्रधानमंत्री नरेन्द्र मोदी के अध्यक्षता आर्थिक मामला के मंत्रिमंडलीय समिति ह विपणन सजीन दू हजार इक्कीस-बाईस के सबो निर्धारित खरीफ फसल बर न्यूनतम समर्थन मूल्य ल बढ़ाय के मंजूरी दे देहे। काली मंत्रिमंडल के बइठका के बाद कृषि मंत्री नरेन्द्र सिंह तोमर ह संवाददाता मन ल बतईन कि सरकार के खरीफ फसल बर न्यूनतम समर्थन मूल्य ल बढ़ा देहे, ताकि किसनहा मन ल उंखर मनके उत्पाद के बने कीमत मिल सकय।  किसनहा मन ल उत्पाद लागत उपर सबले जादा अनुमानित लाभ लगभग पच्यासी प्रतिसत बाजरा ले मिले के संभावना हे। उरीद ले पैंसठ प्रतिसत अउ अरहर दार ले उत्पादन लागत के बैसठ प्रतिसत लाभ के अनुमान हवय। बाकी फसल उपर रिटर्न उत्पादन लागत के कम से कम पचास प्रतिसत रइही।  कृषि मंत्री ह बतईन कि पाछु बछर के तुलना म न्यूनतम समर्थन मूल्य म सर्वाधित वृद्धि सफेद तीली बर राखे गेहे, जउन कि चार सौ बावन रूपिया प्रति क्विंटल हवय। एखर बाद अरहर अउ उरीद दार के न्यूनतम समर्थन मूल्य म तीन सौ रूपिया प्रति क्विंटल के वृद्धि करे गेहे। पाछु बछर के मुकाबला मूंगफली म दू सौ पचहत्तर रूपिया प्रति क्विंटल अउ काला तिल म दू सौ पैंतीस रूपिया प्रति क्विंटल बढ़ाय गेहे।
मुख्यमंत्री-भूमिपूजन
 मुख्यमंत्री भूपेश बघेल ह आज रईपुर म वर्चुअल माध्यम ले कबीरधाम अउ गरियाबंद जिला म आने-आने विकास कार्य के लोकार्पण अउ भूमिपूजन करीन। कबीरधाम जिला म ओमन ह दू सौ चैबीस करोड़ रूपिया ले जादा के लागत ले सात सौ चैव्वन विकास कार्य अउ गरियाबंद जिला म करीब तीन सौ संतावन करोड़ रूपिया के लागत के पांच सौ सोलह ठिन विकास कार्य के लोकार्पण अउ भूमिपूजन करीन।
खाद-दर
 राज्य म ए बछर किसनहा मन ल समिति ले कम हुए नवा दर म खाद मिलही। उहें, जउन किसनहा मन ह पहिली ही खाद ल खरीद लेहे, ओमन ल नवा अउ पुराना दर के अंतर के राशि समिति के माध्यम ले लहुटाय जाही।  जानबा के अनुसार राज्य सरकार ह समिति के माध्यम ले किसनहा मन ल दे जाय वाले खाद के कीमत म कमी करे हे। अब किसान मन ल डी.ए.पी. बारह सौ रूपिया, एन.पी.के. ग्यारह सौ पच्यासी, एस.एस.पी. पाउडर तीन सौ चालीस, एस.एस.पी. दानेदार तीन सौ सत्तर अउ जिंक एस.एस.पी. पाउडर तीन सौ पचपन रूपिया म मिलही।  
कोरोना टीकाकरण
 छत्तीसगढ़ ह कोरोना टीकाकरण के मामला म सबो वर्ग म अच्छा प्रदर्सन करे हे। स्वास्थ्य कार्यकर्ता मनके टीकाकरण के मामला म राज्य के स्थान पहिली दू राज्य म हवय। उहें, पैंतालीस बछर ले जादा उमर के मनखे मनके टीकाकरण करे म छत्तीसगढ़ ह देस म पहिली दस ठिन राज्य म अपन जगह बनाय हे।  कोरोना टीकाकरण के राज्य नोडल अधिकारी अउ राष्ट्रीय स्वास्थ्य मिशन के संचालक डाॅक्टर प्रियंका शुक्ला ह अट्ठारह बछर ले जादा उमर के सबो लोगन मन ले अपील करीन हे कि ओमन ह कोनों भी प्रकार के अफवाह उपर ध्यिान झन देवय अउ टीका ल लगवाय। ओमन ह किहीन कि टीका लगवाय ले अवइया संभावित संक्रमण ले घलो बचे जा सकत हे।  उहें, रायगढ़ जिला म पंचायत अउ ग्रामीण विकास विभाग म काम करइया सबो अधिकारी अउ करमचारी मनके टीकाकरण पूरा चुके हे। दूनों टीका लगाय के बाद अट्ठारह सौ चैव्वन मनखे मन म मात्र अंठावन लोगन मन कोरोना ले संक्रमित होईन।
कोरोना संक्रमण-ओड़िशा
 ओड़िसा राज्य म कोरोना संक्रमण के सरलग बाढ़त मामला ल देखत हुए ओड़िसा सरकार ह छत्तीसगढ़ राज्य के लगे वाले सीमा ल सील कर देहे। उहें, अंतर्राज्यीय सीमा म पेट्रोलिंग ल घलो बढ़ा देहे। वरिष्ठ अधिकारी मन बतईन कि छत्तीसगढ़ के सीमा ल लगे जिला म पाछु कुछु दिन ले कोरोना संक्रमण के मामला म बढ़ोतरी होईस हे। ओखर बाद ए आदेस ल जारी करे गेहे कि पड़ोसी राज्य ले अवइया लोगन मन ल कोरोना के निगेटिव रिपोर्ट दिखाय के बाद ही ओड़िसा म प्रवेस के अनुमति दे जाय।
नीति आयोग-कोविड सलाह
 नीति आयोग म स्वास्थ्य मामला के सदस्य डाॅक्टर वी.के. पाॅल ह किहीन हे कि लाॅकडाउन म छूट मिले के ए अर्थ नइ हे कि हमन निश्चिंत हो जावन अउ लापरवाही बरतन। आकाशवाणी ले बिसेस गोठबात म ओमन कोविड संबंधी दिसा-निरदेस के सरलग पालन करे के सलाह दीन हे। ओमन किहीन कि वैक्सीन लगाय के बाद घलो मास्क पहरे अउ सुरक्षित दूरी के पालन करय।
यूपीएससी-साक्षात्कार
 संघ लोक सेवा आयोग-यूपीएससी डहार ले सिविल सेवा मुख्य परीक्षा-दू हजार बीस बर दू अगस्त ले साक्षात्कार फेर सुरू करे जाही। साक्षात्कार के सुरूवात अप्रैल म होय रिहीस, फेर कोरोना संक्रमण के विस्तार ल देखत हुए एला रोक दे गे रिहीस। आयोग ह कहिन कि प्रतिभागी मन ल साक्षात्कार ले संबंधित सूचना दे बर इलेक्ट्राॅनिक माध्यम ले चिट्ठी भेजे जाही। ए पत्र ल आयोग के वेबसाइट ले डाउनलोड करे जा सकही।
महासमुंद-आत्महत्या/दुर्घटना
 महासमुंद जिला के बेमचा गांव म एक झिन माईलोगिन ह अपन पांच झिन बेटी के संग ट्रेन के आगू कूदके आत्महत्या कर लीस। ए घटना पाछु रतिहा कोतवाली थाना क्षेत्र म संकर नगर फाटक के तीर होईस। महासमुंद एसडीओपी नारद सूर्यवंशी ह बतईन कि पुलिस ल सूचना मिले रिहीस कि रेलवे ट्रैक उपर छह झिन लोगन के ट्रेन ले कटके मौत होगे हे। पुलिस रात म ही घटनास्थल पहुंचीस। ए जम्मों के सव के पंचनामा करके पोस्टमार्टम बर भेज दे गेहे। पुलिस ए मामला के जांच म जुट गेहे।  मुख्यमंत्री भूपेश बघेल ह ए घटना म सोक जतावत जिला अउ पुलिस प्रसासन ल ए मामला के जांच करके जरूरी कार्रवाई करे के निरदेस दीन हे।  इही बीच, भाजपा के प्रदेस अध्यक्ष विष्णुदेव साय ह घलो ए घटना म सोक जतावत परिजन मनके प्रति संवेदना व्यक्त करे हे। ओमन राज्य सरकार ले मांग करीन हे कि ए घटना के जांच करके संवेदनसील पहल करय।  उहें, महासमुंद जिला म आज ट्रक के टक्कर ले कार सवार तीन झिन लोगन के मउत होगे अउ दू झिन आने लोगन मन घायल होगे हे। ए जम्मांें लोगन महासमुंद ले अपन घर खमतराई गांव लहुटत रिहीन, तभे महासमुंद-तुमगांव रद्दा म गाड़ाघाट पुल के तीर ए हादसा होईस।
मौसम
 दक्षिण पश्चिम मानसून आज छत्तीसगढ़ में प्रवेस कर लेहे। मौसम विभाग के अनसुार मानसून के आगू बढ़े के ए बेरा स्थिति अनुकूल हवय अउ अवइया कुछु दिन म एखर पूरा छत्तीसगढ़ म सक्रिय होय के संभावना हे।  मौसम वैज्ञानी एच.पी. चन्द्रा ह बतईन कि दक्षिण उत्तर प्रदेश के संगेसंग  बंगाल के खाड़ी उपर चक्रवाती घेरा स्थित हवय, जेखर सेती अवइया चैबीस घंटा के दउरान छत्तीसगढ़ के नौ जिला म यलो अलर्ट जारी करे गेहे। ये जिला हवय- जशपुर, रायगढ़, कोरबा, जांजगीर-चांपा, बलौदाबाजार, धमतरी, कांकेर, नारायणपुर अउ महासमुंद। एखर अलावा अवइया अड़तालीस घंटा म राज्य के छह ठिन जिला – गरियाबंद, धमतरी, बालोद, राजनांदगांव, दंतेवाड़ा अउ बीजापुर भारी से अतिभारी बारिस होय के चेतावनी दे गेहे। ए छह जिला बर मौसम विभाग ह रेड अलर्ट जारी करे हे।